Polbí Rumpé Gínam
27
Odok lédupé ngoluk Italiːpé koːla gínamdém ruːsékto, Polmélaː akon makanaːlok léːnam tani:ékkém Julias émnam língko-opisardok alaglo tolíkto, bí Kaisarké rejimendo maglí:lok opisarkai. 2 Adramaitiamdokké ko:né bottén-ollungkolo ngolu saːto. Édé Esia mongkédok gaːné lambédok rago-ragodok koːla gíyé émnamai. Tisolonia nogordok Mesodoniaːtani Aristarkasbíːsin odo ngoluk lédílo dungngai. 3 Longkondo ngolu Sidonpé kongato; odokké Juliasbí Polmé ayaːla, bík laginammém bidopé bík ajonkídí:do:pé bím gídopé mélíkto. 4 Odokké bottén-olluːdém sankunammé ésardé sarradla sarnamé ngolu Saipras bogléːdok sartaransukodok koːla gíto. 5 Odokké Silisiaːdoglaː Pampiliaːdok kéraːdok gaːnédém koːpadla Lusiaːdok Mairado gíito. 6 Odo língko opisardé Alegjendiriadokké Italiːpé koːla gíné bottén-ollungko paːla odo ngolum saːmoto.7 Édílo ngolu bojéruːngkopé lagigéla aso-asoːpé aipé duːgla koːla gíla Kinuduspé ko:píto. Odokké ngolum ésaré koːbadmomanammé, ngolu Salmonidok kekonké Kiriddok sartaransukodok koːla gíto. 8 Ngolu airu:pé ngalatsula ragoragodok koːla gíla Lasia taondok kéraːpé Kayum émnam gulidoːpé kongato.
9 Édémpé bojéru:ngkopé ayírém du:mítsula olluːlo koːla gínamdéːsin airuːpé pésopénampé ikangaːboi, odokké odoloːpé Mennaa Duːnam Gíːdídéːsin gíngabdaggaboi, édémpila Polbí bulum lupaːto. 10 ''Ajonkídínga, ngo kaːpa:dung, ngoluk ko:la gínamsé ajjikosin soːlné agommang, sidé olluːsémna sok ko:bomnam attar appíːdém jíːbudmoyé odokké ngolusin turpélang." 11 Émpige:la língko opisardé Polké lunamdém tadmaːpé, keptendoglaː ollu ruːtumdok agomém tadla ollu:dém koːyarto. 12 Kapila:né édé guliːdo dígínno duːpé airuːpé kaboːjibomangngai, édémpila abayaːdé koːyarra gípé lagidag émna tolíkto, Poinikspé kappouji koːpí:la dígíndém odo duːpé émna bulu akaːsuto. Poiniksdé Kiriddok guliːkai okodé pékí-oaːpéla péyaːoaːpé pékadaggai.
Bottén Ésardé
13 Édílo péyabokké ésaré aso-asoːpé sarsangka:ji, odo bulu mé:to buluk laginamdém paːtobo émna; édémpila bulu longgorkídíːdém laːsaːlangkula Kirit ragodok ko:la gíkang. 14 Émpigeːla asudouko lédouːpé tempídokké bottén ésarko sartogdo, okodém dagdung ésar émdon. 15 Ngoluk ollu:dém ésardé paːnamé, olluːdé ésardo koːlaːmaːpé ikang; édémpila ngolusin kongasuto, odokké ésar sarkam sarkampé olluːdém sarbomoto. 16 Ngolu Kouda émnam ajjiːgamné bogléːdok ésar sartaransukodok koːpadla gíla duːdodo. Bottén-olluːdok duːné koːyuksula gípagnan ajjiné olluːdém airuːpé ngalatsula busatoku. 17 Édém busanam lédupé bulu kappouji bottén-olluːdém kéígbokkébo ríbíki ragrato, odokké olluːdé Sartis émnam sulliːdém tubrasupéké émna pésokang, édémpila bulu longgorém méilígla olluːdém koːsula gímoto. 18 Édílo ésardé bottéyaːpé sarra olluːdém kungékungkurmoton, longkondo rébbonam attarkídíːdém bulu gépagledbomkang. 19 Odokké loumné longédo, bulu aíké alakki olluːdok etsíːmosínanékídíːdém gépagamto. 20 Bojérungːkopé ésardé saryartíla odokké mukkangé yí:lubla duːla lonngém doːnyém yummém takarém kaːpaːmaːla, ngolu turyépé émna méːsumangngaboi.
21 Taniːkídíːdé arai-araiːpé doma-tíːmaːpé duːnamé, Polbí buluk kéraːpé gíningeːla lutoː ''Ajonkídínga, nolu ngok agomém tadla, Kiriddokké koːla gímanamkam, ngolukké siddíko ngasodélaː ajukangé aːmaːyai. 22 Émpigeːla su:pag ngo nolum ludung, asiném kínggíːsutok, kapila:né nolukkolok a:kosin sima:yé, bottén-ollungo:sé jíːbudyé. 23 Ngo sék tani:yéji odokké sék agerém gerdoji, édé Ruːnék tayéng-yaːmeko méyum ngokkosoːpé gíla luto. 24 'Pol no pésoyok. Kapila:né no Kaisarké kébaːbangkodo dakkanruːsuyé; odokké Ruːnébí ayaːla nok lédílo nok gíjon appíːsok turnamdém nok alagdo bitag. 25 Odok-légaːpé, ajonkíddínga, noluk asiném kínggíːmotok, kapilaːné ngo Ruːnémé méngkésudag odokké bí ngom okko émna lutoji édémarpé iyerung. 26 Émpigeːla ngolu oːkolai bogléngkolo tuprasupaːyé."
27 Yí:laːpinané yumédé aːdodo, édílo ngolum Endiria gaːnédo yugobomna dungngan; yumédok kídísudodo ollung sanbomnékídíːdé témpíamongé kéranggamdopé anpaːto. 28 Édémpila bulu asidém kíkaːla ka:namé língkokolaː yíːnyí lagduko oːrídopé paːto. Odok ajjiːouko lédouːpé kíkangkunamé yíːnang lagdukopé oːrídopé paːto. 29 Bottén-olluːdé ragodok torné-ílíːlo nérgappéké émna ngolu pésokang, bulu kungkogdokké longgor pípiːko ledyiːlígge:la píanggorkaːlangka émna kumto. 30 Olluːsanékídíːdé ollu:dokké dukpakpé méːla ajjin olluːdém ku:dumdokké méilíto odokké bulu longgor ékkém bottén-olluːdokké méilígdung émna séumoto. 31 Polbí língko opisardémnaː maglíngkídíːdém lubito, ''Séː taniːkídíːsé olluːsok lédílo duːmínmaːmílo, nolu séːkosin turmaːyé." 32 Édémpila maglíngkídíːdé ajjin-olluːdém ragranan ríbíkídíːdém pakínnígla édém asibo yupagbommoto.
33 Porokkododo, Polbí bulum appíngém dora-tíːrasudopé lumo-lumola lutoː Odokké bí luto, ''Gíné yíːlaːpi longéko nolu appíngé toya:la duːla okkomsin doma-tíːmaːpé ménkérépsula dung. 34 Su:pag ngo nolum ajjiːariko dora-tíːrasudopé kumdanna ludung. Turraduːnam légaːpé nolu dolíkpé lagiyé. Noluk tukkudok dumít asongkosin séːkkésin oriːmaːyé." 35 Bík édémpé lunam lédupé, bí pitang ékkém langgeːla buluk appíngké kanggaːpé Ruːnémé aipai bito. Odokké bí édém pentunggeːla doropto. 36 Odo bulu appíngé asiné kínggíːsula aí aíé donam-ékkém dosuto. 37 Édé olluːdok saːla gíné ngolu appíngé líːnyíːkolaː yíːnídlaːkkéngkai. 38 Bulu dolíːnamkopé donam lédupé, olluːdém étsaːmonam légaːpé bulu geu appíːdém gaːnédoːpé éryíngamníkto.
Bottén-olluːdok Jíːbudnam
39 Édílo píangkan, bulu édé moːtagdém kangkintoma, émpigeːla bulu sulli:né pígoko kaːto, pagmílo bottén-olluːdém sulli:do tubrasumopé émna bulu méːto. 40 Édémpila bulu longgorkídíːdém pakínnígla asido mélígamto odokké odo ayírí:do rébatkídíːdém oggabla léːnan ríbíkídíːdém taːsaramto. Odokké ollung-gayindém tonyílígla ragodoːpé ésardém sarbomola gíto. 41 Émpigeːla bottén-olluːdém gaːné baːnyik bidríksukodo saralíkto; odo kuːdumdé sulliːlo tubraːsunamé; olluːdé éngun-étatokumang, odokké siyadé kungkoːdém dírrégmoto.
42 Maglíngkídíːdé makana:lok léːnam taniːkídíːdé baːpítsula dukkupéké émna méːla bulum mokepé méːto. 43 Émpigeːla língko opisardé Polmé mokemolíːmaːla buluk méːla duːnamdém imogemang émna méːsékto. Odokké séːkobulu baːjoːdagji bulu olluːdokké sumyipoːla témpídoːpé baːla gídopé bí lulíkto. 44 Odokké akekídíːdé ollu:dok ísíng atakkomanggom oːkoidaggom odokki lamku lamkudo baːmínna gígopé lulígnammé; ngolu appíngé témpídoːpé baːpítsuto.