Jerusalemdo Mirum-Kébang Ba:nam
15
aOdo ayírdo tani ékké Judiadokké Entiokpé gítogla méngkésunékídíːdém luyírbila dungngaiː ''Nolu Musiːké luyírbikampé gatpugnamdém gatpugmaːmílo, nolu moturbinamém paːmaːyé.'' 2 Édé luyírnamdém Polbíːlaː Barnabasbí lutumto odokké buluk araːlo lukerkaːmínsuko lenkang. Édémpila Polmélaː Barnabasmé odokké méngkésuné ajon-akelok lédílo Jerusalempé gíla sé: agomsém tatsarnam légaːpé mélígnamkídíːdémnaː midumkídíːdém kaːríksudopé tolíkto.3 Kumgodok taniːkídíːdé bulum gídopé mélíkto, odokké bulu Poinisiadoglaː Somoriadok gípadla gíto, odokké Jiudiman tani:kídíːdé kapé Ruːtumkolo aːngkan édém lubila odok duːné bírrangkídíːdém bulu airuːpé méːpomoto. 4 Édílo bulu Jerusalempé gípíːtoji, odo bulum kumgodok taniyé odokké mélígnamkídíːdéːla midumkídíːdé boríksuto, odokké Ruːnébí oko oko agerém bulukkokki gertoji édé appíːdém bulu lukanbito. 5 Émpigeːla Parosi opedok méngkénsuné ékké dagrobgeːla luto, ''Jiudiman taniːkídíːdé gatpukpé lagidag odokké bulum Musiːké luroːdém ibomdopé lulíkpé lagidag.''
6 Édémpila mélígnamkídíːdélaː midumkídíːdé édé agomdém ruːségnam légaːpé gípumsuto. 7 Bojéruːngko lukaːmínsunam lédupé, Pitorbí dagrobgeːla bulum lutoː ''Bírrangkídínga, nolu kindag longkuːbo noluk araːlo Ruːnébí ngom balento, Jiudiman taniːkídíːdé ngok nappangki tatpon lutaddém tadgeːla Ruːnémé méngkésudopé. 8 Ruːnébí appíngké asin-agomém kindag, bí ngolum Angunné Yalomé kapé bitagji, édémíːpé Jiudiman taniːkídíːdém bila bík toríksunamdém léngkanbitag. 9 Bí ngoluglaː buluk pongkolo angumang émnamdém léngkanbitag, odokké buluk asiném méːjíkki mopubito. 10 Odok-légaːpé, ngoluk abukídíːdéːla ngolu oko jungolidém joːlaːmaːji, édé joːlamaːnamdém Jiudiman méngkésunékídíːdok gordudo joːlíggeːla nolu suːpag kapila Ruːnémé ankaːdun? 11 Ngolu Ruːtum Jisuké aséːlo moturbinam pangkamíːdémpé bulusin paːtag émna ngolu méngkésudag."
12 Barnabaskélaː Polké lunamdém tadgeːla gíkumsuné appíːdé aso:pé dungapkang, Ruːnébí kapé binyikkokki méːpílaːmaːnam agerémnaː kanggodém Jiudiman taniːkídíːdém léngkantoji, édé appíːdém bulu bínyíkolok tatto. 13 Édílo bulu lungaptoji, odo Jemsbí lusangkangː ''Bírrangkídínga, ngok lunamsém tatpong. 14 Simon Pitorbí ngolum lubito kapé Ruːnébí Jiudiman taniːkídíːdém ayangém léngkanpoːton odokké bík aíké taniːpé idopé Jiudiman tanikídíːdok araːlok akkem balenton. 15 Édém kapé adla léːtang, lungor-lunékídíːdok lunamkídíːdé odok lédílo lékodagː
16 b 'Odok lédupé ngo gíladyeku
odokké Debitké omígla duːné poːyubdém mosíːbiyeku.
Odok openna duːnékídíːdém ngo mosíːbiyeku,
odokké ngo édém motenbiyeku,
17 duːpagné taniːkídíːdé odo Ru:tummé mayekupé,
odokké ngok aminki gognam Jiudiman taniːkídíːdéːsin maːtéla mayéku.
18 Séːko sémbulum motang, po:péloboi bí kinabdag.'
19 Odok-légaːpé, séː ngok méːnamé, Jiudiman taniːkídíːdé séːkobulu Ruːnékoloːpé gíadungkun bulum mokimoadnamdé ngoluk légaːpé ainé agermang. 20 Édémpimap ngolu bulum uiːlok joːsagém doma:dopé, langgonamnokké moːté:pé duːdopé, yumpednam simín-sirolok adin doma:dopélaː íːyém tíːma:dopé adlíkpénamé.c 21 Kapéné Musi:ké édé luroːkídíːdém lekelokkébong appíng nogorroi lugoːbitíla dung odokké édém murong-okumkídíːdo Yoddo longé appíngém podag.''
Mirum Kébaːdok Jiudiman Méngkésunékídíːdoːpé Adlígnam Doːjígdé
22 Odo mélígnamkídíːdéːla midumkídíːdé, kumgodok tani appíːdok lédílo, buluk aíké taniːkídíːdok akkem balenna Polkélaː Barnabaské lédílo Entiokpé mélíkténgkupé émna ruːsékto. Bulu Barsabbas émnam Judaːmélaː Sailasmé balento, bínyi annyidé bírrangkídíːdok araːlok ménggésunam taniːai. 23 Buluk lédílo kéíkké doːjígbém mélíkto:
Entiogdok, Siriadok odokké Silisia mongkédok duːné takam Jiudiman méngkésuné bírrangkídíːdo:pé,
mélígnamkídíːdéːla midumkídíːdé, noluk bírrangkídíːsokké,
Asin-aséngém séglígdung. 24 Ngolukkosoːkké ngoluk lulígmaːpé taniː ékké gíla nolum luyírra noluk asiném méngkup-méːladmola odokké nolum ngasodmodung émnamdém ngolu tatpaːsudung. 25 Édémpila ngolu appíngé lékkopé ruːségbosula taniː ékkém ngoluk méːbomsunam ajon Polkélaː Barnabaské lédílo mélíktépé émna balento. 26 Polbíːlaː Barnabasbí ngoluk Ruːtum Jisu Kiristoké amindok légangé aíké turnam tayéːdo bojéruːngko ngasodém paːsudung. 27 Odok-légaːpé ngolu Judaːmélaː Sailasmé mélígdung. Bulusin édé agomíːdém buluk aíké nappangki lubiyépé. 28 Kapéné Angunné Yaloképélaː ngolukképé sémpag aidopé kaːdung, laginamdok ruːyipé noluk tayéːlo okkomsin géjémmaːyéː 29 Nolu uiːlok joːsagém doyok, odokké yumpednam simín-sirolok adinémnaː íːyém tíːyok, langgoyok. Séː agerkídíːsokké moːtéːpé duːlang odo nolu puːpojaryé. Sa: aipé.
30 Édílo taniːkídíːdém mélenníkton bulu Entiokpé gítokkang, okolo bulu méngkésunékídíːdém gíkumsumogeːla doːjígdém bito. 31 Odokké édílo bulu doːjígdém potoji, lusang agomdém tatpaːla bulu airuːpé méːpokang. 32 Odokké Judaːbíːla Sailasbí, bulu aídéi lungor-lunné, bírrangkídíːdém bojéko lusang agomém lubila bulum kínggíːmoto. 33 Odo asudoukopé duːnam lédupé, bírrangkídíːdé bínyim méːpola ansíngo:pé ayangém bila mélígnékídíːdoːpé bínyim méladlíktoku.d
35 Émpigeːla Polbíːlaː Barnabasbí Entiogdo duːtétto, okolo bululaː bojéko akon taniːyésin Ruːtumké gomugém luyírbila lugoːbito.
Polkélaː Barnabaské Gípansunam
36 Odok asudouko léddoupé Polbí Barnabasmé luto, ''Kapé bírrangkídíːdé ila duːji, okolo ngolu Ruːtumké doːyingém lugoːbikan, kajé ngolu édé taon appíːdoːpé gíladla kangkakujé." 37 Barnabasbí Mark émnam Jonmé buluk lédílo gímínbolíːto. 38 Émpigeːla Polbí méːto, Margmé gíbonamdé aimaːyé, kapila:né Pampiliaːdo bí bulum mépagla gílatkangku, odokké buluk lédílo agerdém geryartokumang. 39 Odok légangé bínyik araːlo aigampé lukarkaːmínsukang, édémpila bínyi gípansukang. Barnabasbí Margmé gíbola Saiparaspé bottén-olluːlo koːla gíkang. 40 Émpigeːla Polbí Sailasmé gíjonsupé balento, odokké bírrangkídíːdé bínyim Ruːtumké aséːlo tolígbito. 41 Bí Siriadoglaː Silisiaːdok gípadla gíla kumgokídíːdém kínggí:moto.