1 Korintia
Korintia Taniːkídíːdoːpé Polké Adgotpoːnam Doːjíg
1
Kiristo Jisuké mélígnamkopé idopé Ru:néké méːnamno gognam ngo Polbíːla ngoluk bíro Sostenesbí,2 séː doːjíksém Korindok duːné Ru:nék taniːkídí:doːpé, séːkobulum Kiristo Jisukolo naréːmopumobitang, odokké angunndopé goktang, buluk lédílo séːkobulu appíːloi bulukkélaː ngoluk Ruːtum Jisu Kiristoké aminém goktinsudagji bulukkoloːpé adlígdungːa
3 Aséngéla asin-ansíngé ngoluk Ruːné Abukolokkélaː Ruːtum Jisu Kiristokolokké nolukkolo dungka:langka.
Aipai Binam
4 Ngo loːdísém noluk légaːpé bRuːnémé aipai bido, kapilaːné bí nolum Kiristo Jisukolo aséngém bitag. 5 Odokké bíkkolo nolum appíːloi mirémrémkutsumola léːtag- noluk agomnoːla noluk appíng kinnampaːnamno- 6 kapila:né nolukkolo Jisum ngoluk lukanbikunamdém arro émna léngkanto. 7 Nolu kapé ngoluk Ru:tum Jisu Kiristomé léngkanbinamdém toya:la duːnammé, yalolok amandé nolukkolo aːkosin pí:rammang. 8 Bí nolum gítérdoːpé kínggí:motíyé, édémpila nolu ngoluk Ru:tum Jisu Kiristoké gíladdoku longédo imurkaman taniːpé iyé. 9 Ru:nébí arodag, bí nolum bík Ao ngoluk Ruːtum Jisu Kiristoké lédílo ngolum duːjonsudopé goktag.c
Kumgodo Angu-angusula Duːnam
10 Ngok ajonkídínga, ngo nolum ngoluk Ru:tum Jisu Kiristoké aminno kumdanna ludung, noluk appíngké araːlo lékola duːla:dopé noluk méːnamkídíːdo lékolang, édémpimílo noluk araːlo angumínsunammé kamaːyé odokké odo noluk asinélaː noluk méːloddé aroruːpé lékoyé. 11 Ngok ajonkídínga, noluk araːdo geːmínpamínsunné kadung émna Koloeké éraːtaniː ékké ngom lubitag. 12 Ngok lunamdok légíːdé séː nolukkolok akoné, "Ngo Polké," akondé, ngo "Apolloské," akke, ngolu "Kepaské," odokké ngolu "Jisu Kiristoké," lédulok gímínné émna lusudag."d 13 Kiristomé mopansutagnei? Noluk légaːpé Polmé kuruslo pítkekanei? Nolu Polké aminnoi baptisém langkan?
14 Kirispaskélaː Gaiaské ruːyipé nolukkolok séːkomésin ngo baptisém bimanam légaːpé eaipai bidung. 15 Édémpila ngok aminno baptisém bika émna nolukkolok séːkosin lusulaːmang. 16 (Ngo Istepenaské okum-érangémsin baptis bika; odok ruːyipé séːkaimé baptis bikkéisong édém ngo méːpangkuma.) 17 Kapéné Kiristobí ngom baptis bidopé mélígmang, émpigeːla tatpon lutaddém lugoːbidopé mélíktag, odokké édémsin tani:lok méːjoːnamki ludopémang, ékímaːmílo Kiristoké kurusdok tornamdé émmumpagyé.
Kiristobí Ruːnéké Tornamdéːla Méːjoːnamdé
18 Yognékídíːdokképé kurusdok doːyíːdé makkorné agomé, émpigeːla ngolukképé séːkobulum moturtakkuji édé Ruːnéké tornamé. 19 Kapéné sémpé adla léːtagː
"Méːjoːnélok méːjoːngém ngo momígyé;
odokké kinjubnélok kinnamdém ngo anyisumoyé."f
20 Méːjoːnékídíːdé okolan? Kinnépaːnékídíːdé okolan? Séː moːpísok lujolulabjoːnékídíːdé okolan? Moːpísok méːjoːnamdém Ruːnébí makkornépé imomaːnei?
21 Kapéné Ruːnébí bík méːjoːlo taniːyém buluk méːjoːnamki bím kinnanamdém paglaːmanam agerpé ito. Émpigeːla ngoluk lugoːbinam makkordag émna lunam doːyiːsokki, séːkobulu bím méngkésuyéji, Ruːnébí bulum moturbipé émna méːséktag. 22 Jiudiyé kanggodém odokké Girik taniyé méːjoːnammém madag, 23 émpigeːla ngolu kuruslok pítkenam Kiristomé lugoːbido, édé Jiudiképé lésutsunamé odokké Jiudimaːnéképé makkorné agomé, 24 émpige:la Jiudiémnaː Girik annyipagdém, sé:kobulum Ru:nébí goktakkuji, bulukképé Kiristobí Ru:néké tornamdéːla mé:joːnamdé. 25 Kapéné Ru:nék makkordé tani:lok mé:joːnamdémyang kinyaːnammé, odokké Ru:nék siperenamdé taniːlok kínggínamémyang kínggíya:dag.
26 Ajonkídínga, édílo nolum gokkaji édém méːpaːtok; moːpísok taniːkísapé nolukkolok bojékoné méːjoːné taniːmangngai, bojékoné amin-gígéné taniːmangngai; bojékoném kanésíːné éraːlo onamangngai. 27 Émpige:la méːjoːnékídíːdém anyisumonam légaːpé Ru:nébí moːpísok makkornékídíːdém balento, kínggíːnékídíːdém anyisumonam légaːpé Ruːnébí moːpísok siperenékídíːdém balento. 28 Moːpísok arékanékídíːdém arrékamang émna sappagnam légaːpé, Ruːnébí moːpísok ajjipagyaːnémna tayumnam, séːkké arré kamaːji, bulum balento. 29 Odo sé:kosin bík kanggaːdo pakkíné émna mé:sumayépé.g 30 Kiristo Jisukolo bí noluk turnamdém pangkodé, séːkom Ruːnébí ngoluk méːjoːnampé, ngoluk arolok-duːnampé, ngoluk angunnampéla ngolum répídbikunépé imoton. 31 Odok-léga:pé, édém kapé adla léːtuji, "Sé:kobí pakkíné émna méːsudoji, bí Ruːtumkolo pakkíné émna méːsulang."h