5
Kapéné ngolu kindag moːpísok dunggéng poːyupsém momíggom, Ruːnék binam loːdí-longkípé duːyarpéné okumko tayéng-amoːto ngolukké dung, okodém tani alakki momang. 2 Odokké ngolu suːpag sagígíla dunggom, tayé:tok génam-galugdém ngolu airuːpé-molíkkosulíldung. 3 Kapila:né édílo ngolum galugdém pídlígbiyéji, ngolum pítsula duːdopé pangkumaːbo. 4 Édílo ngolu séː poːyupso duːji, ngolu sagígíla duːgla duːdag, kapilaːné ngoluk génamdém pítpagmolímang émpigeːla ngoluk tayéngké dungkotok galugdém molíkosulíːdung. Édépimílo okodé sipénén édém turnamdé metpagyé. 5 Ru:nébí édé sé:ko ngolum odok légangarpélang okodé gídoji édé arro émna léngkanbinam légaːpé ruːtag, odokké Yalodém ngolum mékumnam kísapé bitag.6 Odok-léga:pé ngolu lo:dísém angpítala ludo. Ngolu kindag édíloːpé ngolu séː amírso turraduːji, odoloːpé ngolu Ruːtumkolokké moːtéːpé dung. 7 Ngolu amikki kaːbegnam kídíːdokkimang, méːtinsunamki turradung. 8 Ngo ludung, ngolu aropé kindag, séː amírsokké gípagnamdém méːboyaːdag, kapéné odo Ruːtumké lédílo tayéng-okumto duːyeku. 9 Édémpila ngolu séː amírso dunggom, odokké séː amírsokké moːtéːpé dunggom bím méːyumsumonamdé ngoluk méːnamébo. 10 Ngoluk turra duːdagdo okkom ikaji, ainémmanggom aimaːném, édé inamdok kísapé ngolu appíngé ngoluk paːpénam amaném paːyérung. Kapéné ngolu appíngé Kiristoké kébaːbangkodo dakkanruːsupaːyé.a
Lékomokunam Ager
11 Ruːtummé pésonamdé okkon odok arédém ngolu kindag, édémpila ngolu taniyém kinmolíːdag. Ngolu okkon édém Ruːnébí nérkíkpé kindag, odokké ngo akaːdung ngolu kapin taniyén édém nolusin kindag. 12 Ngolu aíé lékoda nolum lukanbikupé méːmang, émpigeːla nolu ngolukkolo pugdapé lusudopé lambéko bidung. Odo nolu taniyém kaːla buluk soritém kaːma:pé pugdasunékídíːdém lulatsubilaːyéku. 13 Ngolu aroru:péi simaddun? Édé Ruːnék légaːpé; ngolu ainém méːmílo, édé noluk légaːpépag. 14 Kapéné Kiristoké ayaːdé ngolum bolbodadag, kapilaːné ngolu kindag appíngké légaːpé aːko sibikang, édémpila appíngé sikang.b 15 Bí appíngké légaːpé sibikang, séːkobulu turraduːji bulu aíké légaːpé turmaːpé séːko buluk légaːpé sibikaːji odokké turkangkun bík légaːpé turpé lagidag.
16 Édémpila suːpakkolokké ngolu séːkomsin moːpísok kangkampé kaːmaːyé. Kiristomé ngolu lékonkém édémpé méːdagai, émgom ngolu édémpé méːtokumaːbo. 17 Édémpila séːkai Kiristokolo duːmílo, bí anupé ruːtenkunamé. Akunédé gípakkang, kangkíto, annamkangǃ 18 Séː appíːsé Ruːnékolokké, séːko ngolum aídé Kiristokokki bíkkolo lékomotokun odokké ngolum lékomokunam agerém bitagː 19 Ruːnébí taniːlok paːbém buluk kekonpé sabgabmaːpé, Kiristokolo moːpísém bík aíkolo lékomodungku. Odokké bí ngolum lékomokunam doːyísém lugoːbidopé tolíktag.