Agerkídíng
Mélígnamkídíːdok Agerkídíng
Jisumé Tayéng-amo:pé Gísabokunam
1
Ménggésunam Tiopilas, ngok atpoːnam potindoa ngo édémbulum atka okodém Jisubí gersabomna édé longédoːpé ngolum luyírtíka; b 2 édíloːpé bím tayéng-amoːpé gísabokumangngan. Bím tayéːtoːpé gísabokunam poːpé Angunné Yaloké tornamno bí bík balenna mélígnamkídíːdém luyírbito. 3 Bí kurusdo duːgdola sinam lédupé, bí aíé édé taniːkídíːdém léngkansuka odokké bí turra dung émnamdém léngakanbinam légaːpé bí bojéru:ngko kanggodém léngkanbika. Bí bulum yiːpi longékopé léngkanbitíla duːla Ruːnék migomdokodok doːyíngém kíbika. 4 Longékoném, édílo bí buluk lédílo lékkopé dungngan, odo bí bulum séː lulígnamsém lutoː "Jerusalemsém mépagla gípakpo:yok, émpigeːla ngok Ba:buké pesubinam amandém toya:la duːpoːlang, odok légaːpé ngok lubinamém nolu tattag.c 5 Kapéné Jonbí asiki baptisém bika, émpigeːla Angunné Yaloki nolum longko-loːnyi léddoːupé baptisém biyé."6 Édémpila édílo bulu gíkumsuton, bulu Jisumé tauto, "Ruːtuma, no séː ayírso Israelmé bík migomdokodém lékoda biladyekunei?''
7 Bí bulum luto, "Abuké bík aíké ilang-gílangki tolígnam ayírdémnaː longkídém noluk kinpénam légaːmang. 8 Émpigeːla édílo Angunné Yalodé noluk tayéːlo gíiyéji odo nolu tornamém paːyé; odokké nolu Jerusalemdo, Judiaːdok appíːlo odokké Somoria:do, odokké mo:písok duːtérdoːpé ngok agomém lukanbikunépé iyé."d 9 Bí édém lunam lédupé, buluk amig kanggangí:pé bím tayéng-amoːtoːpé gísabokangku, odokké bím mukkangé yíːtito odo bulu bím kaːbektokumang.
10 Bík gísaːla duːdodém bulu do:mírtoːpé nge:saːla kaːla du:to, odo kangkítok, kampon galug géné taniːannyiko buluk kéraːdoːpé gíaːla dakkang. 11 Odokké luto, "Ai Galili tani:kídínga, nolu kapila so dagla do:mírtoːpé nge:saːladun? Nolukkolok tayéng-amoːtoːpé gísabokunam Jisubí, noluk kaːla duːnamíːsémpé bím kapé gísabodakkuji édémarpé bí gíladyéku."
Matiasmé Juda:ké Agerdém Gerdopé Balennam
12 Odok lédupé bulu Olib Adidokké Jerusalempé gílattoku, nogordokké odo:pé Yoddo longéloke lambégíkoko idagai. 13 Édílo bulu nogordoːpé gípíːtokuji, buluk dungko okumdok tayéngké soyardoːpé bulu gísangkang. Édébulu Pitorbí, Jonbí, Jemsbíːla Andriubí; Pilibbíːla Tomasbí, Bartolomiobíːla Motibí, Alpauské ao Jemsbíːla Jilotf-opedok Simonbí, odokké Jemské ao Juda bulu.g 14 Bulu appíːdé, odokké bojékopé mimé ékké, Jisuké ané Meri odokké bík bírokídíːdok lédílo asiné lékkola gíkumsula loːdém kumdagai.
15 Longko-loːnyi lédupé Pitorbí méngkésunékídíːdok araːdok daksaːla luto, (odo língkokolaː yi:nyikopé méngkésuné taniyé dungngai) 16 "Bírrangkídínga, Ruːnék-gomugdok adla léːnamdé ilet-gíledruːpayé okodém Angunné Yalobí Debitké nappangki poːpéloːbo luno:la léːtag, Judaːké légaːdém sé:kobí Jisumé sogabnékídíːdém gígéboka. 17 Kapéné bí ngoluk araːsok aːkai odokké ngoluk lédílo séː agersém gerjonsudagai."
18 Judaːbí bík imur-igela paːnam murkoːdokki amongko réto. Bí odo okkesula sikang, odokké bík sima:dé opagledla akiyé butsurra bík rokki appíːdé budlenamkang. 19 Odokké Jerusalemdok duːné appíngei édé agomdém kinapto, édémpila bulu édé amoːdém buluk agompé Akeldama émto, okodok légíːdé Íːilok Among.
20 Pitorbí luyartíto, ''Édém Niːtom potindo adla léːtag,
'Bík dungkodé okkosin kamaːpé ikaːlangka;h
odo sé:kosin duːmangkaːlangka.'
odokké,
'Bík ibomnam agerdém akoné pangkaːlang.'i
21 Édémpila appíng ayírdo Ruːtum Jisubí ngoluk lédílo gílen-gíamínna duːdodo, ngoluk lédílo gíjonsula duːnékídíːsok araːsok aːko, 22 Jisumé Jonké baptis binam longédokkébo ngolukkolokké bím gísabokunam longédoːpé. Kapéné, sogbuluk araːsok akoné ngoluk lédílo bík lékod-turkunamdém lukanbikuné akopé ipaːyé."
23 Édémpila bulu taniː annyikolok aminém mingappoːtoː Barsabbas émnam Jusebmé (Jastas émna:sin mintagai) odokké Matiasmé. 24 Odok lédupé bulu kumto, "Ruːtuma, no appíngké asiném kindag. Bínyik annyisok séːkom no balentuːji édém ngolum léngkantei, 25 sidé mélígnam agersém gerbomdopé, okodém Judaːbí mépagla bík gípékoloːpé gíkangku.'' 26 Odokké bulu kuːnamdém kuːto, odo Matiaské amindém kuːlento, édémpila bím yíːlangko mélígnamkídíːdok lédílo laːtéːto.