Kiristoké Mélígnamkídíng
4
Édémpila, taniyé ngolum Kiristoké pagbo kísapélaː séːkom Ruːnéké kinpílaːmaːnam doːyíngém tolígnam tani kísapé kangkinpé lagidag. 2 Suːpag séːkobulum agerdém tolíktuːji, bulu aroné taniyé émnamdém léngkanbilaːpé lagiyé. 3 Émpigeːla ammelang nolu ngom okko émna sabdoji édé ngokképé émmumné agomé. Ngo aíémsin okkosin émna méːsumang. 4 Ngok méːloddé narédag, émpigeːla édé ngom okkomsin kinman taniːpé imomang. Kapilaːné Ruːnébí ngom kindag. 5 Odok-légaːpé tolígnam ayírdé aːmaːdapé, séːkomsin kébangém baːyok; Ruːtumké gílatkunamdém toyapoːto. Okodé kémodo léːsila duːji bí édém píaːdoːpé laːlenyé odokké taniːké asinbo méːladuːnamém léngkanambiyé. Odo ayírdo ako akopé appíngé Ruːnékolok luyitsunamém paːyé.a6 Ngok ajonkídínga, noluk légaːpé ngo séː appíːsém Apolloskoloːla ngokkolo líktag, ngoyik anyém kayísunam kísapé lukandung, édémpimílo lunamdok légíːdé okkon édém nolu kinyé, "Kaboné ibonanékídíːdém kangablang." Nolukkolok séːkosin taniːkolok tayéːlo pugdasula akoném sappakpé lagimang. 7 Séːko nolum séːkai akonkémyang bottéyanémoton? Noluk kanam appíːdé Ruːnék binammaːnei? Odokké édém nolu bíkkolok paːtuːmílo, kapila nolu pamangarnémpé pakkín-séuːom modon?
8 Noluk laginam appíngém nolu paːtagboǃ Nolu mirém-rémkutsula duːboǃ Ngolu ka:témaːpé nolu migompé ikangǃ Aidag, nolu migomé émna ngo méːlígdung, édémpila noluk lédílo ngolu migompé dotélaːyé. 9 Ngok méngkípé, ngolu séːkobulu mélígnammén, Ruːnébí ngolum mokekolo gíbonam kérédok appíːdok léddarpé dagmotag. Édémpila ngolu moːpísok, tayéːyaːmekídíːdok odokké taniːlok kaːmanam kísapé ikang. 10 Ngolu Kiristoké légaːpé makkornépé idung; émpigeːla nolu Kiristokolo airuːpé méːjoːnéǃ Ngolu kínggíːmang, émpige:la nolu kínggí:dag! Ngolum sappagdung, émpigeːla nolum ménggésudung! 11 Suːpakké ayírkídíːso ngolu kénotí:lí:ladung, ngolu bedné galuk-gasorém géladung, ngolum díːmígdíːsíktag, ngolukké dungko kamang. 12 Ngolu ngoluk aíké alakki kínggí:pé agerém gerdo. Édílo ngolum pelígdogji, ngolu kumbido; édílo ngolum ipusiredoji, ngolu édém oijosuladuːdo; 13 édílo ngolum luka:doji, ngolu ansíngo:pé lulatsudoku. Suːpakké séː ayírso:pé ngolu mo:disok namjernépé idung, moːpísok lagimaːnam taniːyé.
14 Nolum anyisumopé émna ngo sém admang, émpige:la ngok méːbomsunam ommang kísapé luyírkopag adlígdung. 15 Nolukké kíla-kíngabla:ma:namko Kiristokolo kaːsíbinné dunggomsin, nolukké bojérungko abbo kamang. Kapéné tatpon lutaddoki ngo Jisu Kiristokolo noluk abupé ikang. 16 Édémpila ngo nolum ngom kaːyisutoka émna lumo-lumola ludung. 17 Odok-légaːpé ngo Ruːtumkolo aroné, ngok méːbomsunam ao, Timotimé nolukkoloːpé mélígdung. Ngo Jisu Kiristoké lambélo kapé gíladuːji, okodém lékola ngo appíng kumgolo luyírbidoji édém bí nolum méːpaːmoyéku.
18 Ngo nolukkodoːpé édíloːsin gíkumaːyebo émna méːla nolukkodok akke airuːpé pugdasuladung. 19 Émpige:la Ruːtumbí ayaːmílo, ngo nolukkodoːpé lomgorra gíyé, odokké ngo pugdasun taniːkídíːdok lunamoːdém malenoːmaːyé, émpigeːla buluk tornamdémsin malenyé. 20 Kapéné Ru:néké migomdokodé agom lunamoːloːmang émpige:la tornamnoːmín dun. 21 Nolu okodém méːyaːladun? Nolukkodo:pé ngo yogírko bomna gídopéi méːladun, émmaːmílo, ajjíːsuné yalolok ayaːloi gídopé émna méːladun?