Lupaːtérnam
13
Sém lutéːla nolukkodoːpé ngok gínamé léumnanépé iyé. Lukanbikuné annyimanggom aumnok lunam tadgelaːpag kébangém baːséglang.a 2 Ngo édílo lékoda gíladlangkula noluk lédílo dungngan, odo ngo nolum lupangka. Suːpag ngok kamaːso ngo lékoda nolum méːpaːmodungkuː Séːkobulu poːpélo paːbém iladungngan odokké séːkobulu paːbém ingasuman, ngok gíladdokudo ngo séːkomsin mémaːyé. 3 Kiristobí ngokkoki ludung émnamsémsin nolum arro émna léngkanpaːyé. Nolum kébaːbaːpé bí siperemang, émpigeːla noluk araːlo bí tordag. 4 Kapéné bím sipereːdo kuruslo pítketo, émpigeːla Ruːnéké tornamno bí turradung. Ngolu bíkkolo sipereːdo, émpigeːla nolum kébaːbaːbinamno ngolu Ruːnéké tornamno bík lédílo duːyé.5 Nolu méːtinsunamdo duːyé-kaːmayé édém kinsudopé, aíém ankaːsulang. Nolukkolo Kiristobí dung émna nolu kinsumaːnei, émmamílo noluk ankaːsunamdo nolu opagletkanei? 6 Ngolu ankaːnamdo opagledmang émna nolu kinyé émna ngo méːtinsuladung. 7 Nolu imurém imaːdopé suːpag ngolu Ruːnékoloːpé kumbidung. Ankaːdo ngolu kapé dagrasutoji édém taniyé kaːyépé émnamang émpigeːla ngolum opagleddopé kaːdaggom okodé kabodagji édém nolu iladuːdopé kumbidung. 8 Kapéné arodok ru:yipé ngolu okkomsin ilaːmang, arodok légangoːpé ngolu ibilaːdag. 9 Édíloi ngolu siperedoji odo ngolu méːpodag émpigeːla odo nolu kínggídag; odokké nolu aitoka émna ngolu kumbila dung. 10 Édémpila, ngo édílo gíyéji odo nolum torpé lula ngok ilang-gílangém léngkanpé lagimayépé émna, ngok kamadoso ngo sémbulum adlígdung, okodém Ruːtumbí nolum aibonam légaːpé ngom bituːji, édém nolum mosalígnam légaːpé bitag momígnam légaːpémang.
Bitérnam Asin-aséːdé
11 Ajonkídínga, léddarso, aipé ilednammém malang, ngok kumpaːnamsém tadlang, asin lékolduːlang, ansíːpé duːlang. Odokké ayaːnélaː ansíné Ruːnébí noluk lédílo duːyé, saː aipéǃ
12 Angunné dosukki akon akoném asin-aséngém bilang.b