6
Ruːnék ager-gerjon kísapé, ngolu nolum lumolumola ludung Ruːnék aséngém arékamapé toríksuyok. 2 Kapéné bí ludag,"Ngok ayang bido ayírdo,
ngo nolum tadbika;
odokké moturbinam bido longédo
ngo nolum kaːdumsuka."
Ngo nolum lubidung, suːpag Ruːnék ayang binam ayíré, suːpag moturbinamém paːnan longgé.a
3 Séːkaimé léːsutsumopé émna ngolu okkomsin gomang, kapilaːné ngolu ngoluk agerso séːkomsin imurém aːkosin paːmolíːmang. 4 Édémpimap ngoluk gernam appíːdo ngolu Ruːnék aro ager-gerné émna léngkansudo. Ngolu takam ngasodém, duːgém, ajukangém, 5 díngkosunamém, makanaːlo tumnamém, urradoém, kínggín agerro, yummap duːnamém odokké kénol duːnamno,b 6 naréːlo, kinnamno, dagrasunamno, odokké asin-ainamno, Angunné Yalolo, odokké aron ayaːlo; 7 ngoluk aroné doːyídokki, odokké Ruːnéké tornamki appíngém asoːpé oijosuka. Payasunapéla parasunampé, ngolukké arolok-duːnamdé abna-panané kísapé dung. 8 Lékoném ngolum luyitsudag lékonkém anyisumodag; lékoném aidag émdag lékonkém lupagdag. Taniːékké ludag ngolu aro-lumané taniyé émna, émpigeːla ngolu arrom ludo. 9 Ngolu okkosinmang émna taniːékké ludag, émpigeːla appíngé ngolum kinabdag. Ngolu siyébo émna taniːékké ludag, émpigeːla kangkítok ngolu suːpésin turra dung. Ngolum démmíktag, émgom ngolum mokemang.c 10 Ngolu kuloikoniyaːdag émna taniːékké ludag, émpigeːla loːdísém ngolu méːpola du:do. Ngolu opandag émna taniːékké ludag, émpigeːla ngolu akoném yalolo mirémodo. Ngolukké okkosin kamang émna taniːékké ludag, émpigeːla appíngé ngolukké dung.
11 Méːbomsunam Korindok ajonkídíngaǃ Ngolu léːsikamsimaːpé nolum appíngém lubitag, ngolu nolum airuːpé aipé-méːdag.d 12 Ngolu nolum aipé-méngasumang, émpigeːla nolu ngolum noluk aipé-méːnamdém méngasudung. 13 Ngok ommangémpé nolum méːla ngo suːpag ludungː ngolu nolum kapé aipé-méːdoji édémíːpé nolusin ngolum aipé-mé:lang. Noluk asiném ngoluk légaːpé mogebilang.
Turné Ruːnék Kumli:dé
14 Méngkésumankídí:dok lédílo okpumkosuyok. Kapéné arolok-duːnékélaː arolok-duːmaːnék kapin lékon ageré kadun? Émmaːmílo píangkélaː kémoké kapin kumbosunamé kadun? 15 Kiristokélaː Belialkée (Uiːké) pongkodo kapin lékokaːmínsunammé kadun? Méngkésunélok kapparné lékonammé méngkésumaːnélok lédílo kadun? 16 Ruːnék kumli:do ílíːmoimaːdokké oko lékonammé kadun? Kapéné ngolu turné Ruːnék kumli:dé. Ruːnébí aíé lutagː
"Ngo buluk lédílo duːmínyé,
odokké ngo bulum lambé-gíjonsuyé,
ngo buluk Ru:népé iyé,
odokké bulu ngok tani:pé iyé."f
17 Ruːtumbí ludag,
"Édémpila bulukkolokké gílentokuk
odokké angusutok.
Naréman okkomsin gakkiyok,
odo ngo nolum toríksuyé.g
18 "Ngo nolukképé Abupé ibiyé,
odokké nolu ngok ommaːpé iyé,
Kínggíːtaríné Ru:tumbí ludag."h