Pestaské Kébaːbaːbinam
25
Édé mongkédoːpé gípí:nam longé loum lédupé, Pestasbí Kaiseria:dokké Jerusalempé gísangkang, 2 okolo abín miríkídí:déːla Jiudi mirokídí:dé bím kaːríksugeːla Polké kekonpé agomém lukanbito. 3 Pestasbí bulum aya:la Polmé Jerusalempé mélígbidokupé, kumdanna lunamko luto. Kapéné bulu Polmé lambédo moaːla mokepé émna ruːsunoːtag. 4 Émpigeːla Pestasbí lulatsutoku, "Polbí Kaiseria:do dung odokké ngo aíésin odoːpé lomdanna gíyé. 5 Édémpila, noluk miro ékké ngok lédílo gímíntok odokké bí oːkai imurko ila léːtu:mílo, édé taniːdok kekonpé lupénam agomkídíːdém olo lulang."6 Bí pi:nyikomanggom íyíng longékopé buluk lédílo duːmíngeːla Kaiseria:pé gítoktoku. Odokké longkondo bí kasarido tedge:la Polmé bík kanggaːdo:pé gíaːbodopé lulíkto. 7 Édílo Polbí dakkansutoji, Jerusalemdokké gítogné Jiudi taniːkídíːdé bím dagyedgeːla bík kekonpé botté-botténé imurém lujémbokang, émpigeːla bulu aːkosin arro émna léngkanbilaːtomang. 8 Odo Polbí aíém lurasula luto, "Ngo Jiudi lurodok, kumli:dok odokké Kaisarké kekonpé oko imurémsin imang."
9 Pestasbí, Jiudikídí:dém méːyumsumolíːla Polmé luto, "No Jerusalempé gísa:la olo ngok kanggaːpé séː agomkídíːsok tayéːlo kébaːsém bangkosulídagnei?"
10 Polbí lulatsutoku, "Ngo su:pag Kaisarké kébaːbangko okumso dagla dung, okolo ngo kébangém bangkosupénammén. Jiudikídíːdém ngo oko imurémsin imang, édém no aíésin aiyopé kinbíndanna kindag. 11 Émgom ngo sinam paːnam oːkai imurko itagmílo, ngo sipénamdém toríksudung. Émpigeːla ngok kekonpé séː Jiudikídíːsok boma:nam agomdé aromaːmílo, ngom buluk alaglo bipé séːkkésin ilang-gílangé kamang. Ngo Kaisarkoloːpé kumpaːlígdung!"
12 Pestasbí bík kéba:nébíngkídí:dok lédílo luposunam lédupé Polmé luto, "No Kaisarmé kumpaːlígdung; édémpila nom Kaisarkolo:pé gíboyé!"
Polbí Migom Agripa:ké Kanggaːlo
13 Longko lo:nyi lédupé Migom Agripabí:la Barnaisbí Pestasmé ménggésula ka:ríksukolo Kaiseriaːpé gído. 14 Bulu odo bojékopé duːto, Pestasbí Polké doːnyíngém Agripaːké lédílo kíjonsuto. Pestasbí lutoː "Peliksbí makanaːdo léːpagnam taniːko dung. 15 Édílo ngo Jerusalempé gítoji, abíné miríkídí:dé:la: midumkídí:dé bík kekonpé bojéko lujémnamém bomaːla gído odokké ngom bím imurnép-sabla mokebidopé bulu mato. 16 Ngo bulum lubika lujémnam taniːdé édíloːpé bím lujémnékídíːdém kaːríksugeːla bí aíké lurasunam ayírko paːmaːyéji bím séːkkaiké alaglo tolígnamdé Rumannok ilot-gílodmang. 17 Édílo bulu ngok lédílo soːpé gímíntokuji, ngo duːrasumaːpé longkondo kébaːdém ba:bila tani:dém gíaːbodopé lulíkto. 18 Édílo bím lujémnékídíːdé daksaːla lutoji, ngok méngkamdémpé bím bottén imur aːkosin lujémtomang. 19 Émpigeːla, buluk aíké kumnam-ager tayéːloːla Jisu émnam siné tani, séːkom Polbí turkangku émna lugoːbila dun odok tayéːdo lukerkaːmínsunamkopag paːto. 20 Édémpin agom tayéːlo édémpila kapé ngo kébangém baːbiyan méːpílaːmaːla; ngo bím tauka no Jerusalempé gíla édé lujémnamkídíːdok kekonpé lusulíːdagnei émna. 21 Édílo Polbí bík agomsém Kaisarbí lusadbidopé kumna luton; odokké édíloːpé bím Kaisarkoloːpé mélíglaːmaːyéji odoloːpé siddung léːpodopé ngo lulíkto."
22 Odo Agripaːbí Pestasmé luto, "Ngo édé taniːdok agomém aíé tatsupé méːdung."
Bí lulatsutoku, "Yampo no bík lusunammém tadbegyé."
23 Longkondo Agripabíːla Barnaisbí, maglíːlok abín opisar odokké nogordok mirokídíːdok lédílo gíkumsuko-soyardoːpé airuːpé gérubomrusugel gíato. Pestaské lulígnamno Polmé odoːpé gíaːbodo. 24 Pestasbí lutoː "Migom Agripa, odokké ngoluk lédílo duːjonsuné appíːloːpé, séː taniːsém nolu kaːtokǃ Jerusalemdoːla Kaiseriaːso Jiudi opín appíːdé ngom kumdanna jéːla lutag, séː taniːsém bojéko turyarra duːmoyok émna. 25 Ngo bíkkolok sipénam oko imurkosin paːtomang, émpigeːla bí bík agomsém lusadbidopé Kaisarmé kumpaːlígnamé ngo bím Rumpé mélíkpé méːsékto. 26 Émpigeːla ngo Ménggésunam Kaisarkoloːpé bík agomsém okkar émna adlíkpén édém mapamaːpé idung.Odok-légaːpé bím noluk appíngké kanggaːpé ngo gíaːbotag, odokké anguruːpé Migom Agripa nok légaːpé gíaːbotag. Édémpila suːpakké tadlennamsok tayéːlo ngo oːkai adlígnamko paːyé émna méːdung. 27 Kapilaːné ngok méngkípé makanaːlo léːnam taniːkoném nérkíkpé lujémnamko bík kekonpé kaːmamílo mélígnamdé mélígmurdag."