7
Méːbomsunam ajonkídínga, séː pesubinamkídíːsé ngoluk légaːpé pesubinammé, kajé ngolu aíé pídesula duːlajé édé appí:dokké okko amírémna yallom suamodag, odokké kajé Ruːnémé pésola nérkíkpé angunna duːlai.Polké Méːponam
2 Noluk asindo ngolum dungkom bilang. Ngolu séːkomsin imurém imang, ngolu séːkomsin aimap imomang, ngolu séːkomsin yadmang. 3 Ngo nolum anyisumopé émna sém lumang. Nolu ngoluk asinso dung édém ngo poːpéloːsin luka, ngolu sigom turgom noluk lédílo lékkobo. 4 Noluk tayéːlo ngokké bottéruːné méːtinsunamko dung; ngo noluk aminno pugdapé lusudo. Nolu ngom airuːpé kínggíːmotag; ngoluk appíng ngasodlo nolu ngom méːpotímoka.
5 Kapéné édílo ngolu Mesodoniaːpé gíka, ngolu ngarasutomang, émpigeːla ngolum appíːloi ikisiatto, ruːyipé momínsunamé odokké arang-araːpé pésso. 6 Émpigeːla Ruːnébí, séːko méːdírném méːsarém bidagji, Taitaské gínamdokki ngolum méːsarmoto, 7 odokké bík gínamoːdokkimang émpigeːla noluk bím binam méːsarkinsin. Nolu ngom airuːpé kaːlíːladung émna, noluk kínggíːpé méːdírra duːnamdém, odokké ngom noluk asinang-onamdém, bí ngolum lubitakku, édémpila ngo suːpag poːpékémyang méːpoyaːdag.
8 Ngok adlígnam doːjígdé nolum airuːpé méːdírmoto, émdaggom ngo adlíka émna méːdíramang. Poːpé ngo ajjiːko méːdírgamkang, kapéné édé nolum airuːpé asin-kimoto émgom édé kinamdé konténgokang. 9 Émgom ngo méːpodag, émpigeːla nolum méːdírmoka émnamang, noluk méːdírnamdé nolum méngkutsumotoku émna. Kapéné Ruːnék méngkamdémpé nolu méːdírka édémpila ngolu nolum okkomsin kapitomang. 10 Ruːnék légangé méːdírdé méːlatsumodakku, édé moturbikunamém paːmodag odokké méːmursunamém kamomang, émpigeːla moːpísok méːdíré sinamém bidag. 11 Kangkítok, noluk sé: méːdírnamsokki Ruːnébí okkom ibitangː édé nolum éddík ardamoton, noluk imurmaːnamdém kaːmopé kapé asin-dígbikanǃ Édémpin ngernamém, ansunamém, ilínam, méːbinam, aro-kébang baːbipé lennonam. Odo appíːdo nolukké imuré kamang émna aíém léngkansutag.
12 Édémpila ngo nolukkoloːpé doːjígdém atkagomsin, édém imurnédok légaːpélang imur-inamdok légaːpé admangai. Émpigeːla nolu éddíko ngolukkolo arola duːji édém Ruːnéké kanggaːlo nolu aíém kaːbeksudopé atka. 13 Édé appíːdokki ngolum lusabitag.
Ngolum lusangoːmang; émpigeːla nolu kapé Taitasmé boríksula bím kaːdumsula méːpomoton, édé ngolum méːpoyaːmoto. 14 Ngo bíkkolo nolum pugdapé lubisuka, odokké nolu ngom anyisumotoma. Ngolu okko émna lubikaji édé appíːdé nolukkolo arokang, édémpila noluk tayéːlo ngoluk pugdapé lusunamdé Taitaskolo arokang. 15 Odokké nolum méːpaːlangkula bík ayaːdé nolukképé bojéyaːdungku kapéné nolu appíngé bík luyírnamém tadla dung, odokké pésoménggéla bím boríksuka. 16 Nolum kínggíːpé méːtinsulaːnam légaːpé ngo méːpodag.