22
''Ménggésunam bírrang odokké abukíddínga, su:pag ngok lurasunam agomsém tatpoːtei.'' 2 Édílo bí bulum Aramikpé agompé lubido bulu tattoji, bulu asoːpé dungapkang. Odo Polbí lutoː3 ''Ngo Jiudi taniːko, Silisia:dok Tarsasdo ngom otag, émgom ngo séː nogorso síːsa:tag. Ngoluk abukídíːdok luroːém ngom Gamaliel luyír-abubí kangkanopé luyírbitag odokké nolu kapé silo Ruːnéké légangé airuːpé dígdagji édémíːpé ngo:sin dígnékai. 4 aNgo Ruːtumké séː Lambésok gímínné taniːkídíːdém sigédopé ipusireːka, néːngai-milbongai bulum appíngém sogabla makanaːlo tumka. 5 Édém abíngaryan mirídé:lang kéba:midum appíːdé lukanbilaːyé. Demaskasdok duːné bírrangkídíːdoːpé adlígnam doːjígémsin ngo bulukkolok paːto, odokké odoːpé gíla bulum Jerusalemsoːpé mokemoramnam légaːpé sobomkupé gíto.
Polké Méngkutsukunamdém Lubinam
(Ager 9.1-19; 26.12-18)
6 Loːtung ayírdo ngo Demaskaspé gípíngkíramdodo, bagémpé tayéng-amoːtokké unjígné píangko ngom ladyetto. 7 Ngo amoːboːpé kétpaglednamé gomukko ngom ludopé tatpaːsuto, 'Solǃ Solǃ no kapila ngom ipusiredun?' 8 Odo ngo tauto, ''Ruːtuma, no séːkon?' Bí lulatsutoku, ''Ngo Najareddok Jisubí, séːkom no ipusirela dung.'' 9 Ngok gíjonkídíːdé píaːdém kaːbekto, émpigeːla ngom agom lubila du:nédok gomugdém tatkintoma. 10 Ngo tauto, ''Ru:tuma, ngo okkom ipa:yen?" Odo Ruːtumbí luto, ''Darobge:la Demaskaspé gíangkang. Olo nok ipénam ager appíːdém nom lubipé." 11 Ngok gíjonkídíːdé ngom buluk alakki gagabbila Demaskaspé gíaːboto, kapilaːné unjígné píaːdé ngom miglumoto.
12 Anania émnam taniːko ngom kangkapé gído. Bí luroːdok adnamkídíːdém pésoménggéla ibomnékkai odokké odok duːné Jiudi appíːdé bím aipé ménggésudagai. 13 Bí ngok kéraːdo daggeːla luto, ''Bíro Sol, no ka:bekkangkulangka!' Odokké odo ayírardo ngo bím kaːbeglaːto. 14 Odo bí lutoː 'Ngoluk abukídíːdok Ruːnébí bík mé:namém kindopé odokké Arolok-duːné Atérmé kaːbegdopé odokké bík nappaːlok agomém tadbegdopé nom balentag. 15 No okkom tatto-kaːton édémbulum appíng taniːyém no bík lukanbikunéːpé iyé. 16 Odokké no suːpag okkom toya:ladun? Daropto, bík aminém goktinsugeːla baptisém laːtok odokké nok paːbém írpusutok.'
Jiudiman Tani:yém Lugoːbidopé Polmé Gognam
17 Édílo ngo Jerusalempé gíladlangkula kumli:do kumna dungngan, ngo kangorko kaːto. 18 Odo Ru:tumbí ngom agomém lubidopé taːto. "Lomto! Lomdanna Jerusalemsém mépagla gíkang, kapilaːné bulu ngok tayéːlok nok lukanbikunamdém tadmaːyé.'' 19 Ngo lulatsutoku, ''Ruːtuma, ngo murong-okumkolokké murong-okumkolo:pé gíla séːkobulu nom méngkésudagji bulum sogabla díngka émnamdém séː taniːkídíːsé kindag. 20 Odokké édílo nok lukanbikuné Istipenké íːdém bidmokan, odo ngo:sin dagla dungge:la kabodag émna tolíkka odokké bím mokenékídíːdok galugém kanggabbika. 21 Odo Ruːtumbí ngom luto, 'Gíkangka; ngo nom moːté:ruːpé Jiudiman tani:kídíːdoːpé mélígyé.'"
22 Édíloːpé Polbí édém lumaːngaːji taniːkídíːdé bík agomém tadla dungngai. Odokké bulu bottépé jéːla luto, "Bím mo:písokké laːpaktokǃ Bíkké turra duːnan arré kamangǃ'' 23 Bulu jénggeːla buluk gétémnam-galugém érpagamgeːla duliém yísaːmoto, 24 komandardé Polmé sipaiːdungko araːdoːpé gíaːbodopé lulíkto. Bí bím sabukki dí:dopé luto odokké kapila taniːkídíːdé bík tayéːlo édémpé jéːdun émnamdém tadlenpé émna bí tauto. 25 Bulu bím díːpé émna lagjundoːpé raggapto, Polbí odok dagla duːné língko opisardém luto, ''Imurém paːmaːdapé Ruman taniːkoném noluk díːnamdé díːmurmaːnei?"
26 Édílo língko opisardé édém tatton, bí komandardoːpé gígeːla édém lubito. Bí luto, "No okkom ipé émna méːdun? Séː taniːsé Ruman taniːkomín."
27 Odo komandardé Polkodoːpé gíla bím tauto, "No Ruman taniːkoi, ngom lukítei?"
Bí lulatsutoku, ''Édé arro ngo Ruman taniyé.''
28 Odo komandardé luto, ''Ngo Ruman taniːpé inamdém bojéruːngko murkongém dorra paːtag.''
Polbí lulatsutoku,''Émpigeːla ngo édém ododokkébo paːtag.''
29 Édémpila séːkobulu bím taukaːpé méːladungngan bulu bagémpé gípakkangku. Pol, séːko Ruman tani:kon, bím koggabla léːtag émnamdém kingeːla komandardé aídéːsin lansukang.
Kiːni-kébaːdo Polmé Daksaːmonam
30 Longkondo Jiudikídíːdé okkaré kapila Polmé lujémdun émnamdém kinpé méːla komandardé bík ikolidém kokpagbito. Odokké abíné miríkídíːdémnaː Kiːni-kébaːdém gíkumsudopé bí lulíkto. Odok lédupé bí Polmé gítogboge:la buluk kangga:do bím dagmoto.