Ki:ni-kébaːdém Istipenké Lubinam
7
Odo abíngaryan mirídé Istipenmé tauto, "Nom lujémnam agomkídíːsé arroi?"2 aIstipenbí lulatsutokuː "Ménggésunam abu odokké bírrangkíddíng, ngok lunamsém tatpongǃ Unjígné Ruːnémé ngoluk tokuta:to Abraambí Aran mongkédo gíla duːmango:dapé édílo Mesopotemiaːdo dungngan, odo bím léngkansuto. 3 Odokké Ruːnébí bím luto, ''Nok aíké duːténgémna nok aítaniːkídíːdém mépagla ngo oko mimo:dém nom léngkanbiyéji odoːpé gíkang. 4 Édémpila bí Kaldia mongkédém mépagla gíla Arando duːropto. Odokké bík abudok sinam lédupé Ruːnébí bím soːpéb mélíkto, okolo suːpag nolu duːji. 5 Ruːnébí bím sido okkomsin bitomang, lépo tugapko among intakkosin bitomang. Émpigeːla Ru:nébi bím lusubika bíːlang bík ommangkídíːdé bík lédupé édé mongkédém pa:yé, odo ayírdo Abraamké ommangé kamadaːai.c 6 dRuːnébí bím sémpé lutoː 'Nok ommangkídíːdé bideki mimoːlo pam doyé. Édé moːdumdok taniyé bulum appiːlíngko dítakko pagbopé babola bagídbamadyé. 7 Émpigeːla Ruːnébí sémpé luto, 'Séːko bulum babokaji, édé mimoːdok taniːkídíːdém ngo mokemoramyé, odokké odok lédupé bulu gílennangkula séː mimo:so ngom kumyéku.' 8 Odok lédupé bí Abraammé gatpugnam luségdém bito. Odokké Abraambí Isaagmé oto, odokké piːnyiné longédo bím gatpukto. Odok lédupé Isaagbí Jakubmé oto odokké Jakubbí yí:laːnyi guːmíndok abupé ikang.
9 Opín-guːmínkídíːdé Jusebmé néla, bulu bím eIjibbo pagbopé idopé kopakto. Émpigeːla Ruːnébí bík lédílo dungngai, 10 odokké bím takam ngasodlokkém mopítto. Bí Jusebmé mé:joːnammém bito odokké Ijibdok migom Paroːkolok ayangém paːmoto; édémpila bí bím Ijip tayéːdogla bík migom-okum appíːdok tayéːdoːsin amoruːtumpé tolíkto. 11 Odo Ijibdogla Kanandok appíːloi angkalkola kínggín ngasotko aːnamé ngoluk abukídíːdé dogangém paːmaːpé ikang.f 12 Édílo Ijibbé dogangé dung émna Jakubbí tatpaːsutoji, bí ngoluk abukídíːdém odoːpé mégodlíkto. 13 Buluk lékon gíladdokudodo, Jusebbí bík bírokídíːdém bí séːkon édém lubisuto, odokké Paroːbí Jusepké okum-érang taniːkídíːdém kinto. 14 Odok lédupé, Jusebbí bík abu Jakubmé odokké takam ope-érang yíːnítkolaː anggok taniyém bík dungkodo:pé goglígla mélíktoku. 15 Odo Jakubbí Ijippé gítokkang, okolo bíːlang ngoluk taːtobulu sigékang. 16 gBuluk simangkídíːdém Sekemdoːpé bomtoku odokké Abraamké Sekemdo Amorké aoːkídíːdok murkongém bila réla léːnam agodo léːsíːtoku.
17 Ruːnéké Abraamé lusubinamdém ilet-gílednan ayírdé pínganammé, Ijibbo ngoluk taniːyé sabla-sabam langgékumapé bojébomkang. 18 Odo Jusebmé kinman anu migomko Ijibdo migom doto. 19 Bí ngoluk taniːkídíːdém yadmík-yatsíkto odokké anupé onam koːkídíːdé sidopé ngoluk abukídíːdém bolbodapé bulum yoblenmoto. 20 Odo ayírdo Musi:mé oto, Ruːnéké kanggaːlo bí airuːpé kangkanné koːkai. Odokké poːlo píumko bím bík abudok okumíːdo usaːto. 21 Odokké édílo bím okumdokké laːlenton, Paroːké omédé bím langanggeːla bík aíké ao kísapé usaːto. 22 Musiːmé Ijip taniːkídíːdok takam méːjoːnammém luyírbito, bík agomnoːla agerro tornam kadagai.
23 hÉdílo Musi:bí yíːpi dítakko idagabon, bí asinbo bík bírrang, Israelkídíːdém gíkala kangakapé méːto. 24 Odo Israel tani akoném Ijip taniː aːko ikisiyadopé kaːla, bí bím modumsuto odokké Ijip taniːdém mokegeːla alígém líkto. 25 Musiːbí méːto, bík aítani:kídíːdém Ruːnébí bíkkokki moturkunamém bidung émna kangkindopé, émpigeːla bulu méngkintomang. 26 Longkondo Israel tani annyiko pamínsula duːdopé Musiːbí kaːto. Bínyík pamínsunamdém mépagyépé méːla luto, 'Bírrangkídínga, nolu bírrangoːgela, kapila pamínsudun?' 27 Émpigeːla imurné taniːdé Musiːmé níngérgeːla luto, 'Séːko nom ngoluk tayéːlo migompélaː kébaːbaːbinépé tolíktang? 28 No mélo kapé Ijip taniːdém moketon édémíːpé ngomsinei mokepé méːdun?' 29 Édílo Musiːbí édém tatton, bí Midianpé dukpakkang, okolo bí pamdoné kísapé duːto odokké ao annyiko oto.
30 iYíːpi dítakko gíngabanam lédupé, Sinai adi kéraːdok sullipotado, dorra duːné míːmené-ísíng amíːdo tayéng-yaːmeko bím léngkansuto. 31 Édílo Musi:bí édém kaːton, bí ka:la kangaksuto. Odokké bí kéraːdokké kaːpé émna gínindodo, Ruːné Ruːtumké lunam gomukko tatpaːsutoː 32 'Ngo nok abukídíːdok Ruːnébí, Abraam, Isaak odokké Jakupké Ruːnébí.' Musiːbí pésola jinna ngeːsaːla kaːnan angé katomang. 33 Odo Ruːtumbí bím luto, 'Nok létagdém léyuktok; kapéné no okolo dagla duːji édé angunné lottaːko. 34 Ijibbo ngok taniːkídíːdém mogídmomadnamdém ngo kaːduːrung, odokké buluk sagígínamdém ngo tatpaːla bulum motukapé ngo togyitag. Odokké suːpag gítok ngo nom Ijippé mélígyé.'
35 Bí édé Musiːbí séːkom bulu topaksula luka, 'Séːko nom ru:tumpélaː kébaːbaːbinépé tolíktang?' Ruːnébí aíé bím buluk ru:tumpélaː gílenbokunépé, míːmené-ísíːdo bím léngkansuné tayéng-yaːmedokki mélíkto. 36 Bí Ijibdo, Líːné Gaːnédoːla sullipotado yíːpi dítakko bojéko méːpílaːmaːnam agerémna kanggodém léngkanna bulum Ijibdokké gílenbotoku. 37 Bí édé Musiːíːbíai séːko Israel taniːkídíːdém lubika, 'Noluk aíké arangíːdokkém Ruːnébí ngogíngkémpiné lungor-lunéːko mélígyé.' 38 jSullipotado Ruːnéké taniːkídíːdok gíkumsukodo, Musi:bí ngoluk taːtobuluk lédílo dungngai, édílo tayéng-yaːmedé Sinai Adido bím luposuton. Odokké Musiːbí odo ngolum bikonsupé turnam-biné agomdém toríksuka.
39 Émpigeːla ngoluk taːtobulu bík agomém tadlíːtomang, bulu bím lupakto, odokké buluk asiné Ijibboːpé méːlatsutoku. 40 Bulu Aronmé luto, 'Ngolum gígébopéné moimangém ngolum motei. Ngolum Ijibbokké gílenbokuné édé Musiːké okkoi kapikaːsong ngolu kintokumangǃ' 41 Édémpila odo bulu soːbo-ao kísané moimangko moto. Bulu odoːpé palígnammém bomaːla palíggel buluk alakki monam agerdok tayéːdo bulu soːmanto. 42 kBuluk édé agerdém kaːla Ruːnébí méːyotkang; édémpila Ruːnébí bulum doːmírtok duːnékídíːdém kumdoːpé mépaglíkto; lungor-lunékídíːdok potindo sémpé adla léːtagː
"Israel taniːkídínga, nolu yíːpi dítakko sullipotado
palígnamémnaː tosaglígnamém ngokkoloːpé bomangkan?
43 Nolu Molekké kumko-poːyubém
odokké noluk ruːné Repanké takarém diːsangka,
moimangkídíːdém kumpé émna moka.
Odok-légaːpé ngo nolum Bebilon kekonboːpé yeːbommoyéku."
44 Ruːnébí Musiːmé lukanbiko-poːyubdém kapé modopé lulíkkaji odokké bík léngkannamdémpé Musiːbí monam édém poːyubdé, sullipotado ngoluk taːtobuluk lédílo dungngai. 45 Léduké ayírkídíːdo, édílo ngoluk taːtobuluk kanggaːlokké angu-taniːopínkídíːdém Ruːnébí ménpuːbiton, odokké édílo bulu séː amoːso dungabomkang, Josuaːké lédílo édé poːyubdém soːpé joːbomna gíto. Édé poːyubdé migom Debitké longédoːpé siddung dungngai. 46 Debidbí Ruːnékolok ayangém paːto odokké Jakupké Ruːnéké dungko okumko moladopé kumto. 47 Émpigeːla édé Solomonbíːai séːko bík légaːpé okumko mobika.
48 Émdaggom lungor-lunélok lukamdémpé, Tayéːtok-duːnébí taniːlok alakki monam okumkídíːdo duːmangː
49 l'Tayéng-amoːté ngok migom-tetko,
odokké moːpísé ngok lépo-samtagé.
Kapiné okumém nolu ngok légaːpé mobiyén? Ruːtumbí ludung.
Émmamílo ngok duːrasukodéːba okolon?
50 Ngok alakki séː appíːsém momangaːnei?'
51 Nolu, asinémnaː yerungém gatpugmaːnam, agom-tadlíːman taniːkídíngaǃ Nolu loːdém Angunné Yalomé lupaksudag. Noluk abukídíːdé kapé idagaːji, nolusin édémíːpé idag. 52 Lungor-lunékídíːdok séːkom noluk abukídíːdé ipusiretoman? Odokké séːkobulu Arolok-duːné Atérké gídobo émnamdém lunoːbiton bulu bulum mokkeyamto. Odokké nolu suːpag arolok-duːnémésin yadla mokepakto. 53 Tayéng-yaːmekídíːdokki nolu Luroːém panggeːlaːsin, édé Luroːdok luyírnam kísapé nolu duːmang.
Istipenmé Ílíngki Génam
54 Édílo bulu édém tatpaːsuton, buluk aglíngé umí dorpé dorsaːla Istipenké tayéːlo bulu ipangém rékkérébamsuto. 55 Émpigeːla Istipenbí, Angunné Yalolo píːsíːla tayéng-amoːpé ngeːsaːto odokké Ruːnéké unjígnamdémna Jisubí Ruːnék lagbíkpé dagla duːnamdém kaːbekto. 56 Bí luto, "Kangkíto, ngo tayéng yabgo síggedopélaː Taniːké Aoːbí Ruːnék lagbíkpé dagla duːdopé kaːpaːdung."
57 Odo bulu buluk yerungém pikabamsugeːla bottéruːpé jéːropkang, odokké bulu appíːdé bíkkodo:pé yadangamdo. 58 Odokké bím nogordok ruːyoloːpé solenbomna ílíngki géropto. Odo, lukanbinékídíːdé buluk galugém Sol émnam yaːme taniːdém kangabbidopé bík alé kéraːdo lé:to. 59 Édílo bulu bím ílíngki géla dungngan, odo Istipenbí kumto, "Ruːtum Jisu, ngok yallomé toríksutei." 60 Odokké bí lébíːtungala bottéːpé jéːla kabla luto, "Ruːtuma, buluk séː imursém buluk kekonpé sabyok." Édém lungabnam lédupé bí katomabong.