Ipusireːé Bojénam
12
Odo ayírdo migom Erodbí kumgodok taniːékkém ipusirepé émna méːla sogabmoto. 2 Bí Jonké bíro Jemsmé yoksaki pakemoto. 3 Odokké Jiudikídíːdé édílo édém méːyumsudopé bí kaːton, bí odo Pitormésin sogabdoːpé mélíkto. Édé kaːr lígmap pitang donam gíːdí ayírai. 4 Pitormé sogabnam lédupé, bí bím makana:lo tumto. Bím kanggabdopé appi-appikopé baːpiko maglíng opeːém bí tolíkto. Erodbí bím Gíboːla donam gíːdíːdok lédupé appíngké kangkolo kébaːbaːbipé émna méːto. 5 Édémpila Pitormé makanaːdo léːto, émpigeːla kumgo taniːkídíːdé asin-aːpíki bík légaːpé Ruːnékolo kumbila dungngai.Pitormé Makanaːdokké Gílenbokunam
6 Erodbí yampo Pitormé kébaːbaːpé émna méːdo yumédo, maglíng annyikolok pongkodo Pitorbí yubla dungngai, bím ikoli soːnyiki koggabla léːtaggai, odokké kanggabné gíangko yabgodo dagla dungngai. 7 Odokké kangkítokǃ Ruːtumké tayéng-yaːmeko odo dakkansuto odokké bík dungko soyardé píangkang. Bí Pitormé amírdok pirobla kinsumoto odokké luto, "Lomna, daroptoǃ" Odokké ikolikídíːdé bík alagdokké kokpagletkang. 8 Odo tayéng-yaːmedé bím luto, "Nok galug-gasorémnaː létagdém gélíksutok." Odo Pitorbí gélíksuto. Odokké tayéng-yaːmedé bím luto, "Nok gétémnam galugdém uːlíksugeːla ngok lédulo gímínto." 9 Pitorbí bík lédulo makanaːdokké gílenmíntoku, émpigeːla tayéng-yaːmedok inamdé arro émna méːmangai, bí kangorko kaːladung émna méːto. 10 Bulu daggépoːné odokké odok léduké dagné kangganékídíːdém gíbadla nogordoːpé gíanan yogír séːturdoːpé gípíːto. Séːturdé buluk légaːpé aí aídé síggesubikang; édémpila bulu lambékolok gíkurra gíkang, odo bagémpé tayéng-yaːmedé bím mépagla gípakkangku.
11 Odo Pitorbí kinsulangkula aíém lusuto, "Ruːtumbí bík tayéng-yaːmedém mélígla ngom Erotké alaglokkélaː Jiudi taniːkídíːdok ipé émna méːla duːnamdokkém mopítto, édém ngo suːpagpag méːmo kamaːpé kindung."
12 Édílo bí édém méngkintokun, odo bí Jon, séːkom Markésin émdon, bík ané Meriːké okumpé gíto, okolo bojéko méngkésun taniyé gíkumsula kumna dungngan. 13 Odokké Pitorbí ruːyarké yabgodém rankuːto, odo Roda émnam pagnékoné yabgodém síggebikolo gído. 14 Édílo bí Pitorké gomugdém tatkinto, bí méːpobatsula yabgodém síggebipénamdém mitpansula dugladgekula lubitoku, "Yabgoruːyélé Pitorbí dagla dungǃ" 15 Bulu bím luto, "No simatkang." Émpigeːla bí lungasumaːpé édé arro émna lutíto. Odo bulu luto, "Édé bík yalodéna."
16 Émpigeːla Pitorbí rantíla dung, odokké bulu yabgodém síggenammé bím kaːbeksula, bulu méngaksukang. 17 Pitorbí bulum asoːpé duːdopé bík alakki péttumto, odokké Ruːtumbí kapé bím makanaːdokké gílenbotokuji édém bí bulum lubito. Odokké bí luto, "Séː doːyísém Jemsmélaː bírrangkídíːdém lubipoːta." Odokké bí gíyodla okolaipé gíkang.
18 Pitorké okko kapikaːji émna roːrokomdo, maglíngkídíːdok araːdo aigampé urratkang. 19 Odokké édílo Erodbí bím matoji odo bím paːtomang, édémpila bí kanggabnékídíːdém tadétatkurgeːla bulum mokedopé lulíkto.
Odokké Erodbí Judiadokké Kaiseriaːpé gítogla odo bí asudouːkopé duːto.
Erotké Sinam
20 Odo ayírdo Erodbí Tayardoglaː Sidondok taniːkídíːdok tayéːlo kínggíːpé aglíngkang. Édémpila bulu lékogeːla taniːékkém bíkkodoːpé ansíːla duːjonsunam doːying kíbodopé mélíkto. Bulu Belastasmé, migomdok méːtinsunam pagbokoném luposula luyinsuto, kapilaːné migom Erotké mimo:dokké bulukkoloːpé donam-tíːnamé gídagai.
21 Tolígla lé:nam longédo, Erodbí bík migom génam-bomnamém gégeːla, bík migom-tetkodo tetto. Odokké taniːkídíːdém bík lupénamdém luto.
22 Odo taniːkídíːdé jéːla luto, "Séː taniːlog lunam agommang, émpigeːla ruːnékolokké lunam agomé."
23 Oddar, Ruːtumké tayéng-yaːmekoné Erodmé moato, kapilaːné bí Ruːnémé luyitsunam bimaːpé aíém luyitsuto; édémpila bím tapumé péngaːla bí sipakkang.
24 Émpigeːla Ruːnék agomém luyaro:biyato, édémpila bojéko taniyé aːsetkang.
25 Édílo Barnabasbíːlaː Solbí buluk gerpénam agerdém geramton, bulu Jonmé séːkom Markésin émdon gíbolangkula Jerusalemdokké gílattoku.