2
Édémpila ngo lékoda gíla nolum méːdírmogemang émna méːséktagbo. 2 Kapéné ngo nolum méːdírmomílo, ngom méːpomopéné séːko dungkan, émpigeːla ngokkolok méːdír paːnékídíngodémíné duːyén? 3 Odok-légaːpé édílo ngo gíyéji, odokké séːkolok ngolu méːpom paːpénamméji, bíkkolok méːdírém paːmaːnam légaːpé édé agomkídíːdém atka. Kapéné nolu appíngé ngok méːpodo méːpomínyé émna, noluk appíngké tayéːlo ngokké méːtinsunamko dung.4 Ngo airuːpé méːdírra, asiné-kila odokké miksé díla nolukkoloːpé adlíkka. Ngo nolum méːdírmopé émna adma émpigeːla ngo nolum éddík aipé-méːdagji édém kinmonam légangé atka.
Imurném Méːyinsubinam
5 Okolai ajjiːko séːkaibí séːkaimé méːdírmokamílo, bí ngom méːdírmomang émpigeːla bí nolum appíngém méːdírmoka. (Ngo bím bojéko lubadge:ma émna sém ludung). 6 Noluk abayangé bím lupagnamdéi bíkképé pínamkopé mokemorammém paːnamé. 7 Émpigeːla suːpag, nolu bím méːyinsubigeːla luyinsulang, édémpimamílo bí airuːpé méːdírbatsupéké. 8 Odok-légaːpé ngo nolum lumolumola ludung, bím noluk aipé-méːnamdém lékoda léngkannang. 9 Kapila ngo nolukkolo:pé adlíkkan émmílo nolu ankaːdo dagrasulaːyén édém ankaːpé, odokké ngok luyírém taddon édém kinpé méːla atka. 10 Nolu séːkaimé méːyinsubimílo, ngoːsin bím méːyinsubiyé. Odokké ngo okkom méːyinsubitagji, oːkai méːyinsupénamko dungngamílo, ngo noluk légaːpé Kiristoké kanggaːlo méːyinsubitagbo. 11 Uiːbí ngoluk tayéːlo akoi paːmaːdopé méːyinsubitag. Kapéné bík méːladuːnamkídíːdém ngolu kinpíngammang.
Toroasdo Polké Méːdírnam
12 Édílo ngo Kiristoké tatpon lutaddém Toroaspé lugoːbikolo gíton, Ruːtumbí ngok légaːpé yabgom síggebidopé ngo paːto. 13 Émgom odoloːpésin ngok asinso méːpo kamangai, kapilaːné ngo ngok bíro Taitasmé odo ríksutomang. Édémpila ngo bulum lutérsugeːla Mesodonia:pé gíto.
Kiristokokki Jikinam
14 Émpigeːla Ruːnémé aipai, séːko ngolum Kiristokolo loːdísém jikidopé lambém léngkanbidag. Odokké ngolukkoki bím appíːloi nampon-romnam kísapé Ruːnébí kinmodag. 15 Kapéné ngolu mopídbikunam odokké yokpénékídíːdok araːdo Ruːnékoloːpé Kiristok nampon-romnígnamdé. 16 Yognékídíːdokképé ngolu simaːlok namnenné-arré. Odokké akelokképé, turnamnok nampo. Séː agersém ilaːpénné séːkai duːnei? 17 Ngolu amikémpé bojéko imang, séːkobulu Ruːnék gomugdém murkong paːnam légaːpé kogola gígodang. Émpigeːla Ruːnébí ngolum mélígnam légaːpé, asinbokkébo arola bík kanggaːlo Kiristoké pagbo kísapé ngolu lugoːbido.