23
Polbí Kiːni-kéba:do:pé béryodmaːpé bérra luto,"Ngok bírrangkídínga, ngok ipénam-agerém siloké longésoːpé appíng ainé méːlotki Ruːnémé ilet-gíledbitag. 2 Édémpé lunamé abíngaryan mirí Ananiasbí Polké kéra:dok dagla du:nékídí:dém bík nappaːdok pidopé lulíkto." 3 Odo Polbí bím luto, "Ru:nébí nom dí:tabyé, no kampopé tidnam bareya! Luroːdok adnam kísapé no ngom kébang-baːpé émna odo tettudung, émpigeːla no ngom pidopé lulíggeːla luroːdok adnamkídíːdok kekonpé idungǃ"4 Sé:kobulu Polké kéra:do dagla dungngan bulu luto, "No kapé Ru:nék abíngaryan mirídém édémpé luka:langkan?"
5 aPolbí lulatsutoku, "Bírrangkídínga, bí abíngaryan mirídé émnamdém ngo kinmangai; kapéné édém adla léːtag: 'Noluk tani:kídí:dok migomdok kekonpé aimaːném luyok.' "
6 Odo Polbí, akke Soddukié odokké akkedé Parosié émna kinge:la, Kiːni-kébaːdo jénggamna luto, "Ngok bírrangkídínga, ngo Parosiːko, odokké ngok baːbubíːsin Parosiːai. Sikolokké lékod-turkunam dung émna akang kanam légangé silo ngom kébangém baːdung."
7 Édílo bí édémpé lutoji, Parosiːélang Soddukikídí:dok pongkodo lukerkaːmínsunamko lenkang, édémpila kébaːtaniːkídíːdé baːnyikopé ikang. 8 Lékod-turkunammé, tayéng-yaːmeyé odokké yallo kamang émna Soddukikídíːdé ludag, émpigeːla édé appíːdé dung émna Parosikídíːdé ludag. 9 Odo kínggíːpé dénggékang, odokké Parosikídíːdok akke séːkobulu luro luyírnén dagrobgeːla torgampé lumínsuto. Odokké bulu lukang, "Ngolu séː tani:sok imur aːkosin pa:mang. Odokké aropé bím tayéng-yaːmekomanggom yaloko lubikapé."
10 Buluk lumínsunamdé aipé bottébatsunammé Polmé bulu sermíkpéké émna komandardé méːto. Édémpila bí maglíngkídíːdém gítogla bolbodapé bím buluk araːdokké gípagbola sipaiːdungkodoːpé gíaːbodokupé lulíkto.
11 Édé yummíːdo Ru:tumbí Polké kéra:do dagge:la luto, "Angém kínggí:suto! No kapé Jerusalemso ngom lukanbitoji édémíːpé Rumoloːsin ngom lukanbiyérung."
Polmé Mokepé Ru:sunam
12 Longkon rokomdo Jiudikídíːdé kéíkkéípé ru:suge:la Polmé bulu édíloːpé mokema:yéji odoloːpé okkomsin doma-tíːma émna bulu aíkídí:dé pesuto. 13 Édé kéíkkéípé ruːsunamdo yíːpikopé bojéyangko taniyé dungngai. 14 Bulu abín miríkídí:do:pélaː midumkídíːdoːpé gígeːla luto, "Édíloːpé Polmé mokemaːyéji odoloːpé ngolu menna duːyé émna Ruːnék aminno pesutag. 15 Édémpila su:pag, noluk Kiːni-kébaːdok lédílo séː agomsém kinbínna kinnam légaːpé Polmé gíbodopé komanderdém séuko mola kumna luyé. Odo bí soːpé gípíngoːmaːdapé ngolu bím mokeyé."
16 Émpige:la édílo Polké íodé buluk ruːsunamdém tattoji, bí sipaiːdungkodoːpé gíla Polmé lubito. 17 Odo Polbí língko opisarko gogge:la luto, "Sé: ya:mesém komandardoːpé gíbokangkai; bíkké bím oːkai lubipénamko dung." 18 Édémpila bí bím komandardo:pé gíbokang. Odokké opisardé luto, "Makana:dok du:né Polbí ngom gogge:la séː yaːmesém nokkosoːpé gíbodopé mélíktag, kapila:né bíkké nom oːkai lubipénamko dung."
19 Komandardé yaːmedém alagdok sobomna, gíyodbogeːla tauto, "No okkom ngom lubipé émna méːdun?"
20 Bí luto, " Jiudikídíːdé séumola séː agomsém Polkolok tadbínna taupé émna bím yampo kébaːdoːpé gíbodopé nokkolok kopé émna bulu ruːséktag. 21 Émpige:la bulum arrompéːméyok, kapila:né yíːpiko bojéyap taniyé bím mokepé émna toyaːla dung. Bím édíloːpé bulu mokemaːyéji odoloːpé doma-tíːmaːyé émna bulu pesutag. Bulu nokkolok lulatsukunamdém toyaːla, odokké agerdém gerpé émna lennodanna dung."
22 Komandardé yaːmedém sémpé lupangge:la mélíktoku, "Séː agomsém ngom lubitag émna no sé:komsin lubiyok."
Polmé Kaiseria:pé Mélígnam
23 Odo bí bík língko-opisar annyiko goggeːla lulíkto, "Yumédok konané ayírdo Kaiseria:pé gídopé, língko-annyikopé maglíngém, níːnítkopé gure saːné odokké língko annyikopé gídíng sudné maglíngém lennomotok." 24 Odokké Polmé amoːruːtum Pelikskodoːpé aiyopé gípíbonam légaːpé bímsin guregaːriko bidopé lulíkto. 25 Odokké bí sémpé do:jíkko jíglíktoː
26 Airu:pé ménggésunam amo:ruːtum Pelikskolo:pé, Kaludia Laisiaːké asin-aséngém toríksulang. 27 Séː taniːsém Jiudikídí:dé sogabla bulu bím mokepé émna ila dungngai, émpige:la ngo ngok maglíngém gíbola bím buluk alaglokkém mopítto, kapéné bí Ruman taniːko émnamdém ngo kinpíːto. 28 Bulu kapila bím lujémna duːji émnamdém kinpé méːla buluk Kiːni-kébaːdoːpé bím gíboto. 29 Bím lujémnamdém ngo buluk luroːdok tayéːlok inam-gínam taunamko émna paːto, émpigeːla sinam paːnamkomanngom makanaːlo tumna léːpé bím lujémnam okkosin kamang. 30 Édílo ngom séː tani:sém mokeyé émna ruːsunamdém lupaːton, ngo lomdanna bím nokkodoːpé mélígdung. Odokké bím lujémnékídíːdémsin ngo nom buluk kébaːbaːnam légaːdém lubidopé lulíktag. Saː aipaiǃ
31 Édémpila maglíngkídíːdé, bulum lulígnamdémpé, Polmé yumédo gíbola Entiripatiris nogordoːpé gípíːboto. 32 Longkondo gure sa:bomnékídí:dém bík lédílo gíyarmogeːla bulu (aléki gíné maglíngkídíːdé) sipaiːdungkodoːpé gílattoku. 33 Édílo gure sa:bomnékídí:dé Kaiseria:pé gípí:toji, bulu do:jígdém amo:ru:tumdém bito odokké Polmé bík alaglo tolíkto. 34 Amo:ru:tunmdé do:jígdém poge:la bí oko mongkédokkén émna bím tauto. Bí Silisia:dokké émna kinna, 35 bí luto, "Édílo nom lujémnékídí:dé so:pé gípí:yéji odo ngo nok agomsém tatpé." Odo bí Polmé Erotké migom-okumdok kanggabnékídíːdok lédílo lé:dopé lulíkto.