Malta:do
28
Ngolu appíngé baːpítsula témpídoːpé pí:saːnam lédupé, édé bogléːdém Malta émtag émna kinto. 2 Bogléːdok taniːkídíːdé ngolum bojéko ayangém léngkanto. Podongé ola duːnamé airuːpé síkírdaggai, édémpila bulu ngoluk légaːpé ummém parbila ngolum appíngém boríksuto. 3 Polbí ísíng ayetko langkumsuge:la umído tílígnammé, umídok gunamdém anpaːla odokké bíkíngko églenna bík alagdo yedgapkang. 4 Édílo bogléːdok tani:kídíːdé tabídém bík alagdo bíkéléːla duːdopé kaːton, bulu akoné akoném luto, "Séː taniːsé taniːmokeru:néko, kapéné bí asiːbokké baːpítsudoggom, Ruːnék aroːkébaːdé bím turpé métoruːmang." 5 Émpigeːla Polbí tabídém umíːdo danyilíkto émgom bí kapisintomang. 6 Odok du:né taniːkídíːdé méːla dungngai Polké adindé bíːsaːyé émmanggom bí bagémpé oala sipagyé, émpigeːla bojéko toyaːla duːnam lédupé okkosin kapisinmaːla; bulu méːladamsukangku odokké bí ruːnéruːngko émna luto.7 Odok kéraːpé bogléːdok gam Pabiliaské aríg-amongko dungngai. Bí ngolum bík okumdo:pé boríksula loumkopé ngolum miboboto. 8 Bík abudé ramna, íːiaki-gíla, ésaːmaːpé ila duːla asubdo kédla dungngai. Polbí bím kangkaːpé gíto, odokké kumbinam lédupé Polbí bík alagdém bím pigabbila bím ésaːmotoku. 9 Odokké édémpé inamé, bogléːdok ésaːman taniː appíːdé gíla kaːpítkosuto. 10 Bulu ngolum aipé ménggésuto, odokké édílo ngolu koːla gítokuji, lambédok laginam attarém ngoluk légaːpé bottén-ollu tayéːdo joːlígbika.
Rumdoːpé Koːpínam
11 Poːlo píum lédupé ngolu Alegjendiriaːdok bottén-ollungkolo sa:la gíto, okodo opem annyíkolok moimangém arrígla léːtag, odokké édé bogléːdo dígíndo koːrasula duːto. 12 Ngolum Sairakiusdo kongalígnamé odo loumkopé duːto. 13 Odokké koːla gíla ngolu Regiampé koːpíto. Odokké longkondo péyang ésardé sarsaːnammé, odok longkondo ngolu Puteoli taonpé píngaːto. 14 Odo ngolu bírrangékkém ríksuto séːkobulu ngolum loːnítkopé buluk lédílo duːmíndopé gokto. Odokké édémpé ngolu Rumdoːpé gípíːto. 15 Odok bírrangkídíːdé ngoluk gípíːnamdém tatpaːsula ngolum ríksukolo Appias Attarkokodokké Mibo-dungko Okum Aumdoːpé gído. Odokké édílo Polbí bulum kaːpaːtoji Ruːnémé aipai bito odokké bík asiné kínggíːkang.
Rumdo
16 Ngolu Rum nogordo:pé gíanam lédupé, Polmé kanggabla duːné maglíngkolok lédílo bím aíké duːlíngkampé duːmoto.
17 Loum longé lédupé bí odok duːné Jiudikídíːdok mirokídíːdém gokkumsuto. Buluk gíkumsula duːdodo, Polbí bulum lutoː "Ngok ménggésunam bírrangkídínga, ngo ngoluk taniːkídíːdok kekonpémanggom ngoluk taːtobuluk ilot-gílodlok kekonpé okkomsin imanggomsin, Jerusalemdo ngom sogabgeːla Rumankídíːdok alaglo bito. 18 Bulu ngom ankaːla kangeːla mélíkkupé émna méːto, kapilaːné ngo sinam pa:nan oko imurémsin imangai. 19 Émpigeːla édílo Jiudikídíːdé lutumton, ngo Kaisarmé kébaːbaːbidopé bolpé kumníkpé ikang, ngo ngok aíké taniːkídíːdok kekonpé oːkai lujémnamko lukolo gímang. 20 Odok légangé ngo nolum luposupé émna gíkumsudopé goglíktag. Israeldok akaːla duːnamdok légangé ngom séː ikolisokki koggaptag."
21 Bulu lulatsutoku, "Ngolu nok gínamsok légaːlo Judiadokké doːjíkosin paːmang, odokké bírrangkídíːsok aːkosin odokké gíkunékídíːdé okkomsin lubikumang odokké nok tayéːlo aiman doːyíngkosin kíbikumang. 22 Émpigeːla do:yíːdé okkan? Édémíng ngolu nokkolok tadlíːdung, kapéné séː opesok kekonpé taniyé appíːlo agom lutaksudung édém ngolu kinpídung."
23 Bulu Polmé longé aːkolo ríksukupé émna ru:sékto odokké bím ríksukkolo bík dungkodoːpé bojéru:ngko taniyé gía:tíkang. Bí roːdokké yummayírdoːpé Musi:ké Luroːdokkémnaː lungor-lunékídíːdok potiném pe:lenna taniːkídíːdém lusarbila Ru:nék migomdokodémna Jisuk do:yingém bulum arop-kinmopé émna ikíto. 24 Bík lubinamdém tadla akke arro émna méːto, émgom akedé méngkésutomang. 25 Odokké Polbí édílo lutér agomdém sémpé lutojiː "Angunné Yalobí lungor-luné Jisoyakokki noluk taːtobuluk doːyíngém nérkíkpé lubinamdé arro. 26 a'Édé taniːkídíːdo:pé gíkang odokké lubita,
Nolu loːdém tadbegyé émpigeːla édíloːsin tatkinmaːyé;
nolu loːdém kaːbegyé émpigeːla
édíloːsin kangkinmaːyé.
27 Kapéné séː taniːkídíːsok asiné kémopakkang;
odokké buluk yerungé tadngasukang,
odokké bulu buluk amigém migjémpakto.
Émmamílo buluk amikki kaːbegyai,
buluk yerungki tadbegyai,
buluk asinki méngkinna gíladyakui,
édémpé inamkaːmílo
ngo bulum ésaːmoyaːkui.'
28 cOdok-légaːpé Ruːnék moturbikunamdém Jiudiman tani:kídíːdoːpé mélíktak, odokké édé lubinamdém bulu tadyé émnamdém, ngo nolum kinmolíːdungǃ Édé agomdém tadgeːla buluk araːdo lékokaːmínsumap ila, odokké gílenamkangku."b