Anu Luségdok Ager-gernékídíng
3
Ngolu lékoda ngoluk aíké tayéːlo luyitsuduːnei? Odokké nolukkoloːpélaː nolukkolokké amikémpé lukanbinam doːjíkko ngolum lagidagnei? 2 Nolu aíkídíːdé ngoluk doːjígdé, appíngé kinna poyépé émna ngoluk asinkídíːso adlígbitag. 3 Ngoluk agerdok gerrenamdé émna, nolu Kiristoké doːjíkko, siyaiki adnammang émpigeːla turné Ruːnék Yalodokki adnamé, ílíng silodlo admang émpigeːla taniːlok asin araːbok adnamé émnamdém léngkansulang.a4 Ruːnék kéraːlo Kiristokokki ngolukké sémpin méːtinsunamé dung émna ngolu lusulaːdag. 5 Ngolu séː agersém ilaːdag émna lusunan okkosin kamang. Ngoluk ilaːnanédé Ruːnékolokképag gídag; 6 bí édé séːko ngolum anu luségdok ager gerranépé imotag, édé adnamdokkimang émpigeːla Yalodokkipag; kapéné luro:dé sinamém bombitag, émpigeːla Yalodé turnamém bidag.b
7 Ílíng siloddo abíkpé Luro:dém arrígbitagai, odokké édém bidodo Ruːnéké unjígdém kaːpaːto. Musiːké migmodok unnamdé yogadaggamsin, Israel taniːkídíːdé bík migmodém kaːríksula:tomang. Luro:dé, sinamém bombinédé édílo édé kínggíla duːdagji, odok gídagdo édémpin unjíglo gíka,c 8 Yalok agerdé édémyang unjígyaːmaːnei? 9 Taniyém lupagné agerdéi unjígmílo, arolok-duːnamém biné agerdé éddíko unjígyaːnénǃ 10 Kapéné suːpakké agerdok unjígnamdém luyisumílo lekekédo unjígéi kamang. 11 Kapéné okodé kontéglok légaːpé duːnédoi unjígé dungngamílo, émpém okodé loːdí-longkípé duːyaryéji odokké éddíkopé unjígé kayayénǃ
12 Odok-légaːpé sémpin akala duːnamé ngolukké du:namé, ngolu airuːpé kínggíːdag. 13 Ngolu Musikémpé imang, édílo unjígdé yogabomdagaji, odo bík migmom Israel taniːkídíːdém kaːmogema émna takposuka. 14 Émpige:la buluk méːlotkídíːdém tébégmoto, kapéné édílo aku luségdém podon siloké longésoːpé édé takposunamdé duːtídung. Édém lapagmaːda, kapilaːné édém Jisu Kiristongkolo laːpagbidag. 15 Siloké longésoːpé édílo Musi:ké adnamdém podoji, takposunamko buluk asiném takkomdag. 16 Émpigeːla édílo séːkaibí Ruːtumkoloːpé gíladdokuji, édé takposunamdém laːpagbidag. 17 Suːpag Ruːtumbí Yallo, odokké okolo Ruːtumké Yalodé duːji, odo pagbopé-inamé kamang.d 18 Odokké ngolu, séːkobulu migmom takkomsuman Ruːtumké unjígdém kaːpa:modo, bík unjígdé ngolum angumolangkula bím gésumodag, okodé Ruːtumkolokké gídang, Ruːtumbí Yallo.