Agripaːké Kanggaːlo Polbí Aíém Lurasunam
26
Odo Agripabí Polmé luto, ''Suːpag no aíké légaːpé lusulaːyepé.''Édémpila Polbí bík alagém lagjungeːlaa bík légaːpé lurasula lutoː 2 ''Migom Agripa, siloké longéso nok kangga:so ngo dagla sé: ngok kekonpé Jiudikídíːdok lujémnam appíːsém lurasupaːla aíém airuːpé ngo tuptakané taniːko émna méːsudung. 3 Kapila:né no Jiudikídíːdok ilot-gíloddémna: buluk lukerkaːmínsunam agomkídíːdém aiyoːpé kinbínna kindag. Odok-légaːpé, ngok lunamsém no tadmiːla tatteika émna ngo kumdung.
4 Ngok ko:kadokkébo ngom ododokké ngo aíké mimoːdo odokké Jerusalemsoːsin kapé duːla-dagla duːji édémbulum Jiudi appíːdéi kindag. 5 Bulu ngom édílailokkébong kindag odokké bulu méːmílo lukansinbila:dag, ngoluk kumnamdok toryaːpagné opedok agomém, ngo Parosi kísapé duːto. 6 Odokké suːpag Ru:nébí ngoluk abukídíːdém lubisunamdok akaːla duːnamdok légaːpé siloké longéso ngok tayéːlo kébangém baːdung. 7 Édé lubisula léːnamdok ilet-gílednamdém akaːla duːnam légaːpé, ngoluk yíːla:nyi opíndé aíké asiném bidanna longé-yummé Ruːnék agerém geryarra dung. Ménggésunam migoma, édé akaːla duːnam agom tayéːlo Jiudikídíːdé ngom lujémdung. 8 Ruːnébí sinném turmodungkumílo, kapila édé agomdém noluk araːso méngkésula:man?
9 bNajarot Jisuk amindok angupé ngo okkom éddíkopé ilaːdang édé appíːdém ipé émna ngoːsin méngkíka. 10 Odokké ngo ngok ipé méːnamardém Jerusalemdo ika. Abín miríkídíːdém tatpaːsugeːla bojéko langunam taniːyém ngo makanaːlo tumka, odokké édílo bulum mokedungan buluk kekonpé ngo:sin tolíkka. 11 Bojékopé ngo murong-okumkolokké murong-okumkoloːpé gíla bulum mokemoramka, odokké ngo bulum bolbodapé Ru:némé lukaːmoka, buluk kekonpé ngok aglíngé umí dorpé dorka, ngo bulum akon moːdumnoːpésin gíla ipusireka.
Jisumé Paːnamdém Polké Lubisunam
(Ager 9.1-19; 22.6-16)
12 Édé ageríːdok légaːpé abíné miríkídíːdok ilang-gílaːdopé do:jíg adlígnamko bomna Demaskaspé gíto. 13 Longé lo:tuːdo, ménggésunam migoma, ngo lambédo gíladuːdodo; ngo tayéːtokkém ladyiné píangko kaːto, do:nyidémsin píayaːnéko, ngomnaː ngok gíjonkídíːdém ladyetto. 14 Ngolu appíngé amoːbo:pé kéttapkang, odokké ngom Aramik agompé lunam gomukko ngo tatpaːsuto, 'Sol, Sol, kapila no ngom ipusiredun? No aíém aíé mojoksudung, kapé soːbokoné bík ruːtumdok jamné esaridok kekonpé léníksudoji.' 15 Odo ngo tauto, ‘Ru:tuma, no sé:kon?' Ru:tumbí lulatsutoku, ‘Ngo Jisubí sé:kom no ipusiredun.’ 16 cSu:pag darobla nok aíké aléki dagrasuto. Nom ager-gerné kísapéla lukanbikuné kísapé tolíkkolo ngo nom léngkansudung. No silo okkom kaːton odokké nom ngo okkom léngkanbiyéji édébulu nok lukanbikupénam agerdé. 17 Ngo nom nok aíːtani odokké Jiudiman taniːkídíːdok alaglokké mopídla léːyé. 18 dBuluk amigém darbodopé, bulum kémolokké píaloːpé, Uiːké alaglokké Ruːnékoloːpé gíladbodokupé, ngo nom bulukkoloːpé mélígdung. Odo bulu imurrok mé:yinsunamémna ngom méːjíksula narédopé balenkunamkídíːdok araːdo dungkoko paːyépé.'
Polké Gernamkídíːdém Lubisunam
19 Édémpila, Migom Agripa, ngo tayé:tok paːnam kangordém tadla, 20 Demaskasdok taniːkídíːdém lugodbipo:to, odok lédupé Jerusalemdoglaː Judiadok appíːlok duːnékídíːdém, odokké Jiudiman taniːkídí:dém méngkutsula Ruːnékoloːpé gíladdokupéla aré kané agerém gerdopé ngo lugo:bika. 21 Édémpila Jiudikídíːdé ngom kumli lottaːdo sogabge:la mokepé émna ito. 22 Émpige:la Ru:nék aséːlo siloké longésoːpé ngo turra dung; odokké botté-ajjiné appíngké kanggaːlo lukanbidung. Oko okodé iyépé émna lungor-lunnélaː Musiːbí lula léːtang odok ruːyipé okkomsin ngo lubadmang. 23 Édé do:yíːdé Kiristobí du:gém doyé, odokké bíːíng sinékídíːdok araːlokké turgotpoːla, bí aíːtaniːkídíːdémna Jiudiman taniːkídíːdém píaːdok doːyíːdém lugo:biyé." 24 Odo Pestasbí Polké agomdém lutumna jéːla luto, "Pol no simaddung, nok bojéruːngko kinnamdé nom simadmodung." 25 Polbí lulatsutoku, ‘‘Airu:pé ménggésunam Pestas, ngo simadmang, ngo okkom luduji édé appíːdé arro odokké lujupsindag. 26 Migomdé ngok lunam appíːsém kinjubla kindag, odokké ngo méːrasumaːpé bím lubisulaːdag. Ngok méngkípé ngok lunam appíːsé bíkképé anu doːyiːmang, kapila:né édémbulum léːsula imangai. 27 Migom Agripa, no lungor-lunékídí:dém méngkésudon? Ngo kindag no méngkésudag.” 28 Odo Agripa:bí Polmé luto, “No ngom siddík lomdannai kiristanpé itoka émna méːdun?" 29 Polbí lulatsutoku, “Lomdaggom aso asoːpéidaggom- noːomang ngok agom lunam tadné sok duːné appíngé, ngom ikolisok kogganamdok ru:yipé ngoggíngkémpé itoka émna Ruːnékolo kumdung." 30 Odo migomdé, amo:ru:tumdé, odokké Barnaisbíːla séːkobulu buluk lédílo tedla dungngaji appíːdé daropkang. 31 Bulu soyardokké gílenkang, odokké édílo bulu luposula dungngaji, bulu luto, "Séː taniːsé sinam paːnamkomanggom makanaːlo tumna léːpénam oko imurkosin imang." 32 Agripa:bí Pestasmé luto, “Séː tani:sé Kaisarmé kumpaːlígmanamkaːmílo, mélenníkkupénamai."