Tisolonia:do
17
Odok lédupé bulu Ampipolisdogla: Apoloniadok gípadla gíla Tisolonia nogordoːpé gípíːto, okolo murong-okumko dungngan. 2 Polbí bík po:pélokkébo gíyarra duːnam kísapé, bí loːníd aumkopé Yoddo longédo murong-okumpé gíla buluk lédílo Ruːnék-gomugdokkém légíːkadopé sígmínsuto. 3 Bí Potindok kaːla lusarbila arro émna léngkanbito, "Ngo noluk tadgaːlo lubinam Jisubí édé séːkobí Kiristobín," kapéné Jisubí duːgém dola sibiruːpénamai odokké lungordok lukamardémpé sikodokké turkangku." 4 Jiudi ékké édé agomdém tadlíksula Polkélaː Sailaské lédílo aːmínto. Odok-tayéːpé bojéko Ruːnémé péso-ménggéné Girik taniːélang ménggésunam mimé ékkésin buluk lédílo aːmínto.5 Émpigeːla méngkésuman Jiudikídíːdé dígla; réko-kokodok aiman taniːékkém gokkumsugeːla nogordo urradmoto. Polmélaː Sailasmé magabla taniːkídíːdo:pé soabompé méːla bulu Jasonké okumdoːpé moato. 6 Émpigeːla édílo bulum odo paːtoman, bulu Jasonméla: méngkésuné bírrang ékkém nogordok migomkídíːdoːpé sobomna gíla bottépé jé:la luto, "Séː taniːkídíːsé moːpísok appíːloi tungkup-tuladmodung, odokké suːpag bulu soːpésin gído. 7 Odokké Jasonbí bulum mibo-bola dung. Séː taniːkídíːsé Kaisarké lulígnamdémsin tadmang, émpigeːla odok kekonpé Jisu émnam migom akonkoda dung émna lugoːbidag." 8 Édílo bulu édém tatton, taniːkídíːdéːla nogordok migomkídíːdé murkang. 9 Odo bulu Jasonkologla: akkekídíːdok ajéngém laːto odokké ajéng laːnam lédupé bulum mélíktoku.
Beriaːdo
10 Édé yummíːdo, méngkésuné bírrangkídíːdé lomdanna Polmélaː Sailasmé Beriaːpé mélíkto. Édílo bulu odoːpé gípíːtoji, bulu murong-okumdoːpé gíto. 11 Suːpag Beriaːdok Jiudikídíːdé Tisoloniaːdok Jiudikídíːdémyang asin aiyadaggai, bulu Polké doːyíng kínamdém tadmi:la taddagai. Polbíːlaː Sailasbí arodém luduːlang émna bulu Ruːnék-gomugdok penggola loːdém kaːdungai. 12 Édémpé inamé bojéko Jiudié Ruːtummé méngkésuto, édémíːpé bojéko ménggésunam Girik mimmélaː milbongé méngkésuto. 13 Émpigeːla édílo Tisoloniaːdok Jiudikídíːdé Polbí Beriaːdo Ruːnék agomém lugoːbila dung émna tadbeksuton, bulu odoːpé gíla taniːkídíːdém luːur-lubadla luaglíkto. 14 Oddar lékkolo bírrangkídíːdé Polmé ga:né pígodoːpé mélíktoku, émpigeːla Sailasbíːla Timotibí odo du:tetkang. 15 Séːkobulu Polmé gíbokan, bulu bím Etens nogordoːpé gípíːbogeːla bím mépakto. Odokké Sailasbíːla Timotibí lomdanna gíla bím ríksudoːpé lulígnamdém bomna bulu Beriaːpé gílattoku.
Etensdo Polké Lugoːbinam
16 Édílo Polbí Etensdo bulum toyaːla dungngan, nogordé ílíːmoimangki biːla duːdopé kaːla bí airuːpé méːdírkang. 17 Édémpila bí murong-okumdo Jiudikídíːdoglaː Ruːnémé pésoménggéné Girikkídíːdok lédílo, édémíːpé réko-kokokídíːdo loːdém odok ríksunam taniːkídíːdok lédílo tatpon lutaddok tayéːlo luposuto. 18 Epikurianéla: Istoik opedok dorkon-astorong luyírnékídíːdé bík lédílo lukerkaːmínsukang. Bulukkodok akke tauto, " Séː nappolinésé okkom luladun?" Akedé lukang, "Kaːnamé bí tatkí-kangkímaːnam ui:kumnam doːyingkomín lugoːbiladun."
Kapila:né bí Jisumélaː bík sikodokké lékod-turkunam doːyíːdém lugoːbila dungngai. 19 Odo bulu bím sogabla Areopagasdok kébaːdoːpé gíboto, okolo bulu bím tauka, "No anuné luyírko lugoːbila dung émdag édé okkan ngolumsin lukangkítei? 20 Kapéné no ngoluk tatkímaːnam agomém tadbeksumodung. Odok-légaːpé édé agomkídíːdok légíːkídíːdé okkon, édém ngolu kinníːdung." 21 Etensdok tani: appí:déːla odok du:né bidekikídíːdé okkomsin imaːpé longéloːbungém anu anu doːyíngém kímanna émpé du:paksudagai.
22 Édémpila Polbí Areopagas kéba:dok pongkodo daggeːla luto: "Etensok tani:kídínga! Ngo ka:beksunampé nolu appí:loi kumnam-agerém méːbonékké. 23 Kapéné ngo gígo:la noluk kumnamkídí:dém kaːmila ka:namé, ngo runggukosin paːto,okolo sémpé adlígla léːtagː KINPÍLAːMAːNAM RUːNÉKOLOːPÉ. Su:pag nolu okodém kinpíma:pé kumna du:ji ngo édém nolum lubiyé. 24 a"Ru:nébí, sé:ko mo:písémnaː sok duːné appíngém ruːtag bí tayéng-amo:toglaː moːpísok Ruːtumdé, odokké séːko, taniːlok alakki monam kumli:kídíːdo duːmang. 25 Odokké tani: alakki ilasa:la binamém bím lagimang, bíkké okkosin píːrammang, kapila:né bí aíéi appíng tani:ém turnamém, nganamém odokké appíngém bidag 26 Bí tani:akolokkém tani:opín appíngém odokké bulu appíngé mo:písém duːlubla duːdopé ruːlento. Odokke Ruːnébí buluk légaːpé duːnam ayírémnaː dungko-dakko rísukídí:dém kíla léːbitag. 27 Taniyé bím mala magablaːdokupé émna Ru:nébí sém ito, bí ngoluk séːkkolokkésin moːté:pé duːmang. 28 Kapilaːné ngolu bíkkolo turra, gígola dung odokké ngoluk turnamsé bíkkolo dung.
Noluk aíké niːtom adlennéko lutagː
'Ngolu bík ommangé.'
29 Édémpila ngolu Ru:nék ommaːpé inam léga:pé, Ruːnék moimaːdé aínémpé, murkongémpé, ílíngémpé, séːkkaiké molennammémpé séːkkaiké méːlennam kísapé idag émna méːyok. 30 Kinma:pé du:nam ayírkídíːdém Ru:nébí mé:yinsubitagbo, émpige:la su:pag bí tani appíngém appí:loi méngkutsudokupé lulíktak. 31 bKapéné bí longéko ruːségla léːtag oko longédo moːpísém aro-kébangko tolígla léːnam taniːdokki baːyé. Bím sikodokké turmolangkula, kébang baːpénamdé arro émnamdém bí appíng taniyém léngkanbitag."
32 Édílo bulu sikolokké lékod-turkunamdém tattoji, akedé bím luka:to, émpige:la akke luto, "Ngolu lékoda nokkolok séː agomsém tadlí:dakku." 33 Odo Polbí odokké gílenkangku. 34 Émpigeːla taniː ékké bík lédílo gíla Ruːtummé méngkésuto, édébulu Daionisiabí, Areopagas kébang ajonkai, Damaris émnam miméko, odokké bojéruːngko akon asagé.