Ruːnék Pagbo
3
Ajonkídínga, ngo nolum yalolok méːjubné taniyé émna lula:mang. Nolu séː moːpísok taniyé émna ngo lupé ikang, odokké nolu Kiristokolo koːkaːpé iladung. 2 Ngo nolum gakírém sunka, apin-oyingém domomangngai, kapilaːné nolu édém dolamanggai. Odokké suːpésin nolu édém dolaːmaːpé iladung, 3 kapilaːné nolu suːpésin adin-amíríːro turradung. Noluk araːlo nékaːmínsunammé odokké pamínsunamé duːtídung, émpigeːla nolu adin-amírrok taniːmang, nolu émmumné taniːémpé séumoladun. 4 Kapéné édílo akoné ludon, "Ngo Polké," odokké akondé ludag, "Ngo Apolloské," odo nolu émmumné taniːpé imaːnei?5 Apollosbí séːkon? Polbí séːkon? Bulum ako akopé ager-gerdopé Ruːnébí tolígmumnammé, bulukkoki nolu méngkésuto.a 6 Ngo ammodém lelíkka, Apollosbí assém pílíkka, émpigeːla Ruːnébí édém míːtamoto. 7 Édémpila séːko lelíkkaji odokké séːko asi pílíkkaji bulu okkosinmang. Émpigeːla Ruːnébí atéroːdé séːko édém míːtamotoji. 8 Séːko lelíkkaji odokké séːko assém pílíkkaji bínyik asin-méːnamdé lékkodag, odokké aí aíké ager-gernam kísapé bínyi amaném paːyé. 9 Kapéné ngolu Ruːnéké ager-gerjoné; nolu Ruːnéké arígdé, Ruːnéké monam okumdé.b 10 Ruːnék binam aséːdokki, ngo mokinné okum-moné tani kísapé aksaːto, odokké séːkai akoné odok tayéːdo agbomdung. Émpigeːla kapé bí agbomdun édém appíngé ansupénamé. 11 Kapéné séːkosin aksaːnamdok ruːyipé aksanamkoda aktennakumaːbo kapilaːné Jisu Kiristobí édé aksaːnamdé.c 12 Suːpag séːkai édé aksaːnamdok tayéːlo aínki, murkongki, aipé arékané ílíngki, ísíngki, taséki, noraki agmílo, 13 bí oko agerém gertagji édém kaːbegamyé, kapéné Kiristoké Longédo édém píaːdo léngkanbiyé, kapilaːné édém umíki ankaːla taniːdok agerdém léngkanbiyé. 14 Bí okkom aktagji édé duːyarmílo, bí amaném paːyé. 15 Édém ukpagmílo, bíkké yogamyé, émgom dorné umí araːdok dukpítsunam kísapé, bí bím aíém motursuːyé.
16 Nolu Ruːnék kumli:dé odokké Ruːnék Yalodé nolukkolo dung émna nolu aíé kinsudoyé? 17 Séːkai Ruːnék kumli:dém momígmílo, Ruːnébí bím momígyé. Kapéné Ruːnék kumli:dé angundag, odokké édé kumli:dé nolu.
18 Édémpila séːkosin aíém aíé yatsuyok. Noluk araːdo séːkai séː ayírsok airuːpé méːjoːné taniːyé émna méːsumílo, bím makkorné taniːpé imotok, odo bí méːjoːné taniːpé iyeku. 19 Kapéné séː moːpísok méːjoːnamdé Ruːnékolo okkosinmang. Édém adla léːtag, "Bí méːjoːném buluk kinnamnoːpag sogabdag," 20 odokké okolai lutag, "Méːjoːnékídíːdok méːladuːnamkídíːdé arrékamang émna Ruːtumbí kindag."d 21 Édémpila, séːkosin taniːlok tayéːlo pakkíné émna méːsuyok. Kapéné appíːdéi nolukké, 22 Polbí, Apollosbí, Kepasbí, moːpíséː, turnamséː, sinamdé, suːpag, aːpéné ayírdé, appíːpagdéi nolukké, 23 odokké nolu Kiristoké, odokké Kiristobí Ruːnéké.