Kiristan Binam
8
Odokké ajonkídínga, Ruːnébí Mesodonia kumgokídíːdo bík binam ayaːdém suːpag ngolu nolum kinmolíːdung. 2 Bulu kínggípé ngasodla dungngai odokké bulu kínggípé opandagai, émpigeːla buluk binamdo bulu makkebmapé bitag. 3 Ngo arodém lukanbidung bulu éddíkopé bila:dagaji bulu bitag, odokké buluk bilaːnamdémsin bibadyaːtag. Bulu aíé méːsula binam appíːdéméi bitag, 4 Ru:nék taniːkídíːdém bidumsunam séː agersém bidumsupé émna bulu ngolukkolok kumkumola kolíksutag.a 5 Odokké ngolu okko émna méːtagan édémpé bulukkolo itomang, émpigeːla bulu aíém Ruːtummé tolíksupo:to odokké Ruːnéké méngkamdémpé bulu aíém ngolumsin bito. 6 Édémpila ngolu Taitasmé, séːkobí séː agersém gerrobbonédé, nolukkoloːpé gíladlangkula séː bidumsunam agersém nolu gerredopé nolum lusalígdopé ngolu bím kumna luka. 7 Nolu suːpag noluk kanam appíːloiː méːtinsunamno, agom-lunamno, méːjoːnamno, bidumsulíːnamno odokké ngolum aipé-méːnamno mirémna dung, odokké kangkítok nolu suːpag séː binam agersoːsin mirémpaːyé.8 Ngo nolum édém itoka émna lulígmang, émpigeːla noluk asinang-onamdém éddíko arodang édém ngo ankaːla-kaːpé émna akon kumgokídíːdok binam agerdém nolukkolo kaːyisudung. 9 Kapéné nolu kindag ngoluk Ruːtum Jisuké aséːdém, bí mirémdaggai, émgom noluk légaːpé bí opannépé ibika, odo nolu bík opannamdokki mirémyépé émna.
10 Odokké séː agerso nolukképé okkardé aiyapagyaːdagji odok légaːpé sidé ngok luyírdéː Méːnying binamoːdo noluk amindé dunggoːpoyamangngai, émpigeːla asinbokké bilínamdoːsin noluk amindé dungngépoːdagai. 11 Suːpag édé agerdém iledlang. Kapé nolu bipé émna méːségIa lennola dungngai, édémíːpé aíké pagnam kísapé édé agerdém iledlang. 12 Kapéné asinbokké bipé méːmílo, amandém bík kanamdémpé toríksudo, bík kamanam kísapémang.
13 Akonké turnamém nolum ngalatsumogeːla méːpola duːmopé émna ngo méːmang, nolusin lékokaːlangka émnapag ngo méːdag. 14 Suːpakké noluk bojérungko kanamdo bulu okkom lagidagji édém bilaːyé, odokké ngoluk lagidodo buluk bojéko kakodok nolum biladyéku. Odo appíːdéi lékoyé, 15 édém atkamdémpéː "Séːko bojéko tíkumsudoji bíkké kasekayetomang, odokké séːko ajjiːko tíkumsutoji bíkké píːrammang."b
Taitasbíːla Bík Gíjonkídar
16 Ngo Ruːnémé aipai bidung séːko Taitaské asindo noluk légaːpé ngok méngkamarpé asin-dígla méːmoton. 17 Bí ngoluk kumna-lunamoːdém toríksumang, émpigeːla bí aíé airuːpé gílíːla nolum kaːríksukolo gíto. 18 Odokké bík lédílo ngolu bíroko métélígdung séːkom kumgo appíːloi tatpon lutadlo bík agerém luyitsutagdag. 19 Odokké éddomang, séː séur agersok légaːpé ngoluk lédílo gíjonsudopé bím kumgokídíːdokké tolíktag. Ruːnék aminé unjígdopélaː ngoluk lennola duːnamsém kaːpaːdopé ngolu séː agersém gerdung.
20 Méːyumsudanna binam séː amansém ngoluk lagyilaksanam tayéːlo séːkosin ngolum lukalaːmaːdopé ngolu airuːpé totsudo. 21 Okodé kabodagji, Ruːtumké kanggangoːloːmang, émpigeːla taniːlok kanggaːloːsin, édém inamdé ngoluk ipénamdé.
22 Édémpila ngolu buluk lédílo ngoluk bírokoda métélígdung; ngolu bím bojékolo ankangka odokké bím asin-bidanna idumsulínékopé paːto. Suːpag bí nolum kínggípé méːtinsunamé bí nolukkodoːpé gílíngoːyaːla dung. 23 Taitasmé taumílo lulang, bí ngok gerjoné séːko nolum kaːdumsunam légaːpé ngom gerdumsudag. Odokké bík gíjonsunamkídíːdémc kumgolokké mélíktag, odokké bulu Kiristoké unjígdé. 24 Édémpila noluk ayangém léngkannang, odokké appíng kumgokídíːdo nolum luyitsunamdé arokang émnamdém léngkannang.