Pentikos Longédo Angunné Yaloké Gíinam
2
Édílo Pentikosa longédé angkan, bulu appíːdé lékkopé gíkumsukokolo gíkumsuto. 2 Odo bagémpé tayéng-amoːtokké kínggíːpé ngomna ésarkonémpé odoːpé sarangkang odokké buluk dungko okumdok appíːdo ngombungkang. 3 Odo ayyompiné dorpansuné ummém bulu kaːto okodé buluk appíːdok tayéːdo dorrasula dungkang. 4 Odo bulu appíngéi Angunné Yalolo pí:síːla bangkí-bangkíné gomukpé agomém luropkang kapilaːné Yalodé bulum lulaːmoto.5 Odokké odo ayírdo moːpísok takam réngamnokké Ruːnémé péso-ménggéné Jiudi taniyé Jerusalemdoːpé gípíːla dungngai. 6 Édílo bulu ngomnamdém tadbékton, kéréngkopé taniːyé lékopé dukkumsuto odokké bulu muramkang. Kapilaːné bulu buluk aí aíké agompé méngkésunékídíːdém ludopé tatto. 7 Odo bulu méngaksula tautoː "Séː agom lula du:né tani appíːsé Galili taniːmaːnei? 8 Émpém kapé ngolu appíngé bulum ngoluk aí aíké agompé agom ludopé tatpaːsudun? 9 Ngolu akke Partia, Medesélaː Ilamité, Mesopotemiadok duːné, Judia odokké Kappadosia, Pontasélaː Esia, 10 Pirigia odokké Pampilia, Ijip odokké Sireni rísudok Laibia moːtagdok; Rumdokké gíné mibokídíːdé 11 Jiudiélaː Jiudipé aːnékídíːdé; Kiriddokkélaː Arob mongkédok taniyé- ngolu appíngé bulum ngoluk aíké agompé Ruːnék mé:pílaːma:nam bottén ager gernamkídíːdém lukanbidopé tadbeksuto." 12 Méngaksula méngkin-méːparama:pé ila, bulu akoné akoném tauto, "Séː okko kapidun?"
13 Odokké akke bulum lukaːla luto, "Bulu anu apongém tíngursutag."
Pitorké Lubinam Doːyíːdé
14 Odo Pitorbí yíːlangkodok lédílo dagrobla bottépé jéːla taniːkídíːdém lubitoː "Jiudi ajonkídínga odokké nolu appíngé séːkobulu Jerusalemso dun, nolum ngo séː agomsém lusarbidung; ngok lunamsém tadmiːlang. 15 Noluk méngkamdémpé séː taniːkídíːsé tíngursumang. Kapilaːné suːpag roːlok konan ayíroːngéǃ 16 Kapéné séː agom appíːsém lungor-luné Juelbí lunoːla léːtagː
17 'Ruːnébí ludung, léddarké longékídíːdo,
Ngo ngok yallom appíng taniːloːpé pílennígbiyé.
Noluk ommangkídíːdé lungorém luyé,
Noluk ya:mekídíːdé kangorém kaːyé,
Noluk éːjoːkídíːdé maːnyingém maːyé.b
18 Ngok pagbo pagné appíːdok tayéːlo,
odo longékídíːdo ngo ngok Yallom pílennígbiyé,
odo bulu lungorém luyé.
19 Ngo mé:pílaːma:nam agerém doːmír tayéːto odokké kanggodém among kéígbo,
kaːbegmoyé, íːyém ummém
odokké mukkangémpin mikkém léngkanyé.
20 Ruːtumké bottéruːnéla unjígné longédé aːmangoːdapé
Doːnyimé kémomoyé odokké poːlomé íːipé imoyé.
21 Odokké sé:kobulu Ruːtumké aminém goktinsuyéji bulum moturbiyé.'
22 Israelsok taniːkídínga, sém tattok Najareddok Jisumé tornam agerki, méːpíla:ma:nam agerkila: kanggotki Ruːnéké mélígnam taniːdé émna léngkanbika, oko agerkídíːdém Ruːnébí noluk araːlo bíkkokki gerka, édém nolu aíékídíːdé kindag. 23 Ruːnéké aíké ipéːméːnamno bí ruːsékka Jisum noluk alaglo tolígyé; odokké nolu bím Jiudiman taniːlok alaglo tolíggeːla kurusdo pítketo. 24 Émpigeːla Ruːnébí bím sikodokkém turmotoku, sinamdok kinamnokké bím méːsarém bito, kapilaːné sinambí bím kapésinei butum laːtomang. 25 Kapéné bík légaːdém Debidbí lutagː
'Ngo Ruːtummé loːdém ngok kanggaːpé ka:to.
Kapéné bí ngok lagbígdoc dung édémpila ngom éngunmolamaːyé. d
26 Odok-légaːpé ngok asinsé méːpodung
odokké ngok nappaːsé luyumsudung;
Ngok amírséːsin
akaːla duːla turyépé,
27 kapéné no ngok yalosém ago araːbo mépagmaːyé,
odokké nok Angunné Atérmé odo ya:momaːyé.
28 No ngom turnamdok lambém léngkanbitag;
nok kéraːdo duːdodok méːponamdém no ngom píːsíːmoyé.'
29 Bírrangkídínga, ngo nolum dakidanna lubilaːdag tokuta:to Debidbí sikang odokké bím yusíːto, bík agodé siloloːpé sidé dung. 30 Émpigeːla bí lungor-lunékunamé kindagai Ruːnébí bím lusunamkolo pesubitag bík ope-éra:lokké séːkai akoném bík migom-tetkodo tedmoyé.e 31 Okko aːdoːji édém ka:no:la, bí Kiristoké lékod-turkunamdém lunoto,
bím agodo mépaktomang,
odokké bík adin-amirém Ruːnébí odo ya:motomang.f
32 Ruːnébí édé Jisumé turmotoku, odokké ngolu appíngé édé arodém lukanbikunékídíːdé. 33 Édémpila Ruːnébí bím tayéng-amoːto bík lagbíkpé ménggésukodopé jo:saːlíkto, bí Abuk bipé-lusunamdo Angunné Yalodém toríksula nolu suːpag okkom kaːbektadbeksuduːji édém pílennígbitag. 34 Kapéné Debidbí tayéng-amoːpé gísaːmanggom bí aíém luto,
'Ruːné Jiuabí ngok Ruːtummég lutoː
édíloːpé ngo nok mirukídíːdém nok lépo-samtakpé imomaːyéji, h
35 Ngok lagbíkpé tetpoːto. '
36 Odok-légaːpé Israelsok taniːappíngé sém kinjígla-kinpé lagidagː Ruːnébí édé Jisumé Ruːtumpéla: Kiristopéi tolíkto, séːkom nolu kurusdo pítkeka."
37 Édílo tani:kídíːdé édé lunamdém tatton, buluk asinangé airuːpé kikang odokké Pitormélaː akon mélígnamkídíːdém tauto, "Bírrangkídínga, ngolu okkom ipénammén?"
38 Odo Pitorbí lulatsutoku, "Nolu appíngé, méngkutsugeːla Jisu Kiristoké aminno noluk paːbém méːyinsubikunam légangé baptisém laːtok. Odo nolu Angunné Yaloké binam amaném paːyé. 39 Bík pesubinamdé noluk léga:péla: noluk ommangkídíːdok légaːpé odokké mo:téːlok duːné tani:kídíːdok légaːpé, appíngém Ruːtumbí ngoluk Ru:nébí bík aíkoloːpé gogyeku."j
40 Odokké bí bojék agomki bulum lupangémna lusang agomki lubito, "Nolu aíé séː aiman opekídíːsokké motursulang." 41 Séːkobulu bík lunamdém méngkésuton bulu baptisém laːto, odokké odo longédo lí:yíng aumkíramkopé taniyé buluk lédílo aːsedmínkang. 42 Odokké bulu aíém mélígnamkídí:dok luyírnamno, kumjonsunamno, pitaː dojonsunamno odokké kumnamno tolíksuto.
Méngkésunékídí:dok Kumbosunam
43 Odokké bojéruːngkopé méːpílaːmaːnam agerémna kanggodém mélígnamkídíːdokki léngkanammé, appíngké asinno ménggésunam pésso angkang. 44 Méngkésuné appíːdé lékkopé ríksudungai odokké buluk kanam-síːnammém bisuka:mínsudungngai. 45 Buluk okumérang attarém kopaggeːla, séːkké kamangaji bím bisudungngai. 46 Odokké bulu loːdém kumli lotta:do gíkumsudagai. Bulu buluk okumkídíːdo pitangém kpentuːla donamdém lékkopé méːpola ajjisun-asiné kala dojonsudagai. 47 Ruːnémé luyitsula appíng tani:lok ayangém paːla mé:podagai. Odokké séːkobulu turnamém paːtoji Ruːtumbí bulum buluk lédílo loːdém aːsedmoto.