Polbí Ipisia:do
19
Édílo Apollobí Korindo dungngan, Polbí arang arangké doːlungkídíːdok gípadla Ipisiaːpé gíto. Odo bí gímínné ékkém ríksuto. 2 Odokké bí bulum tauto, ''Édílo nolu méngkésukan odo nolu Angunné Yalomé paːtolang?''Bulu lulatsuto,'' Ma, Angunné Yalokosin dung émnamdém ngolu tatkéimaːmín.''
3 Édémpila Polbí tauto, ''Émpémílo kapin baptisém nolu laːtang?''
Bulu lulatsutoku, ''Jonké binam baptisdémna.''
4 Polbí luto, ''Jonké baptis binamdé bulukképai séːko imurrokké méngkutsutokun. Bí taniːkídíːdém lubika ngok lédupé gínédém méngkésulang, bí Jisubí.''
5 Édé agomdém tadla, bulu Ruːtum Jisuk aminno baptisém laːto. 6 Édílo Polbí buluk tayéːlo bík alagém pigabbitoji, Angunné Yalobí bulukkolo aːla bulu angun-agompé lula lungorém luto. 7 Odo yí:laːnyíkopé milboːtaniyé dungngai.
8 Polbí murong-okumpé gíla po:lo píumkopé odo pésomaːpé Ruːnék migomdokodok tayéːlo lumínsula bulum méngkésutoka émna lubito. 9 Émpigeːla bulukkolok akke keríksunép ikang; bulu méngkésugemang émna lupaksula Ruːtumké Lamdém tani:kangga:lo aimaːné émna lupakto. Édémpila Polbí bulum mépagla gímínnékídíːdém gíbola Tairanaské luyírko bottén-soyardo loːdém luyírbito. 10 Édémpé dítak annyikopé iyarto, édémpila Jiudiélaː Girik tani appíːdé sé:kobulu Esia moːtagdo dungngan bulu Ruːtumké agomém tatpaːsuto.
Iskeba:ké Ao:kídí:dé
11 Ruːnébí kínggíːné méːpílaːmaːnam agerém Polkokki gerto. 12 Édémpila bík sutkínam dumérmanggom gayiném kila duːné taniːkídíːdoːpé bomnaméi, buluk kinamé aikangku odokké aiman yallo bulukkolokké gílenkangku. 13 Édémpila Jiudi tani ékké séːkobulu okolai-okolai gígoːla uiːém ménnéngoːdang, bulu uiːpaːla léːnam taniːkídíːdém Jisuk aminno uiːkídíːdém ménropto. Bulu sémpé ludungai, "Polké lugoːbinam Jisuk aminno, ngo nom gílendokupé lulígdung.'' 14 Iskeba émnam Jiudilok abíngaryan miríkolok aoːkíníddé édém ila duːnékídíːdé.
15 Longéko aiman yalodé bulum lulatsutoku, ''Ngo Jisum kindo, Polmésin kindo, émpigeːla nolu séːkon?"
16 Odo édé uiːpaːla léːnam taniːdé buluk tayéːlo sumsaːla bulum appíːdém gétabamto. Bí bulum íːyé bidgoːsula pítsugédopé díːto, édémpila bulu okumdokké duglenkang. 17 Édílo Ipisiadok duːné Jiudiélaː Girik tani:kídíːdé édém tatpaːsuton, bulu appíngé kínggíːpé pésokang, odokké Ruːtum Jisuk aminém odo airuːpé luyitsuto. 18 Odo séːkobulu méngkésutoji bulu gíla taniːkanggaːpé buluk aiman gernam agerkídíːdém ludésuto. 19 Séːkobulu morugoːdaggaːji bulu buluk indoroːjalkídíːdém bomnenna taniːkanggaːpé rompagamto. Édílo bulu tampolikídíːdok arédém sapkaːtoji odok arédé anír murkong líːyíng yíngkopé idagai. 20 Édémpé tornamé kaːtéla Ruːtumké agomém appíːloi lugoːbito.
Ipisia:do Ngasodmonam
21 Édé appíːdok inam lédupé, Polbí Mesodoniaːdoglaː Akaiadok gípadla Jerusalempé gípé émna méːto. Bí luto, ''Ngo odoːpé gínam lédupé, Rompésin gíkaːla kaːpénammé.'' 22 Bí Timotimélaː Erastasmé, bím idumsunékídíːdok araːdok bínyi annyém Mesodoniaːpé mélíkto. Émpigeːla bí aíé Esiado asudouko duːtétto.
23 Odo ayírdo Ruːnék Lambédok tayéːlo Ipisiaːdo bottéruːné urradnamko lenkang. 24 Dimitrias émnam unariːdé, séːko Artemiské kumliːdém murkongki mokan, bík édé agerdé bojéruːngko ilpiém turnan-lambém bidungai. 25 Bí bulumna: lékoné ager-gerjonkídíːdém lékkopé gokkumsugeːla lutoː ''Ajonkíddínga, nolu kindag ngolu séː agersokki siddíkop mirémdung. 26 Odokké nolu kaːsutatsukíto kapé séː Pol émnam taniːsé alakki monam moimangkídíːdé aro ruːnébulumang émna arrarémpé-lubila bojéko taniːyém gíyodbokang. Bí Ipisiangoːsomang Esiasok bojéruːngko moːtagloːsin gíyodambodung. 27 Édémpila bottén aimaːnamko aːdung, édé ngoluk ageroːsok ainé aminoːdém yogmomaːyé, ménggésunam Artemis naːnéké kumli tayéːdoːsin aːyé, naːnémé séːkosin ménggésumaːyé, séːkom Esiaːsok takam moːtagloːla moːpísok taniyé kumdang, bím pésoménggénamdé yokpagyé."
28 Édílo bulu édém tatton, bulu kínggíːpé aglíːla jéːropkangː ''Ipisia taniːlok Artemisbí bottéruːnéǃ'' 29 Édémpila nogordok appíːloi urradamkang. Bulu Mesodonia:dok Polké gíjon Gayasmélaː Aristarkasmé sogapto, odokké tani appíːdé akongkonémpé dugdad-dugratsula kaːmankangkodoːpé gíto. 30 Polbí:sin tani:kídíːdok araːdoːpé gíaːpé méngkíto, émpigeːla méngkésunékídíːdé bím lutumna gíamotomang. 31 Mo:tag migom ékké, séːkobulu Polké ajonan, bulusin bím kaːmankangkodoːpé gíaːla dakkansumaːdopé kumdanna luto. 32 Gíkumsunékídíːdé muram, akke oːkai, akoné oːkai émna jéːla dung. Abayaːdé kinsuimang kapila bulu odo gíkumsudun. 33 Jiudikídíːdé Alegjendarmé tani:kídíːdok kanggaːdoːpé níːlíkto, odokké tani:ékké bím okkom lupénamém édém jéːla luyírbito. Taniːkídíːdém asoːpé duːdopé bí bík alakki péttumto odokké lurasunam agomém luropto. 34 Émpigeːla édílo bulu bím Jiudi taniːko émna kinton, bulu appíːdé lérékpé aːdí anyikopé jéːyarra lutoː ''Ipisia taniːlok Artemisbí bottéruːnéǃ''
35 Nogordok meyordé taniːkídíːdém asoːpé duːmogeːla lutoː ''Ipisia:sok ménggésunam taniːkíddínga, Ipisia nogorsé bottéruːné Artemiské kumli:dém kanggabla duːnédé émnamdém appíngéi kindag, sék ílíng moimaːdé tayéːtokké olettag. 36 Odok-légaːpé séː lupaksula:ma:nam aro agomé, édémpila noluk asoːpé duːnamdé aidag odokké bagémpé itérsitér okkomsin ipoːyok. 37 Nolu séː tani:kídíːsém soːpé gía:botag, émpigeːla bulu kumli:dok okkomsin dopsomang odokké ngoluk naːné Artemismésin lukaːmang. 38 Édémpila Dimitriaskélaː bík gerjon ajonkídíːdokké séːkkaiké tayéːlo kébangko baːpénammé kaːmílo, kéba:ba:ngko kasarikídíːdém suːpésin mokabmaːda odokké kébaːmigomkídíːdéːsin dung. Édémpila bulu oloːpé gíla akon akonké kekonpé kébaːbaːmota. 39 Odokké sém mépagla nolukké oːkaiko lupénam kaːmílo, édém lurodok kaːla ruːséglangkuboːpé. 40 Kapéné siloké émmumpésin urradnamso ngoluk tayéːloːsin kébangém baːla:do, odo kapila taniːkídíːsé sémpé gíkumsukang édém lubinan ngolukké lambé kamaːyé.'' 41 Édém lunam lédupé, bí kébaːdém baːpento.