Langgonammé Kumgodém Suamodag
5
Noluk araːdo langgoné dung émnamdém ngolum lupaːbitag, édémpinné langgoném uiːkumnékídíːdok araːloːsin pangkímangː Taniːkoné bík osang-anédém laːladung.a 2 Odokké nolu pugdapé méːsuladungǃ Nolu édém tadla méːdírpénammangnganei? Odokké édémpé iladuːné taniːdém noluk araːdokké laːpakpénamaːmín. 3 Ngo adin-amírro noluk lédílo duːmínmanggom ngok yallo noluk lédílo duːmínnadung, odokké séːko édémpé iladuːji, ngo noluk lédílo duːmínnampé, bík tayéːlo ngok baːpénam kébangém baːtobo.b 4 Édílo nolu ngoluk Ruːtum Jisuké aminno gíkumsudon ngok yallo noluk lédílo duːmíndag, odokké ngoluk Ruːtum Jisuké tornamé odo duːdag. 5 Édé taniːdém uiːké alaglo tolíktok, odo bík adin-amírdém momígyépé odokké Ruːtumké longédo bík yalodém moturbiyépé.6 Noluk pakkínépé méːsunamdé aimang. Kaːr ajjioːdéi pitang appíːdém mormodag émna nolu kinmaːnei?c 7 Paːblok akuné kaːrdém nolu laːpagruːpénamé, odo nolum narémoyé. Odo nolu kaːrkaman pitangémpé iyé-nolu arorupéi édémpinné. Kapéné Kiristomé, ngoluk Gíboːla donam meːr-aoːdém, palíktagbo. 8 Odok-légaːpé, ngolu kajé gíːdíːdém méːpola domannai, akuné kaːrdokkimang, makraminélaː aimaːnédokkimang, émpigeːla kaːr lígmaːnam pitaːdokki dolai, okodé ainamélaː aro pitangén.d
9 Langgoné taniːyém jonsuyok émna nolukkoloːpé ngok adnam doːjígdo ngo adlíkka; 10 émpigeːla séː moːpísok langgoné, amikpirtané, odokké rodgoné, moimang-kumné, bulum ajjiːkosin ngo lumang, émmaːmílo nolu moːpísok ruːyipé duːpé lagiyé. 11 Émpigeːla ngo nolukkoloːpé suːpag adlígbidung, séːkai Kiristomé méngkésuné bíroko émna lusugeːla, bí langgola, amikpirtala, moimang kumna, pamunsugola, tínggola, rodgola duːmílo bím duːjonsuyok. Odokké édémpiné taniːdém doːjonsinsuyok.e