Timotibí Polkéla: Sailaské Lédílo Gímínnam
16
Polbí Darbepé gíto odokké odok lédupé Listarapé, odo Timoti émnam méngkésunéko dungngai, sék anédé méngkésuné Jiudikai, émdaggom bík abudé Girik taniːai 2 Listaradoglaː Aikoniamdok bírrangkídíːdé bí aidag émna ludagai. 3 Polbí bím bík gíkolo gíjonsulíːto, édémpila odok duːné Jiudikídíːdok légaːpé Polbí bím gatpukto, kapilaːné bík abudé Girik taniːyé émnamdém bulu appíːdé kindagai. 4 Bulu taon taonno gípadla gíla, Jerusalemdo okkom mélígnamkídíːdéːla midumkídíːdé ruːséktang édém taniːkídíːdé tatpé lagidagji émna lubito. 5 Édémpila kumgokídíːdé méːjíksunamno kínggíyaːnammé loːdém taniːyé Ruːtumkolo aːsetto.Polbí Mesodonia Taniːkoném Kangorro Kaːnam
6 Esia mongkédo lugoyok émna Angunné Yalodé lutumnam légaːpé Polbíːlaː bík gíjonkídíːdé Pirigiadémnaː Galasia moːtagdém gípadla gíto. 7 Odokké édílo bulu Maisia moːtag rísudoːpé gípíːton, bulu Bitiniaːpé gíaːpé émna ito, émpigeːla Jisuk Yalodé bulum gíaːmotomang. 8 Édémpila bulu Maisiadém gíbadla gíla Toroaspé gítokkang. 9 Odo yumédo Polbí Mesodonia taniːko dagla kumna duːdopé kangorko kaːto, "Mesodoniaːpé gíla ngolum moturbikunam agomdém kindopé ka:dumsutei." 10 Polbí kangordém kaːnam lédupé, ngolua Mesodoniaːpé gípé émna oddar lento, Ruːnébí ngolum tatpon lutaddém bulum lugoːbidopé goktag émnamdém ngolu kinsékto.
Pilipi Nogordo Lidiaːké Aːnam
11 Ngolu Toroasdokké bottén-olluːlo Samoteraspé koːla gíto, odokké longkondo Niopolispé kongaːto. 12 Odokké ngolu Mesodonia mongkéːdok Pilipi nogorpé gíto, Pilipidé odok aiyyapagné nogorai odokké Ruman kolonikaib. Odo ngolu bojékopé duːto. 13 Yoddo longédo ngolu nogor séːturdok ruːyipé abung ragodoːpé gílento, odo ngolu kumkoko pangkandag émna méːto. Ngolu tedla odok gíkumsuné mimékídíːdém doːyíngém kíbito. 14 Doːyíng tadladuːné mimékolok aminém Lidia émtagai, bí Taiatira nogordok baːyomné galug-gasorém konékai, bí Ruːnémésin kumtinsudagai. Ruːtumbí bík asiném Polké kíbinam doːyíːdém tadla toríksudopé mogebito. 15 Édílo bíːlaː bík okum-érangé baptisém laːton, bí ngolum bík okumdoːpé sémpé lula goglíkto. "Nolu ngom Ruːtummé méngkésunéko émna méːdagmílo, ngok okumdoːpé gíla duːteika." Odokké bí ngolum méttoimang.
Polmélaː Sailasmé Makanaːlo Tumnam
16 Longéko édílo ngolu kumkokoloːpé gíla dungngan, ngolum pagnékoné ríksuto sékké aiman yaloko dungngai okodé bím yampo-roːké agomém lunoːbimolaːdaggai. Édémpé yampoké aːpéné agomém lunoːbila bí bík ruːtumdok légaːpé bojéko murkongém paːbidungai. 17 Bí Polkélaː ngoluk lédílo gímínna, sémpé jéːla luto, "Sé: taniːkídíːsé Tayéngartok Duːné Ruːnék pagbo, séːkobulu nolum moturbikunam pangko lambédém lubidag." 18 Bí édémpé bojékopé luyarto. Odokké Polbí ngerra ngengkutsula édé yalodém luto, "Ngo Jisu Kiristok aminno nom ludung no bíkkolokké gílenkangǃ" Odo ayírrado yalodé bíkkolokké gílenkangku. 19 Édílo bík ruːtumkídíːdé murkong paːnan akangé kamaːbo émna kinton, bulu Polmélaː Sailasmé edgabgeːla ilang-gílangkané taniːkídíːdém kaːríksudopé réko-koko araːdoːpé sobomto. 20 Bulu bulum kébaːmigomkídíːdok kanggaːdoːpé soabomgeːla luto, "Séːbulu Jiudi taniyé, odokké bulu ngoluk nogorsém urradmodung. 21 Bulu ipaːmaːnamém luyírra dung, okodém Ruman taniyé tolíksinnamang odokké ilaːsinmang, kapilaːné édébulu ngoluk ilot-gílodlok angupé gídag." 22 cOdo kéréːdé Polmélaː Sailasmé moanékídíːdok lédílo moamínto.
Kébaːmigomkídíːdé buluk galugém bupedgeːla bulum díːdopé lulíkto. 23 Bulum kínggípé díːnam lédupé, makanaːlo tumto, odokké jeilordém bulu aiyyopé kanggabdopé lulíkto. 24 Édémpin torné lulígnamko paːnamé, bí bulum makanaːdok araːpakké soyardo buluk alékídíːdém taktané ísíng tuːnyikolok pongkodo yenggabla léːto.
25 Yumédé kídísukoko gídodo Polbíːla Sailasbí kumnam niːtom gogla Ruːnémé kumna dungngai, makanaːdok duːné akonkídíːdé buluk niːtom monamdém tadbekto. 26 Odo bagémpé kínggín taromotonko tonna makanaːdok aksaːnamkídíːdém rébumoto. Odokké lékkopé makanaːdok yabgo appíːdé síggeyamsukang, odokké makanaːdok duːné appíːdok ikoliːkídíːdé kokpagamkang. 27 Édílo Jeilordé kinsula makanaːdok yabgokídíːdé síggeːla duːdopé kaːton, bí aíé níkkesula sipé émna bík yoksaːdém sadlento kapilaːné makanaːdok duːné appíːdé dukpagamkangku émna bí méːto. 28 Émpigeːla Polbí jéːla luto, "No aíé atíkosin isuyokǃ Ngolu appíngé séː dungǃ"
29 Jeilordé píamodopé lulíkto, araːdoːpé lomdanna dugaːla Polkélaː Sailaské kanggaːdo pésola jinna oangkang. 30 Odokké bí bulum moːroːpé gílenbogeːla luto, "Abukídínga, moturbinamdém paːnam légaːpé ngo okkom ipaːyén?"
31 Bulu lulatsutoku, "Ruːtum Jisumé méngkésutok, odo nomnaː nok okum-érangém moturbiyé." 32 Odo bulu bímnaː bík okumdok duːné appíngém Ruːtumké doːyíngém kíbito. 33 Édé yumíːdo jeilordé bulum gílenbotoku odokké buluk tarékídíːdém írpubito; odokké oddar bíːlaː bík okum-érang appíngé baptisém laːto. 34 Jeilordé bulum bík okumpé gíbolangkula bulum dobo-tíːboto, bíːlaː bík okum-érang appíngé Ruːnémé méngkésupaːnam légaːpé airuːpé méːpokang.
35 Émpigeːla longkon rokomdo kébaːmigomkídíːdé buluk sipaiyém sémpé lulígla mélíktoː "Édé taniːkídíːdém mélenníktoku."
36 Jeilordé Polmé luto, "Kébaːmigomkídíːdé lulíktag nomnaː Sailasmé mélígdokupé. Édémpila suːpag nolu gílaːdakkubo. Ansíngo:pé gíkangku."
37 Émpigeːla Polbí sipaikídíːdém lutoː "Ngolum kébangko baːmaːpé bulu taniːkaːpé díːtag odokké ngolu Ruman taniːpé ilaːsin ngolum makanaːlo tumto. Odokké suːpag bulu ngolum léːsíːla mélíkkupé émna idun? Ngolu sémpé gíkumaːyéǃ Bulu aíkídíːdé gíla ngolum sokké gílenbopaːyéku."
38 Sipaikídíːdé kébaːmigomkídíːdém édé agomdém lubitoku, odokké édílo bulu bulum Ruman taniyé émna tadbeksuton, odo bulu péssamkang. 39 Édémpila bulu gíla bulum méːyinsubilangka émna kumto. Odokké bulu bulum gílenbogelangkula nogordém mépagla gídokupé luto. 40 Édémpila bulu makanaːdokké gílennangkula Lidiaké okumpé gítoku; odokké édílo bulu bírrangkídíːdém ka:ríksutoji, bulum lusang agom lubito odokké bulu gípakkangku.