Solbí Kumgom Ipusirenam
8
Istipenmé mokenamdém Solbíːsin tolíkténgka.Istipenmé mokedo longédo Jerusalemdo kumgo kekonpé bottéruːné ipusirenamko lenkang, odokké appíngé, mélígnamkídíːdok ruːyipé, Judiadoːla Somoriadok appíːloːpé dukpit-dugritsukang. 2 Ruːném tolíksun taniyé Istipenmé yusíːto odokké bík légaːpé airuːpé méːdírbito.
3 Émpigeːla Solbí kumgom modub-moyubropkang. Bí okum okumnoːpé gíaːla néːngém milbongém bolbodapé solenambomna makanaːlo tumto.
Somoriaːdo Tatpon Lutaddém Lugoːbinam
4 Émpigeːla séːkobulu dukpit-dugritsukaːji bulu dukté:doi tatpon lutaddém lugoːbito. 5 Pilibbí Samariaːdok nogorkoloːpé gítogla odo Kiristoké doːyingém lugoːbito. 6 Édílo gíkumsuné taniːkídíːdé Pilipké kíbinamdém tatton odokké bík méːpílaːmaːnam ager gernamkídíːdém kaːton, bulu appíːdé bí okkom kíbiduːji édém tadmiːla tatto. 7 Kapéné naréman yallo paːla léːnam bojéko taniːlokké yalokídíːdé bottépé jéːla gílenamkangku; odokké bojéko yéːnémnaː lébeném ésaːmotoku. 8 Édémpila édé nogordo bottéruːné mé:ponammé angkang.
9 Émpigeːla Simon émnam taniːko odo nogordo dungngai séːko lekkem moyadnam agerém gerdagai. Somoria taniː appíːdém bí aíé pakkísíkkíné taniːko émna moyadém léngkanna méngaksumodaggai. 10 Odokké abínélokké amenéloːpé Somoria taniːappíngéi bík lunamém tadmi:la tadla ludungai, "Séː amisé Ruːnéké tornamdé, okodém kínggíːné tornaméː émdon." 11 Kapéné bí bojé ayírkopé bulum bík moyatki méngaksunam agerém léngkanammé bulu bím tadmi:la taddagai. 12 Émpigeːla édílo Pilibbí Ruːnék migomdokodémnaː Jisu Kiristok aminno tatpon lutaddém lugoːbitoji, bulu méngkésuto odokké néːngai milbongai méngkésun appíːdé baptisém laːto. 13 Simonbíːsin méngkésula baptisém laːto. Odokké bí Pilipké lédulo appíːloːpé gímínna bottén kanggodémnaː mé:pílaːmaːnam agerkídí:dém kaːla bí méngaksuto.
14 Somoria taniyé Ruːnék agomém toríksudung émna édílo mélígnamkídíːdé Jerusalemdo tadbeksuton, bulu Pitormélaː Jonmé bulukkodoːpé mélíkto. 15 Édílo bulu gípíːtoji, Angunné Yalomé bulu pangkaːlangka émna buluk légaːpé kumbito, 16 kapilaːné odoloːpé buluk tayéːlo Angunné Yalodé sékkoloːsin gía:madaːai; kapéné bulum Ruːtum Jisuké aminoːngki baptisém bila léːtag. 17 Édílo Pitorbíːlaː Jonbí buluk tayéːlo alagém pigabbiton, bulu Angunné Yalomé paːto.
18 Édílo mélígnamkídíːdok alag pigabbinamki Angunné Yalodém binamdém Simonbí kaːton, bí bulum murkongém tílíggeːla luto, 19 "Ngo sék tayéːloi alagém pigabbiyéji, bíːéi Angunné Yalodém paːdopé, ngomsin séː ilang-gílanamsém biː."
20 Émpigeːla Pitorbí bím luto, "Nok murkongé nok lédílo yangkaːlangka, kapilaːné no méːdung Ruːnék amandém no murkongki paːlaːdag émnaǃ 21 aNgoluk séː lugoːbinam agerso nokké okkosin ajjiːkosin katémang, kapilaːné nok asindé Ruːnék lédílo narémang. 22 Odok-légaːpé nok séː aima:namsokké méngkutsutoku, odokké Ruːtummé kumpaːsuto. Odo pagmílo, nok asinbok méːnamdém mé:yinsubiyé. 23 Kapilaːné ngo kaːpaːdung nok asindé kogéla dígla dung odokké nom paːbé yedgabla léːtag."
24 Odo Simonbí lulatsuto, "Nok lunamkídíːdok oːkosin ngokkolo imadopé ayaːla Ruːtumkolo ngok légaːpé kumtei."
25 Édémpé bulu Ruːtumké agomdém lukanbila lugoːbito, odokké Pitorbíːlaː Jonbí Somoriaːdok bojéruːngko doːluːlo tatpon lutaddém lugoːbila Jerusalempé gílattoku.
Pilibbíːlaː Itupia Taniːdé
26 Odok lédupé Ruːnék tayéng-yaːmeko Pilibmé luto, "Daropto, Jerusalemdokké Gajapé gítogné péyangké lambéboːpé no gíkang." Édé sullipotadok lambédé. 27 Édémpila bí darobla gíkang, odokké gíla duːdodo lambédo bí Itupia magmaːnéko ríksuto. Bí Itupia rani Kandakiké ompoti appíːdém ka:sín migom-okumnok opisarai. Bí Ruːnémé kumkolo Jerusalempé gíka. 28 Odokké bí gure-gaːrikolo saːla odo tedla lungor-luné Jisoyaké potindok pola okumpé gíla dungngakui. 29 Odo Angunné Yalodé Pilibmé luto, "No gure-gaːridok kérang kéraːpé gímínna gíkang." 30 Odo Pilibbí bíkkodoːpé dugla gíkang odokké bí lungor-luné Jisoyaké potindok pola gínamém tadbegla tauto, "No okkom poduji, odok légíːdém kindoyé?"
31 Bí luto "Kapé ngo kinyén, édíloːpé séːkai ngom édém lusarbimaːyeji?" Édémpila bí Pilibmé gísaːla bík lédílo tedmíndoːpé goksaːto. 32 bMagmaːnédok pola gínam potindok potéːdé séːaiː
"Palígnédoːpé meːr kísapé bím soaːbomkang,
odokké amíd gidnédok kéraːdo meːr-aoːlok asoːpé dungkamdémpé,
bí bík nappangém énguntomang.
33 Bím méːtitto odokké aro-kébangém baːbitomang.
Bík ope-doːyíngém séːko lubilaːyén?
Kapéné mo:píso bím turyarmotomang.
34 Magmaːnédé Pilibmé tauto, "Lungor-lunédé séːkom ludun, bí aíém lusuduːyé séːkai akoném luduːyé, ngom ayaːsíla lukítei?" 35 Odo Pilibbí édé Ruːnék-gomug potéːdok agomdokki lurobbomna Jisuké tatpon lutaddém bím lubito. 36 Édémpé bulu gíyarra duːdodo lambé kéraːdo assém gípaːsula magmaːnédé luto, " Kangkítok, sidé assé dungǃ Ngom kapila baptisém bilamaːyén?" 37 Odo Pilibbí luto, "Aroruːpé asin-aːpíki no méngkésudumílo, oko agomésin kamang." Odo bí luto, "Jisu Kiristobí Ruːnék Aoːdé édém ngo méngkésudung."c
38 Édémpila bí gure-gaːridém dagmodopé lulíkto. Odokké Pilibbíːla magmaːnédé asiboːpé síngato odokké Pilibbí bím baptisém bito. 39 Édílo bulu asidokké gísaːtokuji, Ruːtumké Yalodé Pilibmé gípagbokangku, odokké magmaːnédé bím lékoda kaːpaːtokumang, émpigeːla mé:pola bík aíké lambédok gíkangku. 40 Émpigeːla Pilibbí lékoda Ajtus nogordo gíkansukaku odokké Kaiseriapé gípíːmaːdodoːpé appíng taonnoi tatpon lutaddém lugoːbito.