Aikoniamdo
14
Odokké Polbíːla Barnabasbí loːdíké gíkamíːpé Aikoniamdo murong-okumpé gíto. Odo bulu airuːpé tadyumsudopé doːyíng kíbinammé bojéruːngkopé Jiudiéla: Jiudiman taniyé Ruːtummé méngkésuto. 2 Émpigeːla méngkésuman Jiudikídíːdé Jiudiman taniːkídíːdém méngkésuné bírrangkídíːdok kekonpé buluk tukkudo yogmom pílígla luːurríkto. 3 Émpigeːla Polbíːla Barnabasbí odo araigampé duːla pésomaːpé Ruːtumké doːyíngém lugo:bito. Odokké bík aséngki buluk lubinam doːyíːdé arro émnamdém Ruːtumbí léngkanbila bulukkoki bojéko mé:pílaːmaːnam agerémna kanggodém léngkanto. 4 Émpigeːla nogordok taniːkídíːdé baːnyikopé ikang; akke Jiudikídíːdém odokké akedé mélígnamkídíːdém kédumsuto.5 Odo Jiudiman taniːkídíːdéːla Jiudikídíːdé buluk mirokídíːdok lédílo lékola Polmélaː Barnabasmé moa:la ílíngki gépé émna ruːsékto. 6 Émpigeːla bulu édém kinna Laikonia mongkédok Listara odokké Darbe nogordoːpéla kérangké moːtakkídíːdoːpé dukpakkang. 7 Okolo bulu tatpon lutadém lugoːbito.
Listaradoːla Darbedo
8 Listarado lambé-gílaman taniːko dungngai, séːko ododokkébo lébedaggai. 9 Bí Polké lunam agomkídíːdém tadmiːla tatto. Bíkké ésangkunan méːjíksunamé dung émna kaːla, Polbí bím béryodmaːpé kaːto. 10 Odokké bí bottégampé jéːla luto, "Nok aíké alédokki daksuto." Odokké taniːdé sumsaːla dagrobla lambémgíropkangǃ" 11 Okkom Polbí itoji édém édílo taniːkéréːdé kaːton, bulu Laikonia agompé jéːla luto, "Ruːnébulu ngolukkoloːpé tani kísapé togyidoǃ" 12 Barnabasmé bulu Jeus émníkto odokké Polmé Ermes émto kapilaːné bí abíné doːying-kíbinédé:ai. 13 Odokké nogordok kérangopé duːné Jeuské kumli:dok mirídé, taniːkídíːdok lédílo palígnamko palígla kumpé méːla nogordok séːturdoːpé soːbomna: appun doksoriém bomna gído.
14 Émpigeːla édílo mélígnamkídíːdé Polbíːlaː Barnabasbí édém tadbektoji, bulu buluk galugém bupetsula taniːkérédoːpé duglenna jéːla lutoː 15 a"Taniːkídínga, nolu kapila sémpé idun? Ngolusin nolugíngkémpin émmum taniyé. Ngolu nolukkosoːpé tatpon lutadém bombitag, séː aré kaman agerkídíːsém mépagla turné Ruːnékoloːpé gílattoku, séːko tayéng-amoːtém, moːpísém odokké gaːném odokké odogbuluk duːné appíngém ruːnédé. 16 Lekkem, bí appíng réngamém buluk aí aíké méngkampé gímodungai. 17 Émgom bí aíém lukanbipénam kamaːpé mémangː kapéné bí doːmírtokké nolum podongém omola odokké appíng bírduglo apíaːyém eːmola ainém ibidung. Bí nolum píːdopé donam-tíːnamém bidag odokké noluk asiném méːpolo píːsíːmodag." 18 Édé agomkídíːdokki bulu taniːkídíːdém kappo:uji palígmaːdopé lutumto.
19 bÉmpigeːla Entiogdokkélaː Aikoniamdokké Jiudi ékké gíla taniːkérédok asiném méːlatsumotoku. Bulu Polmé ílíngki géla bí sikang émna méːla bím nogordok ruːyipé solenbomkang. 20 Émpigeːla gímínnékídíːdé bím dagyednam lédupé, bí dagropkangku odokké nogordoːpé gílattoku. Longkondo bíːlang Barnabasbí Derbepé gíkang.
Siriadok Entiokpé Gílattokunam
21 Édílo bulu tatpon lutaddém édé nogordo lugo:bitoji odo bulukkolo bojéruːngko gímínném paːto. Odokké bulu Listarapé, Aikoniampéla: Entiokpé gílattoku, 22 gímínnékídíːdém kínggí:mola odokké bulum arodo méːjíksula duːyardopé lusang agomém luyírto. Odokké bulu luto, "Ruːnék migomdokodoːpé gía:la:nam légaːpé ngolu bojéruːngko ngasodém doparuːyé." 23 Polbíːla: Barnabasbí méngkésunékídíːdok légaːpé kumgo ako akolo midumém menna kumgeːla tolíkto. Odokké séːkobulum bulu méːtinsuladaggaːji bulum Ruːtumké alaglo tosa:líkto.
24 Odok lédupé bulu Pisidiadok gípadla, Pampiliapé gíto. 25 Odokké bulu Pergaːdo doːyíngém kíbigeːla, Attaliapé gítokkang. 26 Attaliadokké bulu Entiokpé bottén-ollungki koːtoku, okolo bulum suːpakké gerrednam agerdém gerdopé Ruːnék aséːlo kaːsídopé tolíkka.