Amo:ru:tumdok Kangga:lo Polmé Kébaːbaːnam
24
Longok du:nam lédupé abíngaryan mirí Ananiasbí midum ékkémnaː Tartullas émnam ukilko bík lédílo gíjonsula Kaiseriaːpé gítogdo, bulu gíla Polké kekonpé lujémém amoːruːtumdok kanggaːdo lukanbito. 2 Édílo Polmé gogaːtoji, Pelikké kanggaːdo Tartullasbí Polké kekonpé lujémnamdém lukanto,"Airuːpé ménggésunam migom, no migompé dola duːdakso ngolu arai-araiːpé méːpoménganna dung, odokké no ngoluk séː réngamsoːpé yampo:ro:kém méːnobila bojéko agerém angumotoku. 3 Ngolu sém appíːlo odokké appíng ayírro méːyumsudung, odokké ngolu nom asin aːpíki aipai bidung. 4 Ngo nok ayírém bojéko langgemang, édémpila ngok andéngoupé lunamsém tadmiːla tatpoːtei. 5 Séː taniːsém ngolu silekopé paːto, séːko mo:písok appíːloi Jiudikídíːdém urradamoto odokké bí Najarot opedok mirodé. 6 Bí kumli:démsin suamopé émna inamé, ngolu bím sogapto. 8 Bík kekonpé ngoluk bomaːnam lujémnamkídíːsok aronamdém, bím taukaːnam lédupé no aíésin kinsulaːyépé." 9 Jiudikídíːdéːsin lékkopé lutémínna Polmé lujémnam appíːdé arro émna tolíkto.
Pelikské Kangga:lo Polké Lurasunam
10 Odokké édílo amoːruːtumdé bím agom lulayépé émna pakílígnamé, Polbí lulatsutoː
''No bojéruːngokopé séː réngamsok tayéːlo kébaːmigompé ila dung émna kinpaːla, ngo méːpodanna ngok aíképé lurasudung. 11 Ngo Jerusalempé kumkolo gínamdé silokolokké yíːla:nyí longékopé idagong, odok arodém no tadlennaːyé. 12 Odo ngom lujémnékídí:sé kumli:do, murong-okumdo, nogordomanggom sé:kkaikokki ngok lumínsunammanggom lu:urrígnamko bulu pangkímang. 13 Odokké bulu nom ngok kekonpé okkom lujémduːji édé arro émna léngkannamang. 14 Émpigeːla Ruːtumké Lambédém okodém bulu aiman lambé émna sabdagji, nok kanggaːlo édé lambédé aro Lambé émna ngo lusudung; odogíngki ngo ngoluk abukídíːdok Ruːnémé kumdo; odokké oko agomkídíːdém luroːdoːlang lungor-lunékídíːdok potindo adla léːtuːji édé appíːdém ngo méngkésudo. 15 Odokké arolok-duːnélaː arolok-duːmaːné longéko lékod-turyeruːngku émna okodém bulu akaːla duːji, Ruːnékolo ngoːsin édémíng akaːla dung. 16 Édémpila ngo lo:dém Ruːnék kanggaːloːla taniːlok kanggaːlo méːmur kamaːné méːloddém mépé émna itído.
17 Bojé dítak lédupé ngo aíké taniːkídíːdém séur-amandémnaː kumliːdo tosagnamko bikolo Jerusalempé gíka. 18 Édém idodo bulu ngom pídesula duːla napínaréngoːpé duːdopé kumli:do paːto. Ngok lédílo bojéko taniyé odo kamangai odokké ngo séːkomésin urradmomang. 19 Émpigeːla Esia mongkédok Jiudi ékké odo dungngai, séːkobulu silo nok kanggaːso dakkansupénammé, odokké ngok kekonpé bulukké oːkaiko kamílo nom lukanbipénammé. 20 Émmamílo édílo ngom Kiːni-kéba:do kébangém bangkaːji odo oko imurém paːton séːkobulu sido duːji bulu lubipaːyé. 21 "Sikolokké lékod-turkunam agom tayéːdo silo nok kanggaːlo ngom kébangém baːdung." Séː agom apirséːai okodém ngo jéːla lutoːji odok ruːyipé okkosin kamangai.
22 Émpigeːla Peliksbí Ruːtumké Lambédok agomdém aiyopé kinnamé, kébaːdém bangasuponggeːla luto. ''Édílo komandar Laisiasbí gípí:yéji, odo ngo noluk agomsém ruːségbipé.'' 23 Bí língko opisardém Polmé kanggabla duːdopélaː bík méngkamdém ilaːdopélaː bík ajoné bím ríksula bík laginammé bilaːdopé lulíkto.
Polbí Pelikskéla: Dursilaːké Kangga:do
24 Odok asudouko lédupé Peliksbí bík yamné Dursilaːké lédílo gído, Dursilaːbí Jiudi ommai. Bí Polmé goglíggeːla Kiristo Jisukolo mé:jíksunamdok tayéːlok luladuːbinam agomdém tatto. 25 Édílo Polbí arolok-duːnam, aíé-tejisunam, odokké a:péné kébaːdok agomém kíbila dungngan, odo Peliksbí lansula luto, ''Suːpakképé píːpodagbo, no gípongkangku, odokké ngo ayír paːdokudodo nom goglíkkupé." 26 Odo ayírrado Polbí bím murkongém biyépé émna méːla dungngai. Édémpila bí Polmé gogmo-gogmola gogla luposudungai.
27 Émpige:la dítak annyiko gíbadnam lédupé Porikias Pestasbí Pelikské agerdém paːto. Peliksbí Jiudi taniːkídíːdém aipé-méngkosulí:la duːnam légangé Polmé makanangíːdo méyarto.