Ananiabí:la Sapiraːbí
5
Émpigeːla odo Anania émnam tani:kola bík yamné Sapiraːbí, lékkopé among intakko koto. 2 Bík yamnédok kinpé bí murko:dok akkem aíképé lé:tumsuto, odokké ngadnédém mélígnamkídí:dok alagdo bomaːla léːto. 3 Odo Pitorbí luto, "Anania, no Angunné Yalomé kappar yatkan, kapé uiːbí nok asindo angkan, amoːdém kogeːla paːnam murkoːdok akkem nok aíképé léːtumsuton? 4 Komadapé amoːdé nokkémangnganei? Odokké édém kopagnam lédupé murko:dé noggíngkaːmangalang? Okko nom sémpin agerém germoton? No taniːyém yadmang émpigeːla Ruːnémé yatto. 5 Édílo Ananiabí édé agomdém tatton, bí kéda:la sipakkang. Odokké okko kapikaːji édém tadné appíːdé kínggíːpé pésokang. 6 Odo yaːmekídíːdé gísaːla, bík simaːdém yedge:la joːlenbomna bím yusíːto.7 Odok aum aːdí lédu-kíramdo bík yamnédé okko kapika:ji édém kinmaːpé araːdo:pé gíaːdo. 8 Pitorbí bím tauto, "Ngom lukítei, noːla Ananiaké among kogeːla paːnam arédé sidokkíddongkaːnei?"
Bí lulatsutoku, ''Éí, odogongkíddíkai.''
9 Émpigeːla Pitorbí bím luto, "No kapé Ru:tumké Yalodém ankangkípé émna nok milboːdok lédílo lékkokan? Kangkítokǃ Nok milboːdém yusíːnékídíːdé dagangoːdungku odokké nomsin bulu joːlenbomyé." 10 Odo ayíríːdo bí Pitorké alédo oala sipakkang. Odo yaːmekídíːdé gíaːla bím sidopé paːla bík simaːdém joːlenbomna bík milboːdok kéraːdo bím yusíːto. 11 Kumgodok taniːappíːdok tayéːloːla édém tatpa:suné appíngké tayéːlo kínggíːpé pésso angkang.
Bojéruːngkoném Mélígnamkídíːdé Ésaːmokunam
12 Odo mélígnamkídíːdé bojéruːngko méːpílaːmaːnam agerémna méngaksunam agerém taniːkídíːdok araːlo gerto. Odokké méngkésun appíːdé Solomonké Barandado lékopé gíkumsudungai. 13 Tani appíngé bulum ménggésudagagom, séːkkésin buluk lédílo gíajonsupé angé katomang. 14 Émgom bojéko mimméla milbo:taniːyé Ruːtummé méngkésula bulukkolo aːsedmínkang. 15 Mélígnamkídíːdé okkom iton odok apíaːye kísapé, taniyé kila du:nékídíːdém lambédoːpé joːlenbomna bulum asubloːla patiːlo kédla duːmoto, odok Pitorké gípaddodo bík yalodéi séːkkai séːkkaiké tayéːdo uktidyépé émna. 16 Jerusalemdok kérang-kétakké taonnokkésin bojéko taniyé kinnémna aiman yallo paːla léːnam taniyém gíbodo odokké bulum appíngém ésaːmotoku.
Mélígnamkídíːdém Ipusirenam
17 Odo abíngaryan mirídéːla bík gerjon appíːdé, séːkobulu Sodduki opedokkan, bulu kínggíːpé dígla oːkaiko ipé émna dagropto. 18 Bulu mélígnamkídíːdém sogabgeːla aiman-tani méko makanaːlo tumto. 19 Émpigeːla yumédo Ruːtumké tayéng-yaːmeko makanaːdok yabgokídíːdém síggebigeːla bulum gílenbokangku. 20 Odokké bí bulum luto, "Kumli:pé gíla daksaːla séː anu turnamsok doːying appíːdém taniːkídíːdém lubita." 21 Lunamdém tadla bulu rokompé kumli:doːpé gíaːla luyírém lubito.
Édílo abíngaryan mirídéːla bík gerjonkídíːdé odoːpé gípíːton, bulu Jiudi midum appíːdok Ki:niːkébaːdém gokto. Odokké mélígnamkídíːdém gíabodoːpé makanangoloːpé mélíkto. 22 Émpigeːla opisarkídíːdé makanaːdoːpé gípíːnammé bulum odo paːtomang. Édémpila bulu gíladgekula lubitoku. 23 "Ngolu makanaːdém aiyoːpé etkabla léːdopé, odokké kanggabnékídíːdém yabgodo dagla duːdopé paːto; émpigeːla édílo ngolu yabgom síggeton, ngolu séːkomsin araːdo paːtomang." 24 Édém tatpaːsugeːla kumli:dém kanggabnékídíːdok keptendéːla abín miríkídíːdé murkang, édé agerdokké okko lenyén émna méngaksuto. 25 Odo taniːko gía:la luto, "Kangkítokǃ Noluk makanaːlo tumnam taniːkídíːdé kumli lottaːdo dagla taniːyém luyírra dung." 26 Odo ayírdo, keptendé opisarkídíːdém bík lédílo gíbola gíla mélígnamkídíːdém gía:bodoku. Taniːkídíːdé bulum ílíngki gépéké émna bulu bolbodatomang.
27 Odokké édílo bulu bulum gía:boton, bulu bulum kiːni-kébaːdo dakkansumoto. Odo abíngaryan mirídé bulum tatpénamém tauto. 28 Bí luto, "Ngolu nolum édé amindokki luyírém lugoːyoka émna torpé lutumka. Émgom nolu édé amindokki Jerusalemso luyíramto odokké édé taniːdok sinamdém ngoluk imuré émnamdém nolu léngkanpé méːdun."
29 Pitorbíːla akon mélígnamkídíːdé lulatsutokuː "Ngolu taniːyémyang Ruːnéké agomém tadya:pé lagidagǃ 30 aNgoluk abukídíːdok Ruːnébí Jisumé sikolokkém turmotoku, séːkom nolu ísíːtayéngkolo pítketo. 31 Israel taniːkídíːdé méngkutsudokupéla buluk imurém méːyinsubidokupé émna, édé Jisumé Ruːnébí Migom-ao kísapéla Moturkubinépé tolígla ménggésunamém bila bík aíké lagbukpé duːmoto. 32 Édé agomkídíːdém ngolu lukanbikunékídíːdé, odokké séːkobulu Ruːnéké agomém-taddoji, Ruːnébí bulum oko Angunné Yalodém bituːji, bíːsin édém lukanbikunéko.
33 Édílo bulu édém tatton, bulu kínggíːpé aglíngé saːla bulum mokepé méngkíto. 34 Émpigeːla luroːém luyírné Gamaliel émnam Parosi, séːkom appíngé ménggésudagaji, Kiːni-kébaːdo dagrobgeːla édé taniːkídíːdém kontégoukopé ruːyoloːpé mélenníkpoːdopé lulíkto. 35 Odokké bí bulum lutoː "Israel taniːkídínga, séː taniːkídíːsém nolu okkom ipé émna méːduːji, édém aigampé méːmisupoːto. 36 Ményíngkoyíngo Teudas émnamko lenka odokké aíém pakkísíːkkíné émna lugoːsuka, língko appiːkíramkopé taniyé bík lédílo gímínka. Bím mokenammé, bíkkol gímínné appíːdé yogamkang, odokké odok lédupé odo okkosin katokumang. 37 Bík lédupé, amin-adgabdo ayírdo Galilidok Judabí lenkang, odokké bí bík lédulo asutkopé taniyém gímínníːmoto; bímsin mokenammé bíkkol gímínné appíːdé gípít-gíridamsukang. 38 Odok-légaːpé, suːpakkosoːsin ngo nolum ludungː séː taniːkídíːsém léːpakpoːtoǃ Bulum mélíktokuǃ Kapilaːné buluk ager-taruːsé taniːlokké lennémílo, séː yogyé. 39 Émpigeːla séː Ruːnékolokkémílo, nolu séː taniːkídíːsém motumnaːmaːyé; nolu aíém Ruːnéké lédílo mimag modopépag paːsuyé. "
Kébaːdé bík luyírnamdém tadlíksukang. 40 Bulu mélígnamkídíːdém gogatoku odokké bulum díːmoto. Bulu bulum Jisuké aminki lugoːmaːdopé lulíggeːla bulum mélíktoku. 41 Mélígnamkídíːdé méːpola Kiːni-kébaːdokké gílenkangku, kapilaːné édé Amindo bulu ngasodémna anyisunamém paːdopé arré kadag émna sabnam légaːpé. 42 Odokké bulu loːdém kumli:doːla okum okumno, Jisubí Kiristobí émna tatpon lutaddém longékosin lungasumapé luyírtíla lugoːbitíto.