Jerusalempé Polké Gínam
21
Odokké édílo ngolu bulukkolokké gípansutoji, odokké koːyod-koːmadmaːpé Kosdoːpé koːla gíto. Longkondo Rotpé koːto odokké Patarapé koːla gíto. 2 Ngolu Poinesiadok koːpadla gíné bottén-ollungko pa:la odo saːto. 3 Odok lédupé Saiparas bogléːdém kaːpaːla odok lakkepé koːbadla ngolu Siriapé koːto. Ngolu Tayardo gíito; kapéné odo bottén-olluːdok koːbomnam attarkídíːdém rébyipénammé. 4 Odok du:né méngkésunném magabgeːla, ngolu buluk lédílo loːnítko duːmínto. Bulu Yaloké lumo-lumola lunamki Polmé Jerusalempé gíyoka émna lutumto. 5 Odokké édílo ngolu odokké gíkupé iton, ngolu bulum mépagla odokké koːyartíto; bulu ngolum nogordok ruːyído:pé buluk néːng, ommangém gíbotéːla gílennígbitaggakui. Ngolu appíngé ragodo lébí:tumna kumge:la gípansuto. 6 Ngolu akoné akoném lutérsugeːla bottén-olluːdo saːtoku odokké bulu okumpé gílatkangku.7 Ngolu Tayardokké koːla gíla ko:térsula Tolemipé gípí:to, okolo ngolu bírrangkídíːdém kaːríksula buluk lédílo longéko duːmínto. 8 Longkondo ngolu odokké gílangkula Kaiseriaːpé gípíːto. Odo ngolu Pilipké okumdo gírasula bík lédílo duːmínto, séːkobí tatpon lutad lugoːbiné kíníddok aːkai. 9 Bíkké amilo-gímaːné omé appi:ko dungngai, séːkobulu lungorém luto. 10 Ngolu odo asudoukopé duːnam lédupé, Agabas émnam lungor-lunéko Judiaːdokké gítogdo. 11 Ngolukkolo:pé gídangeːla, bí Polké ígíng jinrégdém laːto, odokki bík aíké alé-alagdém yénggapsugeːla luto, ''Angunné Yalobí ludag, 'Séː ígíːjinéréksok ruːtumdém sémmarpé Jerusalemdok Jiudikídíːdé yénggabgeːla Jiudiman tani:kídíːdok alaglo bím tolígyé.' ''
12 Édílo ngolu édém tatton, ngolula: taniːkídíːdé Polmé Jerusalempé gímaːdopé kumdanna lutumkíka. 13 Odo Polbí bulum luto, ''Kapila nolu kabla ngok asiném kigosumodun? Ngo yenggaboːkosupé émna lennola duːmang, émpigeːla Ruːtum Jisuké aminno Jerusalemdo sigépé émnaːsin lennola dung.''
14 Édílo ngolu bím lutumnaːtoman, ngolu édém lungasugeːla luto, ''Ruːtumké méːnamdém ikaːlangka.''
15 Odok lédupé, ngolu lenna Jerusalempé gísaːto. 16 Kaiseria:dokké gímínné ékké ngoluk lédílo gíjonsula ngolum Nasonké okumpé gílíkto, okolo ngolu duːpénamméːji. Bí Saiprasdokkai odokké gímínnékídíːdok araːdok anggotpoːnékai.
Polké Jerusalempé Gípíːnam
17 Édílo ngolu Jerusalempé gípíːtoji, bírrangkídíːdé ngolum méːpodanna boríksuto. 18 Longkondo Polbí ngoluk lédílo Jemskoloːpé gíto odokké midum appíːdém ka:ríksuto. 19 Polbí bulum asin-aséngém bigeːla Ruːnébí bík agerdokki Jiudiman taniːkídíːdok araːdo oko oko agerém gertoːji édémbulum lubínna lubito. 20 Bulu édém tadge:la Ruːnémé luyitsuto. Odokké luto, ''Bírra, no kangkítok, éddíko Jiudi taniyé méngkésutoːji, bulu appíːdé luroːdok légaːpé dígdagai. 21 Émpigeːla Jerusalemsok duːné Jiudikídíːdém, no Jiudiman taniːkídíːdok lédílo duːmínné Jiudikídíːdém Musiːké luroːdém, odokké buluk ommangém gatpugmaːdopé, odokké ngoluk poːpélokkébo ibomnamkídíːsém mépagdopé no luyírtag émna lubitag. 22 No gído émnamdém bulu tatpaːruːsuyé, suːpag ngolu kapé iyyan? 23 Édémpila ngolu nom okkom lubiyeji édémpéi no ipoːlang. Ngoluk lédílo tani appi:ko dung séːkobulu pesutag. 24 Buluk lédílo noːsin lékkopé pídesutéːlang, odokké buluk dumíd gidrédok arédém no bilang. Odo nok tayéːlo sémpé lugégéla lé:namsé aromang émna odokké no aíé luroːdok lunam kísapé appíngém ibomna dung émnamdém appíngé kinyé. 25 Émpigeːla Jiudiman méngkésunékídíːdok légangé, ngolu bulukkolo:pé ngoluk ruːségnamdém adlíktag, bulu uiːmoima:lok tosagnam joːsag domaːdopé, yumpednam simín-sirolok adiném domaːdopé, buluk íːyém tíːma:dopé odokké langgomaːdopé."
26 Odo Polbí taniːkídíːdém gíbola odokké longkondo buluk lédílo aíém pídesugeːla kumli:pé gíaːto, odokké oko longkído píde-agerdém ingabgeːla buluk légaːpé palígnamko ibiyéji édém lupaːto.
Polmé Sogabnam
27 Édílo édé kíníd longédé gíngabdíːdaggabon, Esia mongkédok Jiudi taniːékké Polmé kumli:do kaːbeksuto. Bulu gíkumsuné tani appíːdém luːurrígla bím sogapto. 28 Odokké bulu jéːla luto, ''Israelsok taniːkídínga, ngolum sogabdumsupoiǃ Séː tani:sé appíːloi ngoluk taniːkídíːdok, ngoluk luroːdok odokké séː kumli:sok kekonpé appíng taniːyém luyírnédé. Édémyaːsin bottéyaːpé bí Girik taniːyém kumliːsoːpé gíaːbola sém suaːmoto." 29 Kapéné bulu Ipisiaːdok Torpimamé Polké lédílo nogordo kaːto. Édémpila Polbí bím kumli:doːpé gíaːbotag émna méːto.
30 Odo nogordok tani:appíːdé urratkang, odokké tani:kídíːdé appíːlokké dugla gíla Polmé sogabla kumli:dokké solennígla lomdanna séːturkídíːdém síkkapto. 31 Édílo bulu bím mokepé émna iton, nogordok taniːkídíːdé urradla dung émnamdém Ruman maglílok komandardé tadbeksuto. 32 Bí lomdanna opisarémnaː maglíng ékkém gíbola taniːkídíːdoːpé gíto. Odokké édílo urradnékídíːdé komandardémnaː bík maglíngkídíːdém kaːtoji bulu Polmé díngasuto. 33 Komandardé gísaːla bím sogapto odokké ikoli soːnyiki bím koggabdoːpé lulíkto. Odo Polbí séːkan odokké oko imurém bí iton émna bí tauto. 34 Tani:kídíːdok akke oːkai akedé oːkaiko jéːla dungngai, urradbatsula komandardé arodé okkan édém kinnamaːla, Polmé sipaiːdungkodoːpé gíbodopé lulíkto. 35 Édílo Polbí koːbaːdoːpé gípíːtoji, taniːkídíːdé aglíːbatsula moabomnamé maglíngkídíːdé bím joːbomna gípé ikang. 36 Taniːkídíːdé gímín gímínna jéːla luto, ''Bím gípagbokangǃ''
Polké Lurasunam
37 Maglíngkídíːdé Polmé sipaiːdungkodoːpé gíangarbopé émna idodo, bí komandardém tauto, ''Ngo nom oːkaiko lulaːyénei?"
Bí lulatsutoku, "No Girik agompésin lukindagnei?" 38 No édé Ijip tani:démaːnei séːko longkokébong migom kekonpé dagrobla líːyíng appikopé abbugjoːném sullipotado:pé gíbonédé?"
39 Polbí lulatsutoku, ''Ngo Jiudi taniːko, Silisiaːdok Tarsasdokké, ngo émmum nogorrok taniːkomang. Ngom mé:nyingoːmaːpé tani:kídíːsém agomko lumotei.''
40 Komandardok lulaːdopé lunamdém panggeːla Polbí koːbaːdo daksanggeːla taniːkídíːdém asoːpé duːdopé bík alakki péttumto. Édílo bulu asoːpé dungapkan, bí bulum Aramik agompé lutoː