Korin Nogordo
18
Odok lédupé, Polbí Etensdém mépagla Korinpé gíkang. 2 Odo bí Pontasdok Akila émnam Jiudi taniːko ríksuto, séːko símsíro:ng bík yamné Pirsillaké lédílo Italidokké gítakku, kapilaːné migom Kalaudiaːbí Jiudi appíːdém Rumdokké gípagdokupé lulíktag. Polbí bulum kaːríksukapé gíto. 3 Kapilaːné Polbíːsin bulugíngkémpé poːyub moné tani:ai, bí buluk lédílo duːmínna lékkopé agerém gerjonsuto. 4 Odokké Yoddo longgém bí Jiudiémna: Girikkídíːdém Ruːnék-gomug tayéːdo lumínsula bulum méngkésumopé émna iyardungngai.5 Édílo Sailasbíːla Timotibí Mesodonia:dokké odo:pé gípíːtoji, Polbí Jisubí Kiristoruːbí émna Jiudikídíːdém lugo:bila, lukanbila aíém Ruːnék agerro tolíksuto. 6 Émpigeːla édílo Jiudikídíːdé Polké angupé ibomna bím anyisuːrobmoton, odo Polbí bulukkoloːpé bík bédugasorém danpuːsugeːlaa luto, "Noluk íːidok ajéngé noluk aíké tayéːloːpag duːyé; ngok lupénammém ngo lubitagbo. Suːpakkolokké ngo Jiudiman tani:kídíːdo:pé gíla lugo:biyé.'' 7 Odokké Polbí murong-okumdokké gílenna Jiudiman Taitas Jastas, séːkobí Ruːnémé méngkésula kumnékan, bík okumpé gíto okodé murong-okumdém kégabadanna dungngai. 8 Murong-okum migom Kirispasbíːla bík okum-érang appíngé Ruːtummé méngkésuto. Odokké Polké lugo:binamdém tadné bojéko Korin taniyé méngkésula baptisém laːto.
9 Yuméko Polbí Ru:tummé kangorro kaːto odokké Ruːtumbí bím lutoː "Pol no pésoyok; aso:pé duːmaːpé lugoːbita; 10 ngo nok lédílo dung, odokké séːkosin nom moa:la mojogmoroglaːmaːyé, kapéné séː nogorsé ngokké bojék taniyé dung.'' 11 Édémpila Polbí dítak akola: poːlo píkéngko odo du:la Ruːnék gomugém bulum luyírbito.
12 Émpigeːla édílo Galiobí Akaia mo:tagdo amo:ruːtumpé ila dungngan, Jiudikídíːdé lékola Polmé moaːto odokké bím kasaridoːpé gíboto. 13 Bulu lujémna luto, ''Séː amiːsé tani:yém luroːdok angupé Ruːnémé kumdopé luyírdag.''
14 Émpige:la édílo Polbí agom lusaːpé émna itoji, Galiobí Jiudikídíːdém luto, ''Jiudikídínga, séː ipaːmaːnamkomanggom bottén imurkaːmílo, ngo noluk lujémnamsém toríksubila kébangko baːbiyai. 15 Émpigeːla sé: ajjiːariné agoméla: émmum aminélaː noluk aíké luroːdok tayéːlo lumínsunammumko, édémpila nolu aíé kaːsísuto. Ngo séː kébaːsém baːbimaːyé." 16 Odokké Galiobí bulum kasaridokké laːlennígdopé lulíkto. 17 Odo bulu appíːdé murong-okum migom Sostenesmé sogabgeːla kasarido bík kanggaːpé díːto. Émpigeːla Galiobí odopé ngepatsintomang.
Entiokpé Gílatkunam
18 Odok lédupé Polbí Korindo bojégamkopé duːto. Odokké méngkésunékídíːdém mépagla bí Pirisilamélaː Akuilamé gíjonsula Siriaːpé koːla gíkang. Koːla gímangoːdapé, bí Kenkiria:do bík pesula léːnam légaːpé bík dumídém gitsuto. 19 Bulu Ipisiadoːpé gípíːto, okolo Polbí Pirisilamélaː Akuila:mé mépakto. Émpige:la bí aídé murong-okumpé gíla Jiudikídíːdok lédílo Ruːnéké agom tayéːlo lumínsuto. 20 Édílo bulu bím buluk lédílo asudoukopé duːmíndopé luton, bí lupaksuto. 21 Émgom sémpé lugela bí gíkangku, ''Ruːnébí ayaːla turmola léːmílo ngo gílatkupé." Odokké bí Ipisiaːdokké koːpagla gíkangku.
22 Édílo bí Kaiseriaːpé kongatoji, bí Jerusalempélaː kumgo taniːkídíːdoːpé gísaːla asin-aséngém bito, odok lédupé bí Entiokpé gítoktoku. 23 Entiogdo asudoukopé du:nam lédupé, Polbí odokké gílenna gíla Galatiadoglaː Pirigia moːtagdok appíːlo gígoːla méngkésunékídíːdém lusaːlígla kinggí:moto.
Apollobí Ipisia:doːla Korindo
24 Odo ayírdo Alegjendiriaːdok Apollo émnam Jiudi taniːko Ipisiaːdoːpé gído. Bí Ruːnék-gomugdém aigampé kinna lujolulabla lujoːné taniːkai. 25 Bím Ruːtumké lambédok agomdém luyírbitag, bí Jonké baptis binam doːyíngoːdém kindagaːgomsin. Bí akon-asagém Jisuké doːyíːdém asin-díglídanna ajjikosin lumurmaːpé luyírbidagai. 26 Édílo Pirisilabíːla Akuilaːbí murong-okumdo bík ang-pítadanna lubinamdém tatton. Bulu bím buluk okumpé goglíkto odokké Ruːnék lambédok agomdém kaboya:dopé lusarbito. 27 Édílo Apollobí Akaia:pé gípé émna lentoji, méngkésunékídíːdé bím kínggíːdopé lusaːla odok duːné luyírsunékídíːdoːpé bím boríksudopé doːjíkko jíglígbito. Odokké bí odoːpé gípíːnammé, Ruːtumké aséngki méngkésukunékídíːdok léga:pé airuːpé kabokang. 28 Kapéné Jissubí Kiristobí émnamdém bí Ruːnék-gomugdok pelenna léngkanbito, édémpé kínggíːpé luradanna Jiudikídíːdém lukamínsudodo lubadmotomang.