Jerusalem Kumgodo Pitorké Lubikunam
11
Odo ayírdo Ruːnék agomém Jiudiman taniːyésin toríksuto émna mélígnamkídíːdéːla Judiadok duːné bírrangkídíːdé tadbeksuto. 2 Édémpila édílo Pitorbí Jerusalempé gísaːtokun, gatpugnam opedok méngkésun ékké bím lukaːla, 3 luto, "No gatpugmaːnam taniːkídíːdok okumpé gíaːla buluk lédílo dojon-tíːjonsuka." 4 Émpigeːla Pitorbí bulum okko kapikaːji édém ako akopé lusarbitoː5 "Ngo Joppa nogordo kumna duːdodo, yummu-yupsula kangorko kaːto. Ngo oːkai bortan gasorémpiné aborko tayéng-amoːtokké odok suːpiːdok sogabla ledyiːdopé kaːto, odokké ngo okolo dungngan oddar édém ledyiːlíkto. 6 Édém ngo ngengaːla kaːnamé odo mo:písok alésoːpiné takam simíném, ngénggo-éggoném, odokké dénggoné péttangém kaːpaːsuto. 7 Odo ngo sémpé ludopé gomukko tatto, 'Pitor, daropto odokké édémbulum baːla dota.' 8 Ngo lulatsutoku, 'Ngo dogemang, Ruːtumaǃ Suanémnaː naréman okkosin siloloːpé ngok aki araːbopé aːngkímaːda.' 9 Odokké lékoda tayéng-amo:tokké gomugdé lutoku, 'Okodém Ru:nébí mopubituːji édém no angunnmang émyok.' 10 Édémpé léumkopé ikang, odokké odo édé appí:dém tayé-to:pé busabomkangku. 11 Odo ayírraːdo ngokkodoːpé, ngo oko okumdo dungngaji, Kaiseriadokké mélígnam taniːaumko gípí:do. 12 Angunné Yalobí ngom buluk lédílo gímínkupénamdém méngkupméladyok émna luto. Joppadok bírrang akkéngko ngok lédílo gímínka, odokké ngolu taniːdok okumdo gíaːto. 13 Odo bí ngolum lubito, kapé tayéng-yaːmeko bík okumdo dakkansugeːla luton, 'Joppadoːpé taniːyém mélígla Simonmé séːkom Pitorésin émdon, bím gogmota. 14 Bí nokkoloːpé doːyingko bombiyé okodokki noːlang nok okum-érang appíngé moturbikunamém paːyé.' 15 Ngo agomdém lurobbomnaméi, kapé bí gípongardodo ngoluk tayéːlo gíikaji édémarpé Angunné Yalodé buluk tayéːlo gíikang. 16 'Okodém Ruːtumbí luka, 'Jonbí asiki baptisém bika, émpigeːla nolum Angunné Yaloki baptisém biyé' émnamdém ngo odo méːpaːtoku. 17 Édémpila séːko Jisu Kiristomé méngkésuyéji, Ruːnébí ngolum binam lékkoné amandém bulumsin bimílo, émpém ngoːnu séːkon Ruːnémé lutumnaːpénédén?"
18 Édílo bulu édé lunamdém tatton, bulukké okkosin lusetpénamé katomang émpigeːla bulu sémpé lula, Ruːnémé luyitsuto, "Émpémílo Jiudiman taniːyémsin Ruːnébí turyarné turnamdém paːdopé méngkutsunammé bitung."
Entiokdo kumgom Laːlennam
19 Suːpag Istipenmé mokenam lédupé kumgom ipusirebomnamé méngkésunné dukpit-dugritsula tatpon lutaddém Jiudikídíngoːdém lugoːbila Poinesiaːpé, Saiparaspé odokké Entiokpé pínggéto. 20 Émgom bulukkolok akke Saiparasdokkélaː Sirinidokké Entiokpé gíla Jiudimana taniːkídíːdémsin Ruːtum Jisuké tatpon lutaddém lugoːbito. 21 Ru:tumké ayangé buluk lédílo duːnamé bojéruːngko taniyé Ruːtumkolo:pé méːtinsula angkang.
22 Buluk gerbomnam agerdém édílo Jerusalem kumgodok taniːkídíːdé tatpaːsuton, odo bulu Barnabasmé Entiokpé mélíkto. 23 Édílo bí gípíːla Ru:nék aséngém léngkannamdém ka:beksuton, bí airuːpé mé:pokang odokké buluk appíng asinki Ruːtumkolo arola duːyardopé bí bulum lusaːlíkto. 24 Kapéné bí ainé tani:kai, Angunné Yalolo pí:sí:la méːjíksunamno kínggín taniːkai, édémpila bojéko taniyé Ruːtumkolo aːsetkang.
25 Édémpila Barnabasbí Solmé magapkolo Tarsaspé gíkang. 26 Odokké édílo bí bím magapton, bí bím Entiokpé gíbotoku. Odo bínyi dítak ako kumgodo gíkumsuné taniːkídíːdém luyírbito. Odokké Entiogdo Jisukol luyírsunékídíːdém kiristan émna goggotpoːto.
27 Odokké édé ayírdo Jerusalemdokké lungor-luné ékké Entiokpé gítogdo. 28 Buluk ara:dok aːko, Agabasbí dagrobge:la Yaloki lungorém luto, moːpíso bottéru:né angkalko a:yé, odokké Kalaudiaːbí Ruman migompé doːdodo édé angkaldé angka. 29 Judiadok duːné méngkésunékídíːdém luyírsunékídí:dé aí aíké pagnamkíddíko bidumsupé émna ruːsékto. 30 Bulu édémíːpé ito, Barnabaskélaː Solké alaglo midumkídíːdoːpé amaném bilíkto.