Pitorbí Lébené Kogonéko Ésaːmokunam
3
Longéko Pitorbíːla Jonbí yummayír aumdok kumdo ayírdo kumli:doːpé gísaladungngai. 2 Odo kumli:dok Kangkan émnam séːturdo ododokkébo lébené taniːko duːdagai. Séːkobulu kumli lotta:doːpé gíadoːji bí bulukkolok kodopé bím odo lo:dém joːlígdaggai. 3 Édílo bí Pitorméla Jonmé kumliːdoːpé gía:dopé kaːton, bí bulukkolok koto. 4 Pitorbíːla Jonbí bím migyabmaːpé kaːto. Odokké Pitorbí bím luto, "Ngolukkosoːpé kangkítokǃ" 5 Odo bulukkolok oːkaiko paːpé émna méːla, taniːdé bulum kaːto. 6 Odo Pitorbí luto, "Aínéla murkongé ngokké kamang, émpigeːla ngokké okko duːji édém ngo nom bipé. Najareddok Jisu Kiristoké aminno dagrobgeːla lambégítok." 7 Odokké bík lagbíg alagdok pigabbila bí bím dagrobmoto, odo bagémpé taniːdok alédé:la gantikídíːdé torropkang. 8 Odo bí sumsaːla bík alédokki dagrasula lambém gíropkang. Odokké lambégíla sumnígla, Ruːnémé luyitsuto bí buluk lédílo kumli lottaːdoːpé gíamínto. 9 Édílo taniː appíːdé bím lambégíla Ru:némé luyitsudopé kaːton, 10 bulu bím édé taniːardé émna kangkinto séːko kumli:dok Kangkan séːturdo tedla kogodaggan, odokké bíkkolo okko kapikaji émna bulu méngaksukang.Kumliːdo Pitorké Doːyíng Kíbinam
11 Kogonédé Pitormélaː Jonmé gagabla duːdopé kaːla, tani appíːdé méngaksula Solomonké Baranda émkodoːpé bulukkodoːpé dugla gído. 12 Édílo Pitorbí taniːkídíːdém kaːton, odo bí bulum lutoː "Israel taniːkídínga, kapila séː nolum méngaksumodun? Kapila nolu ngolum miggírra kaːdun? Ngolu aíké tornamkiːla Ruːnék kanggaːlo ainé taniːkísapé séː taniːsém lambégímotakku émnai? 13 Abraam, Isaak odokké Jakupké Ruːnébí, ngoluk abukídíːdok Ruːnébí, bík pagboa Jisumé amin-gígémoto. Nolu bím mokedopé tolíkto, odokké édílo Piladbí bím mélíkkupé méːton, nolu bím bík kanggapé lupakto.b 14 Nolu Angunnédémnaː Arolok-duːnédém lupakto odokké tani:mokenédém nolukkoloːpé mélennígdokupé koto. 15 Nolu turnamém binédém moketo, émpigeːla Ruːnébí bím sikodokkém turmotoku. Ngolu édém lukanbikunékídíːdé. 16 Jisuké aminno méːjíksunamé, séː noluk kaːpaːnam odokké kinnam tani:sém kínggíːmotakku. Édé Jisuké amindé odokké bíkkolok lenné méːjíksunamdé bím aibíndanna aimotoku okodém nolu appíngéi kaːsudung.
17 Suːpag, bírrangkídínga, ngo kindag nolulang noluk mirokídíːdé okkom iton édém kinmaːla ito. 18 Émpigeːla Ruːnébí lungor-lunékídíːdok nappangki okkom lunoːmokan, bík Kiristobí duːgém doyé, édémpéi ilet-gíledmoto. 19 Édémpila méngkutsugeːla Ruːnékoloːpé gílattoku, odo noluk imurkídíːdém írpubiyé, odo yalolo méːpoːméngannan ayíré Ruːtumkolokké aːyé. 20 Odokké noluk légaːpé tolígla léːnam Kiristomé séːko Jisubín odo bím mélígbiyépé. 21 Ruːnéké appíngém motenkunan ayírdé édíloːpé aːpongkumaːyéːji, bí tayéng-amoːto duːporuːpaːyé, okodém lekeloːbo bík angunné lungor-lunékídíːdokki bí luka. 22 cKapéné Musiːbí lutag, 'Ruːtumbí noluk Ruːnébí noluk araːlok aíké taniːlok ngokkémpin lungor-luné a:ko lenmoyé; nolu bík lunam appí:dém tadlaːruːngka. 23 Sé:koi bík lunamém tadmaːyéji bím buluk taniːkídíːdok araːlokkém laːpagnampé laːpagyé.' 24 dArro, Samuelkodokkébo lungor-luné appíngé éddíko lutu:ji, appíːdé séː longékídí:sém lunoːbitag. 25 eOdokké nolu édé lungor-lunékídíːdok ommangé odokké noluk abukídíːdok lédílo Ruːnék pesula léːbinamdém paːpénékídíːdé. Bí Abraammé luka, "Nok ope-négíngkokki mo:písok tani appíngé peyu binamém paːyé." 26 Édílo Ruːnébí bík pagbodém turmotokuji, bí nolum peyu bila noluk aiman gíla duːnam lambédokkém nolum gíladbodokupé bím nolukkosoːpé mépolíkto.