Amongkiːlí:lo Yalolok Kumsung
4
Ruːnék aséngki ngolum séː agersém idopé bitag, odok-légaːpé ngolu asiném ajji:sumaːyé. 2 Édémpimap ngolu anyisupénam léːsil-inam agerkídíːdém mépaktagbo. Ngolu séːkomsin yadgola turmanggai, odokké Ruːnék gomugém luyodlumadmangngai. Émpigeːla arrom léngkanna Ruːnék kanggaːlo appíng taniːlok méːloddo ngoluk ainamém kaːpa:modungai. 3 Odokké ngoluk tatpon lutatsé takposula duːmílo, édé yokpénkídíngoːdokképé takposula dung. 4 Séː moːpísok migomdé méngkésumaːnékídí:dok amigém miglammoto. Bulum píaːdém kaːpaːmang, okodé ngoluk unjígné Kiristoké tatpon lutaddén, Ruːnébí kappar idagji édém léngkanbinédé Kiristobí. 5 Kapéné ngolu aíém lugo:subimang, émpigeːla Jisu Kiristobí Ruːtumbí émna, odokké ngolu Jisuk légaːpé noluk ager-gerné kísapé lugoːbido. 6 Kapéné Ruːníːbí séːko lutagji, "Kémodokké píangé píkaːlangka," bíːíng píaːdém ngoluk asinso pímoto, odo ngolu Ruːnék unjígdém kinnayé okodém Jisu Kiristokolo kaːpaːdang.a7 Suːpag édé píaːdé ngoluk asinso pia:la dung, émpigeːla ngolu aíkídíːsé bedné among kiːlíng kísadag okodok araːdo édé bojéruːné ompoti:dé dun. Ngoluk kínggíné tornamdé Ruːnékolokké, édé ngolukkolokkémang émnamdém édé ngolum nérkíkpé kinmodag. 8 Ngasodé nolum appíːlokké nínggadung, émgom motabmang; murdag; émgom méːdírmang; 9 ipusiretag, émgom mépagmang, démtaptag, émgom momígmang. 10 Ngolu Jisuk sinamdém loːdísém ngoluk amírso joːbomdo, édémpimílo Jisuk turnamdémsin ngoluk amírso léngkanbiyépé. 11 Ngoluk turdag appíːso Jisuk légaːpé ngolu loːdísém sinam paːla duːdag, odo ngoluk séː sipéné adin-amírso bík turnamdém kaːpaːmoye. 12 Édémpila, sinamé ngolukkolo ager-gerra dung, émpige:la turnamésin nolukkolo ager-gerra dung.
13 Édém attag: "Ngo méngkésudag; édémpila ngo lutag.'' Édé lékoné méːtinsunamnok yalodo ngolusin méngkésudo odokké odok-légaːpé ludo.b 14 Kapila:né ngolu kindag sé:kobí Ru:tum Jisum sikolokkém turmotokuji ngolumsin Jisuk lédílo turmoyéku odokké bík dungkodo ngolum noluk lédílo dakkansumoyé.c 15 Séː appí:sé noluk ainam légangé, édémpimílo aséːdé bojéːbojéla bojéko taniːlo:pé pí:la Ruːnémé aipai binné ababomyé.
Méːtinsunamki Duːnam
16 Odok-léga:pé ngolu asiném ajji:sumang. Ngoluk adin-amírsé yogayogabomdaggom, ngoluk yalobém loːdíːlodém anumotíbila duːdag. 17 Kapéné suːpakké ngoluk ngasotkídíːsé loːtungoyé édé duːyarpénémang. Émgom bulu ngolukképé unjíkkoném bidag okodé kínngínéla loːdí-longkípé duːyaryé. 18 Édémpila ngolu kaːbegnamkídíːdém kaːma:pé kaːbegmaːnamkídíːdém kaːla dung. Kapéné kaːbegnamkídíːsé duːyarmang, émpigeːla kaːbegmaːnamkídíːdé loːdí-longkípé duːyardag.