Solké Aːnam
(Ager 22.6-16; 26.12-18)
9
Odo ayírdo Solbí Ruːtumkol gímínné taniːkídíːdém morídgoːla mokeyé émna luːlomgoːdungai. Bí abíngaryan mirídoːpé gíla, 2 Ruːtumké Lambédok gínném séːkoméi paːyéji, néːngai milbongai bulum sogabgeːla Jerusalempé sobomna gíladokupé bíkkolok Damaskasdok murong-okumkídíːdoːpé doːjíkko jíglígbidopé koto.3 Édémpé bí gíbomna Damaskaspé gípíngkíramdungngaboi, odo bagémpé tayéːtokké píangkoné bím ladyétto. 4 Odo bí amoːboːpé kétpagletkang odokké gomukko bím lubidopé tatpaːto, "Soléí, Soːla, no kapila ngom ipusiredun?"
5 Odo Solbí tauto, "Séːkon no, Ruːtuma?"
Bí lulatsutoku, "Ngo Jisubí, séːkom no ipusireduːji. 6 Suːpag no darobla nogordoːpé gíangkang odokké no okkom ipéruːnamméji édém nom lubiyé."
7 Odokké Solké gíjonkídíːdé odo séːkomsin kaːpaːtomang émpigeːla gomugdém tatpaːsula agom-lumaːpé dagla dungapkang. 8 Solbí amoːdokké daropkang, émpigeːla édílo bí amigém darton bí okkomsin kaːbektokuma. Édémpila bulu bím alagdok sogabbila Damaskaspé gíaːboto. 9 Odokké loumkopé bí miglula duːla okkomsin doto-tíːtomang.
10 Odo Damaskasdo Anania émnam méngkésun taniːko dungngai. Ruːtumbí bím maːnyibo léngkansugeːla gokto, "Ananiaǃ"
Ananiabí lulatsuto, "Ruːtuma, ngo séː dung."
11 Odokké Ruːtumbí bím luto, "Darboge:la Yíg émnam lambédok Juda:ké okumpé gíkang, odokké Tarsasdok Sol émnam tani:dém taugo:lang, kapéné kangkítok, bí kumna dung." 12 Anania émnam tani:ko bíkkodoːpé gíla bí kaːbegdokupé bík alagém bík tayéːlo pigabbidung émna bí kangorko kaːto.
13 Émpigeːla Ananiabí lulatsutoku, "Ruːtuma, édé taniːdé nok langgunam taniːkídíːdém Jerusalemdo éddíko igítsimattoji odokké bík inam-gínamkídíːdém ngo bojéruːngkolok tattag. 14 Odokké séːkobulu nok aminém goktinsudagji bulum appíngém sogapkapé bí abíné miríkídíːdok adlígnamko bomna soːpé gídung."
15 Émpigeːla Ruːtumbí bím luto, "No gíkangǃ Kapéné bí ngok balennam taniːdé, séːko Jiudiman odokké migomkídíːdok lédílo Israel ommangkídíːdok kanggaːlo ngok aminém lugoːbiyé. 16 Bí ngok légaːpé éddíko duːgém doyéji édém ngo bím léngkanbiyé."
17 Odo Ananiabí gíla okumdoːpé gíaːto. Solké tayéːlo bík alagdém pigabgeːla bí luto, "Bíro Sol, Ruːtum Jisubí, séːko nom nok gíla dungko lambédo léngkansukaji, no kaːbegdokupé odokké Angunné Yalolo píːsíːdopé bí ngom mélíktag." 18 Odokké oddar, Solké amigdokké o:kai ngosígémpinéko opagletkang, odo bí kaːbekkangku. Odok lédupé bí daropla baptisém laːto. 19 Odokké dora-tíːrasunam lédupé, bí aiyokangku.
Damaskasdo Solké Lugoːbinam
Solbí Damaskasdo méngkésunékídíːdok lédílo bojéko duːmínto. 20 Odokké oddar Jisubí Ruːnék Aoːdé émna bí murong-okumkídíːdo lugoːrobbito.
21 Séːkobulu bík lunamém tatton appíːdé tadngaksula tauto, "Bí édé taniːdémaːnei séːko Jerusalemdo édé amindém goktinsunékídíːdém mopidmoridnédé? Odokké bí bulum abíné miríkídíːdoːpé sogabbombikupé soːpé gímangaːnei?"
22 Émpigeːla Solbí kínggí kínggíːla gíla, Jissubí Kiristobí émnamdém lusarbila Damaskasdok Jiudikídíːdém lukakto.
23 Édémpé bojéruːngko gíbadnam lédupé, Jiudikídíːdé bím mokepé émna ruːsuto. 24 aÉmpigeːla Solbí buluk ruːsunamdém kinto. Bulu bím mokepé émna longgém yummém nogordok séːturkídíːdo kéraːpé kanggola duːto. 25 Émpigeːla bíkkol gímínnékídíːdé bím yumédo gípagbola bím gempaki nogordok poka-bareːdok kuryaggeːla ledyilíkto.
Solbí Jerusalemdo
26 Odokké bí Jerusalempé gínam lédupé, méngkésunékídíːdém du:jonsupé émna inamé, bulu appíːdé bím péssamkang, kapilaːné bulu bím aropé méngkésunéko émna méːmangai. 27 Émpigeːla Barnabasbí bím gíbola mélígnamkídíːdoːpé gído. Solbí bík gíla duːdodo lambédo kapé Ruːtummé kaːtoji odokké Ruːtumbí bím okkom lutoji, odokké bí kapé Damaskasdo pésomaːpé Jisuk aminno lugoːbikaːji édémbulum lubito. 28 Édémpila Solbí buluk lédílo duːmínna Jerusalemdok appíːloi gígola Ruːtumké aminno pésomaːpé lugoːbito. 29 Girikpé luné Jiudikídíːdok lédílo luposula bí lumínsudungaːsin, émpigeːla bulu bím mokepé émna ikíto. 30 Édílo bírrangkídíːdé édém kinton, bulu bím Kaiseriadoːpé gítogboto odokké bím Tarsaspé mélíkto.
31 Odo takam Judia, Galili, odokké Somoria moːtagdok kumgokídíːdé asin-ansíngém paːto. Odokké méngkésunné aːsetkang; odokké bulu Ruːtummé pésoloːla Angunné Yaloké kínggíːmonamno bojé bojébomna gíkang.
Ainasmélang Dorkasmé Ésaːmokunam
32 Odok lédupé Pitorbí bulum doːlu doːluːlo gígola kanggoto, odokké bí gíla Laidadok langgunam taniːkídíːdémsin kaːríksukolo gítokkang. 33 Odo bí Aenias émnam taniːko ríksuto, séːko yéːla dítak piːnyiko kéddanna kila dungngai. 34 Pitorbí bím luto, "Aenias, Jisu Kiristobí nom aimodungku. Dagropto odokké nok asubdém pirsíːto." Odo Aeniasbí oddar dagropkang. 35 Laidadoglaː Sarondok taniːappíːdé bím kaːla bulu Ruːtumkoloːpé méːtinsula angapkang.
36 Odokké Joppa nogordo Tabita (okodém atsonsudokudodo Dorkas émna addo) émnam Ruːtummé méngkésunéko dungngai, séːko loːdém ainé agerém gerra opanném bidumsudagai. 37 Odo ayírdo bíkkolo kinamé aːla bí sikang, odokké édílo bík simaːdém írra bulu bím tayéngké soyarkolo jo:togla léːto. 38 Laiddadé Joppadokké moːtémangngai; édémpila édílo gímínnékídíːdé Pitorbí Laiddadok duːnamdém tatpaːsutoji, bulu taniː annyiko bíkkoloːpé sémpé kumdanna ludopé mélíkto, "Ayaːla lomdanna ngoluk lédílo gímínpoːtoku." 39 Édémpila Pitorbí darobdanna buluk lédílo gímíntoku. Odokké édílo bí gípí:toji bím tayéngké soyardoːpé gísaːbokang. Tumbo-néːng appíːdé bím duːyedgeːla kabbomkang odokké Dorkasbí turra duːdodo buluk lédílo sumjonsunam galug-gasorkídíːdém bím léngkanto. 40 Émpigeːla Pitorbí bulum appíngém gílenammogeːla lébíːtumna kumto; odokké simaːdoːpé íkaːla bí luto, "Tabita, daropto." Odo bí amig darra Pitormé kaːpaːsula tetkang. 41 Odo Pitorbí bím maːríksula sosato. Odokké bí méngkésunékídíːdémnaː tumbo-néːngkídíːdém gogangeːla bím turdopé bulum bitoku. 42 Édém Joppadok appíːdoi kinapto, odokké bojéruːngko taniyé Ruːtumkolo méːtinsula angkang. 43 Odokké Pitorbí Joppado Simon émnam suktam ager gernédok okumdo bojéko duːto.