Barnabasmélaː Solmé Ager-gerdopé Tolígnam
13
Odo ayírdo Siria Entiok kumgodo lungor-lunnélaː luyírné dungngai. Édébulu Barnabasbí, Niguru émnam Simonbí, Sirinidok Lusiabí, Manainbí, séːko migom Erodmé lékkopé síːsajonsukaːji odokké Solbí. 2 Édílo bulu Ruːtumkolo menna kumna dungngan, odo Angunné Yalobí bulum luto, "Ngok légaːpé Barnabasmélaː Solmé langutei oko agerdok légaːpé ngo bínyim goktang."3 Édémpila bulu menna kumnam lédupé, bulu buluk alagém bínyik tayéːloa pigabla kumbigeːla bínyim mélíkto.
Saiprasdo
4 Édémpé, Angunné Yaloki mélígnammé, bínyi Seleusiapé gítokkang odokké bínyi Saipras bogléːdoːpé bottén-olluːlo koːla gíkang. 5 Édílo bulu Salamispé gípíːtoji, bulu Jiudikídíːdok murong-okumkídíːdo Ruːnék agomém lugoːbito. Odokké Jonbí bulum gerdumsula buluk lédílo du:to.
6 Édíloːpé bulu Papospé gípímangan, bulu Saipras bogléːdém gíkurra gíto. Paposdo bulu Bar-Jisu émnam Jiudi moyakinnékolaː aroman lungor-luné taniːko ríksuto, 7 séːkobí amo:ru:tum Sargia Pouloskolo duːmíndaggai. Amoːruːtumdé airuːpé kinné-paːné taniːkai, bí Ruːnék agomém tadlíːla Barnabasmélaː Solmé gogmoto. 8 Émpigeːla moyakinné Elimasbí (kapéné éddéi bík amindok légíːdé) buluk kekonpé dagrobla amoːruːtumdém méːjíksunamdokké gíyodbopé émna ikíto. 9 Odo Solbí, séːkom Polésin émtang, bí Angunné Yalolo píːsíːla, Elimasmé kangírra kanggeːla luto, 10 "No Uiːké aoːo odokké appíng ainé agerrok mirukoǃ Nok asindo appíng aromaːnélaː aisíːmaːné biːla dung. No Ruːtumké yig émné lambésém géːyodmokípé émna méːnamdém mémabo:nei? 11 Odokké suːpag, kangkíto, Ruːtumbí bík alagém nok kekonpé laksaːdung. No miglupo:yé, odokké doːnyiké píangém no asudoːuko kaːbekpoːmaːyé."
Odo bagémpé bík tayéːlo muksubmugyubélaː kémmo aːngkang, odo bí bík alagdok sobomna gíbokun taniːko maːsumaːmula mago:to. 12 Édílo amoːruːtumdé okko kapika:ji édém kaːton, bí méngkésuné taniːpé ikang, kapilaːné Ruːtumké tayéːlo luyírbinamdém tadla bí tadngaksuto.
Entiogdok Pisidiaːdo Lugoːbinam
13 Odok lédupé Polbíːlaː bík ajonkídíːdé Paposdokké Pampiliadok Perga taonpé bottén-ollungki koːla gíkang. Odokké Jonbí bulum mépagla Jerusalempé gílatkangku. 14 Pergadokké bulu Pisidiadok Entiokpé gíkang. Odokké Yoddo longédo bulu murong-okumpé gíaːla tedmínto. 15 Musiːkéb Luroːdokkémnaː Lungor-Potinkídíːdok ponam lédupé, murong-okumdok migomkídíːdé bulukkoloːpé agomko sémpé lula mélíkto, "Bírrangkídínga, taniːkídíːsém nolukké oːkai lusang-agom lupénammé duːmílo, saː luta." 16 Édémpila Polbí dagropkang, odokké bík alakki pédyabgeːla bí lutoː
"Israel odokké Jiudiman taniːkídínga, séːkobulu Ruːném kumdoji, ngok lunamsém tatpongǃ 17 c Israel taniːlok Ruːnébí ngoluk abukídíːdém balento; bí bulum Ijibbok duːdodém puːpojarmoto, odokké kinggíːné tornamki bí bulum édé mimo:dokké gílenbotoku. 18 fBí bulum sullipotadod yíːpi dítakopé buluk abu kísapé kaːsítoe. 19 Bí Kanan mongkédok duːné kínítko taniːopíném motapto odokké buluk dungko amoːdém bík tani Israelkídíːdém panggopé bito. 20 Odo appíːdo língko appiːkolaː yíngo dítakko gíbatkang.
Odok lédupé lungor-luné Samuelké longékídíːdoːpé Ruːnébí bulum kébaːmigomkídíːdém tolígbito. 21 Odo taniːkídíːdé migom ako koto, édémpila bí Benjamin opíndok Kiské ao Solmé bulum bito, séːko yíːpi dítakko migom doka. 22 gSolmé laːpagnam lédupé, bí Debidmé buluk migompé domoto. Ruːnébí bík tayéːlo lukanbitoː 'Ngo ngok asinsok méːlíksunam Jesiké ao Debidmé paːto; ngo okkoméi bím imolíːdagji bí édém iyé.'h 23 Bík lusunamdémpé bí sé: taniːsok ommaːlokkém Israeldoːpé Moturbikun Jisum mélíkto. 24 Jisuk gímangoːdapé Jon baptisbí Israel taniː appíngém buluk paːblokké méngkutsulai baptis laːnam doːyíngém lugoːbito. 25 jJonbí bík agerém geramdíːdo, bí lutoː 'Ngo séːkobí émna nolu méːdon? Ngo édé taniːdéma. Bí ngok lédupé gíla dung, sék létagdok ríbídémsin tasarnam arré ngokké kamang.
26 Bírrangkídínga, Abraamké ommangkídínga, odokké Ruːnémé pésoné Jiudiman taniːkídínga, sé: moturbikunam doːyiːsém ngolukkoloːpé mélígbitag. 27 Kapéné séːkobulu Jerusalemdo duːji odokké buluk migomkídíːdé, bulu Jisumé kangkinmaːnammé, lungor-lunékídíːdok lunamémsin tatkintomang, okkom Yoddo longélo loːdém podoji, édémbulum bulu bím imurnép-sabnamki ilet-gíletto. 28 Bulu bím mokepénam légang aːkosin paːtomang; émdaggom bulu Piladmé bím mokedopé lumo lumola lulíkto. 29 Édílo bulu bík légangé adla léːnam agom appíːdém ingapton, bulu bím ísíːdokkémk laːyitoku odokké bím agokolo léːto. 30 Émpigeːla Ruːnébí bím sikodokkém turmotoku, 31 odokké Galilidokké Jerusalemdoːpé bík lédílo gíjonsunékídíːdém bojé longékopé léngkansula duːto. Bulu suːpag taniːkídíːdok kanggaːlo lukanbikunépé ila dung. 32 Ngolu nolukkoloːpé tatpon lutaddém bomabidung okodém Ruːnébí ngoluk abukídíːdém lusubitang. 33 Jisumé sikolokké turmogekula édém bí buluk ommang, ngolukkolo ilet-gíletto. Édém kapé Niːtom potindok baːnyiné puyudo adla léːtuji édémarpéː
'No ngok Aoːo;
nom ngo silo otag.'l
34 Arodé Ruːnébí bím sikolokké turmotoku, odokké lékoda édíloːsin bím yaːdopé agodo mépagma émna bí lutoː
'Ngo Debidmé pesula léːbinam
angunnélaː aro ayangém nolum biyé.'m
35 nÉdémpé akon Niːtom potinnoːsin lutungː
'No nok Angunné Atérmé yaːdopé kaːmaːyé.'
36 Kapéné Debidbí Ruːnék méngkamdémpé ager gerra, bík ayírdok taniːopekídíːdém kaboné agerém gerrígbito odokké bí sikang. Bím bík abukídíːdok lédílo yusíːto odokké bík simaːdé yangkang. 37 Émpigeːla séːkom Ruːnébí sikolokkém turmotokuji bí yaːnamém kaːbektomang. 38 Odok-légaːpé, ngok bírrangkídínga, Jisukokki paːbém méːyinsubidag émnam doːyiːdém nolum lubika émnamdém ngo nolum kinnímodag. 39 Musiːké luroːdokki imur-kamang émna méːyisubilaːmaːnam appíːdokkém nom imur-kamang émna méːyinsubidag séːkobí bím méngkésuyéji. 40 Édémpila okkom lungor-lunékídíːdé lula léːtang édémpé nolukkolo imadopé, ansula duːlangː
41 o'Kaːtok, nolu lukanggoːnékídínga,
no méngaksula siyé;
kapilaːné ngo noluk longékídíːdo oːkaiko iyé séːkai nolum lubidaggomsin,
édém nolu édíloːsin arro émna méːmaːyé .'
42 Polbíːlaː Barnabasbí murong-okumdokké gílendokudodo, lékon Yoddí longédo édémbulum luyarbidopé taniːkídíːdé bulum goglíktoku. 43 Édílo murong-okumdokké taniːkídíːdé gípan-gíransukan, bojéruːngkopé Jiudiélaː Jiudipé aːné taniyé Polkélaː Barnabaské lédílo gímínkang, bulu buluk lédílo luposula bulum Ruːnék aséːdo duːyardopé lusaːlíkto.
44 Lékon Yoddo longédo Ruːtumké agomém tatkolo nogordok taniːappíːdéi gíbínkírampé gíla gíkumsukang. 45 Édílo Jiudikídíːdé kéréngkop gíkumsuné taniːkídíːdém kaːton, bulu kínggíːpé dígla Polbí okkom lukaːji odok kekonpé lukaːla lubomkang. 46 Odo Polbíːlaː Barnabasbí pésomaːpé bulum lulatsutokuː "Ruːnék gomugdém ngolu nolum lubipoːpénammai. Émpigeːla nolu édém topaksugeːla turyarné turnamdo nolukké arré kamang émna sappaksuto, édémpila kangkítok, suːpag ngolu Jiudiman taniːyém lubidung. 47 pKapéné Ruːtumbí ngolum édém idopé lulíktagː
'Ngo nom Jiudiman taniːkídíːdokképé píangkopé imotag,
odo nolu mo:písok duːtérdoːpé moturbikunamém bombiyépé."
48 Édílo Jiudiman taniːkídíːdé édém tatton, bulu méːpola Ruːtumké agomém luyitsuto; odokké séːkobulum turyarné turnamdoːpé tolígla léːtungan bulu appíːdé méngkésuto.
49 Ruːtumké agomém moːtagdok appíːloi lugoːngambito. 50 Émpigeːla Jiudikídíːdé kanésíːné Ruːnémé-pésoné mimékídíːdémnaː nogordok ménggésunam taniːkídíːdém luːurrígla, bulu Polmélaː Barnabasmé ipusiremoto odokké bulum édé moːtagdokké ménpakto. 51 Édémpila bulu buluk lékamém buluk kekonpé léngkanam kísapé lépaksuto odokké bulu Aikoniam nogorpé gíkang. 52 Odokké luyírsunékídíːdé méːpolo:la Angunné Yalolo píːsí:ngkang.