1CO 8

Ui:lok Joːsag

Suːpag ui:lok jo:sag do:yíːdéː Ngolu kindag ngoluk appíngkéi kinnamé dung. Kinnamdé guːtunsumodag, émpigeːla aya:dé ngoluk méːjígém kínggímodag. 2 Séːkaibí oːkaiko kindag émna méːsumílo bí okkom kinpénammén édéméi bí kinma:da. 3 Émpigeːla Ruːnémé aipé-méːné taniːdém Ruːnébí kindag.

4 Édémpila, uiːlok joːsag donam doːyíːdéː Séː moːpíso ílíːmoimadé okkosinmang odokké Ruːné bojéruːngko kamang, akkongko dung émnamdém ngolu kindag. 5 Moːpíso manggom tayéng-amoːto ruːné émna gognam ruːné kadupé, aropésin ruːnéla ruːtummé bojérungko dung 6 émgom ngoluk légaːpé Abu Ruːné akkongko dung, séːkkolokké appíngé lenkang odokké sék légaːpé ngolu turradun; émgom Ruːtummé akkongko dung, bí Jisu Kiristobí, séːkkokki appíngé lenkan odokké séːkkokki ngolu turradun.

7 Émpigeːla appíngé édém kinmang. Ake taniyé suːpésin ílíːmoimangém kumna duːnamé édílo bulu joːsagém dodoji, odo bulu méːdag uiːlok tosagnam joːsagém dodung émna. Odokké buluk méːloddé kínggíːmaːnamé, bulu suakang émna méːdag. 8 Donamé ngolum Ruːnéké kéraːpé gíaːbomang; odokké ngolu domamíloːsin aiyamaːnépé imang, odokké ngolu domílosin aiyaːnépé imang.

9 Émdaggom ansulang, nok méngkamdémpéi gernam agerdé méːjíksunamno siperenékídíːdok légaːpé lésutsunampé ipélagimang. 10 Kapéné séːkai siperené méːlotkanékoné nom ílíːmoimang kumli:lo joːsag doladuːdopé kaːmílo, bímsin uiːlok joːsagém dolaːdag émna léngkannam agerpé imayélang? 11 Édémpé édé méːjíksunamno siperenédém, sék légaːpé Kiristobí sibikan, bím noluk kinnamdé momíkpagdag. 12 Édílo nolu noluk bírrangkídíːdok kekonpé paːbém ila buluk siperené méːloddém tubjoksumodon, nolu Kiristoké kekonpé paːbém idag. 13 Odok-légaːpé ngo okkom dodoji édé ngok bírodém paːblo obutsumomílo, ngo édíloːsin adiném dogemang, édémpé ngo bím obutsumogemang.