2 Korintia
Korin Taniːkídíːdoːpé Polké Adnam Bornyinané Doːjíg
1
Ruːnéké méːnamno, Jisu Kiristoké mélígnamkopé idopé balennam, Polbí odokké ngoluk bíro Timoti:bí,Korin nogordok kumgodoːpélaː Akayaːdoka Ruːnék taniːappíːdoːpé séː doːjíksém adlígdung:
2 Ngoluk Abu Ruːnébíːla Ruːtum Jisu Kiristobí aséngémna asin-ansíngém nolum bikaːlangka.
Polbí Ruːnémé Aipai Binam
3 Ruːnékoloːpé írroi, séːko ngoluk Ruːtum Jisu Kiristoké Abudéǃ Abubí ayaːné Ruːnébí, séːkobí loːdísém ngolum luyinsudag.b 4 Bí ngoluk appíng ngasodlo ngolum kaːdumsudag, édémpila séːkobulu ngasodlo duːji bulum ngolu aíé Ruːnékolok paːnam kaːdumsunamki luyinsubilaːyé. 5 Kiristoké duːg donamdém kappar ngolu suːpag paːmínnadun, édémíːpé Kiristokoki ngolu luyinsubinamém paːmínyéku. 6 Ngolum méːdírmoduːmílo, édé noluk légaːpé luyinsubinamélang moturbikunamé; ngolum luyinsubiduːmílo, édé noluk légaːpé luyinsubinamé, okodé ngoluk donam lékoné duːgém nolu dododo nolum oijosunamém bidag. 7 Odokké noluk tayéːlo ngoluk akala duːnamdé arodag, kapilaːné nolu kappar ngoluk lédílo duːgém domínkaji, édémíːpé nolu ngoluk lédílo méːpomsin paːmínyéku.
8 Ajonkídínga, Esia mongkédo ngoluk paːnam ngasoddém nolum kinmomaːpé ngolu duːmolíːmang. Ngolu oijosula dunggélangémaːdopé kínggíːné duːgém doto, ngolu turyépé émna méːsumanggaboi. 9 Aropé ludung, ngolu ngoluk asin araːbo sinnémpé méːsudaggaboi. Émpigeːla édémpé kapila ikan émmílo, ngolu aíém méːtinsumaːpé Ruːnémé méːtinsudopé ikang, séːko sinném turmodakkuji. 10 Bí ngolum édé siko lambédokkém mopíttag, odokké bí ngolum mopídbiyé. Bí ngolum mopídbitíyé émna ngolu ngoluk akaːla duːnamdém bíkkolo tolíktag . 11 Kapé noluk kumnamki ngolum kumdumsula duːji. Noluk kumnamém tadbila ngolu gasumko aséngém paːnam légaːpé ngolukképé ila bojérungkoné Ruːnémé aipai biyé.
Polké Méːtenkunam
12 Suːpag ngoluk pugdapé lusunamdé sidéː Ngolu aíé moːpíso kangkanoːpé duːlettag émna ngoluk méːlotsé lukanbidag, Ruːnékolok lenné angunnoːla arolo noluk lédílo aiyyopé duːjonsuka. Moːpísok méːjoːnam kísapé ima:pé Ruːnék binam aséːlo ngolu agerém gerka. 13 Kapéné ngolu noluk pokinmaːnam odokké tatkinmaːnam okkomsin nolukkoloːpé adlígmang. Odokké ngo méːdung, 14 nolu ngolum suːpag kinbínna kinmanggom. Nolu appíngé Ruːtum Jisuk gíladdoku longédo kapé ngolu suːpag noluk tayéːlo lusula:duːji, ngoluk tayéːlo kinna nolusin pugdapé lusuyé.
15 Kapilaːné ngo édém kindagai, ngo nolukkodoːpé gípoːpé méːto, odo nolu lémyikopé ayangém paːyépé émna. 16 Kapéné ngo Judiaːpé gídodok laginamém nolukkolok paːpé méːla, ngo Mesodoniaːpé gídodoːla gíladokudodo nolum gípatpé méːto.c 17 Édílo ngo gípé méngkaji odo ngo méːyaméːsapéi méngkan? Émmaːmílo ngo okkom ipé émna méngkan édém adin-amír kísapéi méngkan, okodém "Éí" émgeːla lédupé "Ma" émkupé émnai? 18 Émpigeːla aroruːpé Ruːnébí aronammé, nolukkoloːpé ngoluk agomdé "Éí" élaː "Ma" manggai. 19 Kapéné Ruːnék Ao Jisu Kiristo, séːkom Sailasbí, Timoti:bí odokké ngo noluk araːlo lugoːbikan, édé 'Éí élang Ma" mangngai, émpigeːla bíkkolo édé loːdém "Éí" daggai. 20 Kapéné Ruːnébí éddíkopé pesula léːbitagji, édébulu Kiristokolo loːdísém 'Éí'. Odokké bíkkoki ngoluk "Amen" émna lunamdé Ruːnémé luyitsunamé. 21 Édé Ruːnébí séːko suːpag ngolumnaː nolum Kiristokolo dagrasumotag. Bí ngolum írtag, 22 bí ngoluk ruːtummé émna ngoluk tayéːlo bík muːorki tubjettag, odokké bík pesubinam appíːdém léngkanbinam légaːpé bík Yalodém ngoluk asin araːbo léngkumnam kísapé léngalíktag.