Méngkésunékídíːdok Araːdo Kasari:lo Kébaːbaːmínsunam
6
Noluk akonké séːkkaiké lédílo lukerkaːmínsunamko kamílo, méngkésuné taniːloːpé gímaːpé méngkésumaːné taniːloːpé gíla kébaːbaːmonamdé kínggín bottén imurko. 2 Angunné taniːkídíːdé moːpísém kébaːbaːyé émnamdém nolu kinma:nei? Odokké nolu moːpísémméi kébangém baːmílo, nolu édé ajji-ariné agomkídíːdém kébaːbangkinmaːnei? 3 Ngolu tayéng-yaːmekídíːdém kébangém baːyé émnamdém nolu kinmaːnei? Émpém séː ayírsok agomkídíːdé émmumémínǃ 4 Sémpin lukerkaːmínsunammé noluk araːdo lenmílo, nolu édémbulum kumgoloːpé gíman méngkésumaːnéloːpé gíla kébangém baːségmoyénei? 5 Nolu anyisuyépé émna ngo sém ludung. Noluk araːdo méːjoːné aːkosinei kaman séːko méngkésunékídíːdok araːdo kébangko baːsarbilaːné? 6 Émpige:la méngkésunékoné méngkésunékolok kekonpé méngkésuman migomkídíːdoːpé kébaːbaːmunsukolo gídagǃ7 Noluk araːdo kébaːbaːmunsunné kadumílo, nolum motaptagbo émna nolu kinnabong. Kapila imurnamdém oijosula duːlaman? Kapila yadmíkosula duːlaːman? 8 Émpigeːla nolu aíkídí:dé yadgodag odokké imurém idag, odokké nolu édém noluk bírrangkídíːdém iladung. 9 Aiman taniːkídíːdé Ruːnék migomdodoːpé gíaːlamang émnamdém nolu kinmaːnei? Yatkosuyokː Langgoné manggom, uiːkumné manggom, benggoːné manggom, langkosuné-milbongkídíːdé manggom, néːnéng-milbomilbong laːmínsunékídíːdé manggom 10 dopsoné manggom, amikpirtané manggom, tínguri manggom, lugégégoné manggom, rodgoné Ru:néké migomdokodo gíamaːyé. 11 Odokké nolukkodok akke édémpé innai. Émpige:la Ru:tum Jisu Kiristoké aminkilaː Ruːnéké Yaloki írpubinamkilaː naremopubinamki suːpag nolum imurkamaːné émna saptagbong.
Langgonam
12 "Appíngéméi ngo ilaːdag," émpigeːla appíng agerdé aibonémang. "Appíngéméi ngo ilaːdag," émpigeːla ngo okodoksin pagbopé imaːyé. 13 "Donam légaːpé akidé odokké aki légaːpé donamdé," émpigeːla Ruːnébí annyidéméi momígyé. Amírsé langgonam légaːpémang, émpigeːla Ruːtumké légaːpé, odokké Ruːtumbí amírsok légaːpé. 14 Ruːnébí bík tornamki Ruːtummé sikodokkém turmotoku, odokké ngolumsin turmoyéku.
15 Noluk amírdé Kiristoké amírdok légílaggíngé émnamdém nolu kinmaːnei? Émpém ngo Kiristok amírdok intakko bomna bengkosunélok lédíloi lékomoyén? Édíloːsin lékomomaːyéǃ 16 Nolu kinmaːnei, séːko bengkosunékolok lédílo bí aí lékomodoji bí bík amírdo lékopé ipagdag? Kapéné édém lutag, "Annyidé lékola adin-amír akopé iyé."a 17 Émpigeːla séːko bí aíém Ruːtumké lédílo lékomotagji, bí Ruːtumké lédílo yalolo lékko.
18 Langgonamnokké duggélang. Akon paːb appíːdém taniːkoné bík amírdok ruːyipé idag, émpigeːla séːko laːnam paːbém idoji bí bík aíké adin-amírdok kekonpé paːbém isudag. 19 Noluk amírdé Angunné Yaloké kumli:ko émnamdém nolu kinmaːnei, séːko nolukkolo duːji, séːkom nolu Ruːnékolok toríksutagji? Nolu noluk aíékésumang; 20 nolum arékokki rétag. Odok-légaːpé Ruːnémé noluk adin-amírki ménggésulang.