Korneliasbí Pitormé Goglígnam
10
Kaiseria nogordo Kornelias émnam taniːko dungngai, séːko Itali rejimendok língko keptenai. 2 Bíːlaː bík okum-érang appíngéi Ruːnémé kumtinsudagai. Bí opaném bidumsudagai odokké Ruːnémé loːdém kumdagai. 3 Longéko yummayír aumné ayírkíramdo bí kangorko kaːto. Kangordo bí Ruːnék tayéng-yaːmeko naréngo:pé kaːbekto, odokké bí bíkkodoːpé gíla "Kornelias" émna gokto.4 Korneliasbí bím kaːmila kaːla pésola tauto, "Ruːtuma, okkon séː?"
Tayéng-yaːmedé lulatsutoku, "Nok kumnamémna opaném bidumsunamkídíːdé Ruːnémé méːyumsumodung, Ruːnébí nok kumnamém tadbitagbo. 5 Odokké suːpag Simon émnam taniːdém, séːkom Pitorésin émdo, bím gíbodokupé Joppadoːpé taniːyém mélíktok. 6 Bí suktam ager-gerné Simonké mibopé ila dung, Simonké okumdé gaːné kéraːdo dung." 7 Édílo bím lubiné tayéng-yaːmedé gíkangkuji, Korneliasbí bík pagbo annyiko odokké bím kaːsí-mosíːnékídíːdok arop-tolíksuné maglíng ako gokto. 8 Bí bulum okko kapikaːji édé appíːdém lubigeːla bulum Joppadoːpé mélíkto.
Pitorké Kangor Kaːnam
9 Longkondo lo:tung ayírdo bulu gíla nogordoːpé gípíngkíramdodo, Pitorbí kumkolo okum tayé:toːpé gísangkang. 10 Bí kénoːla o:kaiko dolíngkang, émpigeːla édílo bulu kéːlaréːbla dungngaji bí yummiːyuptapkang. 11 Odokké doːmírté sígge:la suːpiːdok sogabla oːkai bortané gasor kísanéko moːpísoːpé méilígnamko bí kaːto. 12 Odok ara:do takam aléso:pin simíné, éggo-ngénggoné odokké dénggoné péttangé dungngai. 13 Odo gomukko bím luto, "Pitor, daropto odokké édémbulum baːla dota."
14 Émpigeːla Pitorbí lulatsutoku, "Ruːtuma ngo dogemang; kapéné suanémnaː narémaːném ngo édíloːsin dokímang."
15 Odokké gomugdé lékoda bím luto, "Okkom Ruːnébí mopubituːji édém no naréma:né émyok." 16 Édémpé léumkopé ikang odokké lékkolo gasordém tayé-amo:to:pé bomsangkangku.
17 Édílo Pitorbí kanggordok légíːdé okkan émna méngaksula dungngan, odo kangkítok, Korneliaské mélígnam tani:kídí:dé Simonké okumdém magabla séːturdo dagla dung. 18 Odokké Pitor émnam Simonbí odo duːyé émna gokkaːto.
19 Édílo Pitorbí kangordém méːtímé:tíla dungngan, Angunné Yalodé bím luto, "Simon, tani: aumko nom maladung. 20 Édémpila darobla kéígbo:pé gítokkang. No buluk lédílo gímínpénamdém méːrasuyok, kapéné ngo bulum mélíktag." 21 Odokké Pitorbí gítogla tani:kídí:dém luto, "Noluk mala duːnam taniːdé ngoːna; kapila nolu gídungaːsong?"
22 Tani:kídí:dé lulatsutoku, "Ngolu kepten Korneliaské légaːpé gíbidung. Bí arolok-duːnékolaː Ruːnémé pésoné taniːko, séːkom takam Jiudi taniyé ménggésudag. No bík okumdoːpé gígeːla bím okkom lubiyéji édém bí taddopé angunné tayéng-ya:meko bím lubito." 23 Odo Pitorbí tani:kídí:dém okum ara:do:pé gogla mibo boto.
Pitorbí Korneliaské Okumpé Gípí:nam
Longkondo bí darobla Joppadok bírrang ékkém gíjonsula buluk lédílo gímíntoku. 24 Longkondo bulu Kaiseriapé gípí:to. Korneliasbí bík okum-érang taniyémnaː ope-négíngkídíːdém lékkopé gokkumsugeːla bulum toyaːla dungngai. 25 Édílo Pitorbí gíaːtoji, Korneliasbí bím ríksuto odokké bík alédo tungaːla kumto. 26 Émpige:la Pitorbí bím dagromogeːla luto, "Dagropto, ngoːsin tani:í:ngé." 27 Odok lédupé Pitorbí bím luposula okum ara:do:pé gíatoném bojéko taniyé gíkumsula duːdopé kaːto. 28 Odokké bí bulum luto, "Nolu kindag Jiudiman taniːyém duːjonsunamdéːla gímínsunamdé ngoluk Lurodok kekonpé inam ageré. Émpige:la Ru:nébí oko taniyémsin suamang narémang émna luyoka émna ngom léngkanto. 29 Édémpila édílo ngom gokkapé taniːyém mélíkkan, ngo okkosin émmapé gímíntag. Édémpila suːpag taupongkupé, "Oko ager légaːpé ngom gokkap mélíkkan?"
30 Odo Korneliasbí luto, "Lo:pi:kopé ika:bo séː ayíríːso ngo ngok okumdo yummayír aumné ayírdo kumnamém kumna dungngai. Odo kangkítok, tong émna unné galug géné tani:ko ngok kéra:pé dagaːdo. 31 Odokké bí luto, 'Kornelias, Ru:nébí nok kumnamém tadla nok opaném bidumsunamkídí:dém méːpaːdung. 32 Odok-légaːpé séːkaimé Joppado:pé Simon, séːkom Pitor émdoji gíríksudopé mélíktok. Bí gaːné kérangké suktam ager-gerné Simonké okumdo mibopé ila dung.' 33 Édémpila nom gogdopé oddar ngo taniːyém mélíkto, odokké no gído airuːpé aikang. Odokké Ru:tumbí nom oko okkom ngolum lubidopé lulíktang édé appíːdém tatpé émna ngolu su:pag appíngé so Ru:nék kéra:lo dung."
Pitorké Lubinam
34 Odo Pitorbí luto: "Su:pag ngo méngkindung Ru:nébí séːkomsin kéyamang édé arro. 35 Émpige:la bí appíng réngamnok taniːyém toríksudag, séːko bím pésola aro agerém gerdagji. 36 Israel taniːkídíːdok légaːpé séː tatpon lutaddé- Jisu Kiristo séːko appíngké Ruːtumbín, bíkokki asin-ansíngé dung. 37 Jonbí baptis doːyídém lugoːbinam lédupé, Galilidokké iyaːla, Judiadok appíːlo okko kapikan édém nolu kindag. 38 Odokké Ruːnébí Najaret Jisumé Angunné Yalokila tornamki írto édém nolu kindag. Odokké Jisubí gíla ainé agerém gerto odokké séːkobulum uiːyé paːla léːtagan bulum ésaːmotoku, kapilaːné Ruːnébí bík lédílo dungngai. 39 Jiudikídíːdok doːlungkídíːdoːla Jerusalemdo bík gernam ager appíːdok ngolu lukanbikunékídíːdé. Bulu bím ísíngkolo pítkela moketo, 40 émpigeːla loumné longédo Ruːnébí bím sikolokkém turmotoku odokké bím léngkansumoto. 41 Appíng taniːyém léngkantomang, émpigeːla ngolumong séːkobulum Ruːnébí lukanbikunépé balentoji, séːkobulu bík sikodokké turkunam lédupé bík lédílo dojon-tíːjonsukaːji. 42 Odokké bí ngolum taniːyém lugoːbidopélaː lukanbidopé lulíkto, bí édé séːkom Ruːnébí turnémnaː sinném kébangém baːdopé tolíktag. 43 Lungor-luné appíːdé bík agomém lukanbitag séːkoi bím méngkésuyén bík aminki bí paːblokké méːyinsunamém paːyé."
Angunné Yalodém Jiudiman Taniːkídíːdok Toríksunam
44 Édílo Pitorbí lulangí dungngan, séːkobulu bík agomdém tadla dungngan bulukkoloːpé Angunné Yalobí gíikang. 45 Pitorké lédílo gímínné gatpugnam opedok méngkésunékídíːdé Angunné Yaloké amandém Jiudimaːnémsin binamdém kaːla kangaksuto. 46 Kapéné bulu bulum angu agompé lula Ruːnémé luyitsudopé tatto. Odo Pitorbí luto, 47 "Angunné Yalomé ngoluk pangkamíːdémpé paːnékídíːsém baptisém bimadopé séːkai asimé lutumnaːyénei?" 48 Édémpila bí bulum Jisu Kiristoké aminno baptisém laːdopé lulíkto. Odo bulu Pitormé buluk lédílo asudoukopé duːmíndopé goktumto.