Kínítkoném Balennam
6
Odo ayírdo édílo méngkésunné bojébomkan, Girikpé-luné Jiudikídíːdé Ibripé-luné Jiudikídíːdok angupé luropkang, kapilaːné buluk tumbo-néːngkídíːdém loːdíké apin orkodo bisobinyodaggai. 2 Édémpila Yí:laːnyidé gímínné tani appíːdém lékkopé gíkumsugeːla luto, ''Ruːnék doːying kígoːbinam agersém méːyaméːsageːla apin orkodok duːnamdé ngolukképé kaboyan agermang. 3 Édémpila bírrangkídínga, noluk araːdok tani:lok ménggésunam odokké yalolo píːsíːla méːjon taniːkínítko balentok. Odokké ngolu séː agersém bulum gerdopé tolíkpé. 4 Odokké ngolu kumnamnoːla Ruːnék doːying lugoːbinam agerdém asin-bila gerpé."5 Buluk lusadbinamdém tadla taniːappíːdé méːyumsukang. Odo bulu Istipen, séːkobí méːjíglo kínggíːnékolaː Angunné Yalolo píːsíːnékkai; odokké Pilibmé, Porokorasmé, Nikanormé, Timonmé, Parmenasmé, odokké Entiogdok Nikolasmé séːkobí Jiudipésin aːngka, bulum balento. 6 Bulu séː taniːkídíːsém mélígnamkídíːdém tokannígbito, odokké bulu buluk tayéːlo alag pigabila kumbito.
7 Édémpé Ruːnék doːnyingém lugoːbiyarto. Jerusalemdo gímínné taniyé aipé lomna bojébomkang, odokké bojéruːngkopé miríé mé:jíksunam lambélo gímínto.
Istipenmé Sogabnam
8 Odokké Istipenbí, aséːlo píːsíːla tornamé kala, botté botténé méːpílaːmaːnam agerém odokké kanggodém taniːkídíːdok araːlo léngkanto. 9 Émpigeːla, taniːékké Istipenké kekonpé dagropkang. Bulu Piridmena (pagbomaːbo) murong-okumdo loːdém gíkumsuné Jiudi taniː opekai. Bulu Sirini, Alegjendiria, Silisiadoglaː Esia mogkédok Jiudiːai. Bulu Istipenkokki lukerkaːmínsuropto, 10 émpigeːla bík méːjoːnam agomdogla bím ludumsuné Yalodok kekonpé bulu dagrasulaːtomang. 11 Odo bulu tani ékkém léːsula ludopé luːurríkto, "Istipenbí Musiːkéla Ruːnéké kekonpé lukangém ludopé ngolu tattag.'' 12 Édémpé bulu taniːkídíːdém, midumkídíːdém odokké luro luyírnékídíːdém luaglíkto. Bulu appíːdé Istipenkoloːpé yadabomna bím sogabgeːla Kiːni kébaːdoːpé soabomdo. 13 Bulu aroman lukanbinném lukanmoto, séːkobulu lubito, "Séː koːsé angunné okumsogla Luroːdok kekonpé lungngéisumangai. 14 Kapéné ngolu bík lunamém tattag édé Najareddok Jisubí séː kumliːsém momígyé odokké poːpélokkébo ibom-gíbomnam Musiːké ngolum binamkídíːsém angngamoyéku." 15 Kiːni kébaːdok tedla duːné appíːdé Istipenmé beryodmaːpé kaːto, odokké bulu bík dumsímigmodém tayéng-yaːme dumsímigmo kísapé kaːto.