Mesodonia:pélaː Girispé Polké Gínam
20
Édílo urradnamdé ansíngkan, Polbí méngkésunékídí:dém goglíggeːla bulum lusaːla lupasugel Mesodoniaːpé gíkang. 2 Bí édé do:lungkídí:dém gípadla gíla tani:kídíːdém agomki lusaːlíkto. Odokké bí Girispé gípí:to. 3 Odo bí po:lo píumkopé du:to odokké édílo bí Siria:pé ko:la gípé émna iton; Jiudikídíːdé bím mokepé émna ruːsunammé, bí Mesodonia:dok gípadla gílatkupé émna méːto. 4 Beria:dok Pairuské ao Sopatarbí, Tisolonia:dok Aristarkasbíːla Sekundasbí, Darbe:dok Gayasbí, odokké Timotibíːsin, Esia moːtagdok Taikikasbíːlaː Torpimasbí bím gíjonsuto. 5 Édé tani:kídí:dé gínoːla gíla Toroasdo ngolum toya:la dungngai. 6 Émpige:la Kaːr lígmaːpé Pitang donam Gíːdí lédupé ngolu Pilipidokké koːla gíla longo lédupé ajonkídíːdém Toroasdo ríksutoku odokké odo kínít longéko duːrasuto.Toroasdo Iutikasmé Sikolokké Turmokunam
7 Lo:níddok anggotpoːné longédo ngolu pitang pentungel dokolo lékkopé gíkumsuto. Polbí longkondo gíkupé méːla tani:kídí:dém luyírém lula yumé kídísudodo:pé lutíto. 8 Ngoluk gíkumsuko tayéng soyardo bojéruːngko serakiːém romtungai. 9 Odokké Iutikas émnam yaːmeko kaːsukkodo tedla dungngai. Polbí arai araipé lula duːnamé bí yubangkang; odokké aigampé yubngaksunamé bí aummoːolang tayéːdokké opagletkang odokké édílo bulu bím buroptokun bím sila duːdopé paːto. 10 Odo Polbí gítogla bí aíé bík tayéːlo oaːla bím gonggabgeːla luto. "Nolu mé:díryok, kapila:né bí turradung!" 11 Odok lédupé lékoda tayéngké-soyarpé gísaːlangkula Ruːtumké dobonamdém dotoku. Odokké píangé pídodoːpé bí bulum luposutíla dunggeːla odokké gíkangku. 12 Tani:kídí:dé ya:medém turpé okumpé gíbopaːlangkula airuːpé méːpokang.
Ipisia Midumkídíːdém Polké Ríksunam
13 Polbí Assospé aléki gínongkang, édílo ngolu bottén-olluːlo koːla gíyéji, okolo bí ngolum ríksupé émna appíngém inoːsaːnola léːtag. 14 Odo bí ngolum ríksula ngolu lékkopé Mitulini bogléːdo:pé koːla gíto. 15 Odokké koːla gíla longkondo ngolu Kios bogléːdém koːpatto, odok longkondo Samos boglé:do ko:rasuto odokké rokondo ngolu Miletaspé koːpíto. 16 Polbí Esiaːdo bojéko dunggemang émna méːla Ipisiaːdém koːbadla gíto, kapilaːné bí Jerusalempé lomgamna gíla dungngai, gípíːlaːmílo Pentikos longédo gípíːpé méngkíto.
Ipisia:dok Midumkídíːdém Polké Lutérsunam
17 Édémpila Polbí Miletasdokké Ipisiado:pé taniːyém mélíggeːla kumgodok midumkídíːdém goglíkto. 18 Édílo bulu gípí:toji, bí bulum luto: "Esia mongkédoːpé gíaːpodo longédokké ngo noluk lédílo appíng ayírro kapé duːmínna dungngaji édém nolu kindag. 19 Jiudikídíːdé ngom mokepé émna bojéko ngasodém biko araːdo, Ru:tumké agerém ngo miksé díla ajjisula gerto. 20 Noluk légaːpé okodé aidagji édém luyírbipénamdém ngo ajjikosin méːrasumaːpé, taniːkanggaːlo odokké okum okumnoːpé gíla lugoːbika édém nolu kindag. 21 Jiudiːélaː Girik taniyé méngkutsula Ruːnékoloːpé gíladlangkula Ruːtum Jisumé méngkésudopé ngo buluk opín annyidém lukanbika. 22 Odokké su:pag, kangkítok, ngokkolo okkoi kapiyéson okkomsin kinmaːpé, Angunné Yaloké lulígnam légaːpé ngo Jerusalempé gídag. 23 Ngo sémmong kindag, nogor nogorro duːgélang makanangé ngom toyaːla dung émnamdém Angunné Yalobí ngom lukanbitag. 24 Émpigeːla ngok turnamsém ngo arré kadag émna méːsumaːpé, ngok dugla-du:namsém dugledla:mílo odokké Ruːtum Jisuk ngom binam agerdém gerredlaːmílo, oko agerdé Ruːnék aséːdok tatpon lutaddém akoném lukanbinamdé.
25 Odokké suːpag, kangkítok, nolukkolok séːkosin ngom lékoda kaːríksukumaːyébo, ngo kindag noluk appíngké araːlo ngo Ru:nék migomdokodém lugoːbika. 26 Odok-léga:pé, ngo nolum silo lukanbidung séːkkaiké méngkésumaːpé sinamdém ngom lugéːpé lagimang. 27 Kapéné Ru:nék mé:la du:nam appíng agerdém ngo nolum méːrasumaːpé lugoːbika. 28 Aíém ka:sí:sulang odokké Angunné Yalok nolum binam appíng kéréːdém kaːsíːlang. Ru:nék kumgodok meːr-kaːsíːnép ilang, okodém bí bík aíké íːidokki rétag. 29 Ngo kindag ngok gípagnam lédupé makkeresiyaːné lampiyangé noluk ara:lo gíaːla kéré:dok aːkomsin turpé mémaːyé. 30 Noluk aíké tani:kídí:dok ara:dokké bulukkol gímínnékídíːdém gíyodbola gíbopé émna innésin lenyé. 31 Édémpila aíé totsula du:lang! Ngo dítak aumkopé longé yumé miksé díla nolum séː lupaːsém lungasuːmaːpé luyartíbika édém nolu méːpaːlang.
32 Odokké su:pag ngo nolum Ru:nékoloːla bík agomdok aséːlo tolígdung, okodé nolum kínggíːmolaːdang odokké nolum panggodém bilaːdag okkom Ruːnébí noluk légaːpé naré-mopunam taniːkídíːdok lédílo moninsula léːbitag. 33 Ngo sé:kkaiké aíném, murkongém, galugém ka:bomangngai. 34 Ngok séː alaksokki ngok aíké laginammém gerrensula ngok gerjonkídíːdok laginammémsin bidumsuka émnamdém nolu aíékídíːdé kindag. 35 Ngo nolum appíng agerém gerra léngkanka, édémíːpé ager-gergeːla opaném bidumsulang, Ruːtum Jisuk aíké lunam agomdém méːpaːlangː "Laːríksunamdémyang binamdé bojéko ayang-paːnamé."