Jisubí Líːyíng Anggoko Taniyém Dobonam
(Moti 14.13-21; Mark 6.30-44; Luk 9.10-17)
6
Odok lédupé Jisubí Galili Paːtaːdok kekonpé kongkola gíkang, okodém Tiberias Paːtangésin émdaggai. 2 Bojéruːngkopé taniyé bík lédulo gímíndo, kapilaːné bí kiné taniːkídíːdém ésaːmolangkula méːpílaːmaːnam kanggodém léngkannamém bulu kaːtag. 3 Jisubí adi tayéngkoloːpé gísanggeːla bíkkol luyírsunékídíːdok lédílo odo tetto. 4 Odo Jiudilok Gíboːla donam gíːdíːdé anindaggaboi. 5 Édílo Jisubí ngeːsaːtoji odo bojéruːngko taniyé bíkkodoːpé gídopé kaːla bí Pilibmé luto, "Okolok ngolu séː taniːkídíːsok donam légaːpé pitangém réyyan?" 6 Bí édém Pilibmé ankaːpé émna tauka, kapéné bí okko émna lulatsuyékuji édém bí kinnolai dung.7 Pilibbí bím lulatsutoku, "Sok duːné appíːsém ajji ajjiko dokadopé bipéi poːlo piːnyilok gerra paːnam murkongki régom píːmaːyé."
8 Bíkkol luyírsuné aːko Pitorké bíro Andriuːbí luto, 9 "Sidé ko:ko dung séːkké anyaglok pitang borngokolaː ongo piryniko dung; émpigeːla siddín taniː araːso édé okopé iyen?"
10 Jisubí luto, "Taniːkídíːdém tedmoto. "Buluk gíkumsula dungkodo nésiné bojéko dungngai, taniːkídíːdé tetkang. Odo líːyíng anggokíramkopé milbong taniyé dungngai. 11 Odo Jisubí pitangkídíːdém langgeːla, aipai bito, odokké tednékídíːdé éddíko lagidaggaji odokkíddíko bulu bulum orrígbito. Ongodémsin bí édémíːpé orbito. 12 Édílo bulu appíːdé dola dotísukaːji, bí bíkkol luyírsunékídíːdém luto, "Orngadnamkídíːdém langkumsutaku, okkomsin mosemoyepé lagimang." 13 Édémpila bulu édémbulum langkumsula gempa yíːlaːnyiko biːdopé anyak pitang borngdok dola dongadla léːnamdém tíkumsutoku.
14 Jisuké méːpílaːmaːnam ager-gernamdém kaːnam lédupé taniːkídíːdé luropkang, "Aropé séːrung édé lungor-lunédé séːko moːpíso:pé gíyépé émna lutang.'' 15 Bulu bím bolbodapé migompé imopé émna méːnamdém Jisubí kinna aídé adiːkoloːpé gísangkang.
Jisuké Asi Tayéːdok Lambégínam
(Moti 14.22-33; Mark 6.45-52)
16 Édílo yummayirkaːji, bíkkol luyírsunékídíːdé paːtaːdoːpé gítokkang, 17 odo bulu ollungkolo saːla paːtaːdém kongkola Kaparnaumpé gíto. Odo kémodaggaboi odokké Jisubí buluk lédílo gímíntomang. 18 Bottéruːné ésarko sarnammé asido siyad luːsangkang. 19 Édílo bulu aum mail appikíramkopé koːla gíton, bulu Jisumé asi tayéːdo lambégíla olluːdok kéraːpé gíadopé kaːto, édémpila bulu yallo gíla pésokang. 20 Émpige:la bí bulum luto, "Séː Ngoːmín; pésoyok." 21 Odo bulu bím ollung araːdo:pé gíaːmolíːto, odokké oddar olluːdé buluk gípéko ragodoːpé koːpíːto.
Taniːkídíːdé Jisumé Manam
22 Longkondo paːtang kekon ragodok du:nékídíːdé odo ollung asongoko dung émnamdém kinto, Jisubí bíkkol luyírsunékídíːdok lédílo saːmíntomang, émpigeːla bullong gíkangai. 23 Odo, Ruːtumbí aipai binam lédupé taniːkídíːdém okolo pitangém dobokaji, odok kéraːdoːpé Tiberiasdokké koːné ollung ékké kongado. 24 Odokké édílo taniːkídíːdé Jisubíːla bíkkol luyírsunékídíːdé odo kamang émna kinton, bulu ollungkídíːdo sangaːla Jisumé mamínna Kaparnaumpé gíkang.
Jisubí Turnan Pita:dé
25 Édílo bulu bím paːtaːdok kekondo pa:ton, bulu bím tauto, "Rabbi, no édílo soːpé gípíːton?"
26 Jisubí lulatsutoku, "Ngo nolum arodém lubidung, nolu ngom mala dung, méːpílaːmaːnam kanggodém kaːnam légangémang, émpigeːla nolu pitangém dola dotísunam légangépag. 27 Yokpakpéné donamdok légangé agerém geryok, émpigeːla okodém Taniːké Aoːbí nolum biyéji, turyarné turnam dungkodok du:péné donamdok légangé ager-gertok. Kapéné Ruːné Abubí bík tayéːlo bík muorki tublíktak."a
28 Odo bulu bím tauto, "Émpém Ruːnék agerdém gernam légaːpé ngolu okkom ipaːyen?"
29 Jisubí bulum lulatsutoku, "Ruːnébí séːkom mélíktagji bím méngkésunamdéi Ruːnék agerdé."b
30 Édémpila bulu bím luto, "Émpém ngolu kaːla méngkésudopé no oko méːpílaːmaːnam kanggodém léngkanyen? 31 Édém adla léngkamíːdémpé, sullipotado ngoluk taːtobulu mannaːém doka; 'Bí bulum tayéng-amoːtokkém pitangém dodopé bika.'"c
32 Odo Jisubí bulum luto, "Ngo nolum arodém lubidung, séːko nolum tayéng-amoːtokkém pitangém bikaji édé Musiːbíːmangai, édé ngok Abubí séːko nolum aro pitangém tayéng-amoːtokké biladun. 33 Kapéné Ruːnék pitaːdé bí séːko tayéng-amoːtokké gíiːla moːpísém turnamém bidun."
34 Bulu luto, "Ruːtuma, émpém édé pitaːdém ngolum loːdém bilang."d
35 Odo Jisubí lubito, "Ngo turnamdok pita:dé. Séːkobí ngokkoloːpé gíayéji bí édíloːsin kéno:maːyé, odokké séːkobí ngom méngkésuyéji bí édíloːsin tíːlímaːyé. 36 Émpigeːla ngo nolum lubika, nolu ngom kaːtag, émgom méngkésumang. 37 Abubí séːkobulum ngom bituːji, bulu appíːdéi ngokkosoːpé gíaːyé; odokké séːko ngokkosoːpé gíaːyeji ngo bím ménpagmaːyé. 38 Kapéné ngo ngok aíké méːnamém ikolo tayéng-amoːtokké togyimang, émpigeːla ngom mélígnédok méːnamdémpak ibikolo gídung. 39 Odokké bí ngom binam appíːdok aːkosin ngo yogmomanamdé, odokké gítersuné longédo bulum appíngém ngo turmodokupé, méːnamdé ngom mélígnédok méːnamé. 40 Ngok Baːbuké mé:namdé séː séːkoi Ao:dém kanggeːla bím méngkésuyéji, bí turyarné turnamdém paːdoːpé; odokké gítérsuné longédo ngo bím turmoyéku."
41 Édém tadla Jiudikídíːdé bím bínbínaisangkang kapilaːné bí luto, "Tayéng-amoːtokké togyiné pitaːdé ngo." 42 Bulu luto, "Bí Jusepké ao Jisubíːmaːnei, bík ané abudém ngolu kinmaːnei? Émpém suːpag kapé bí lulangkan, 'Ngo tayéng-amoːtokké togyidung'?"e
43 Jisubí lulatsutoku, "Nolu noluk araːdo bínbínainamdém méto." 44 Ngom mélígné Abubí gía:momaːmílo, séːkosin ngok kéraːpé gía:laːmang; odokké ngo bím gítérsuné longédo turmoyéku.f 45 Lungor-lunékídíːdok potindo sém attagː 'Ruːnébí appíngém bulum luyíryé.' Séːkobíi Abuké agomém tadla bíkkolok tadyírsuyeji bí ngok kéraːpé gíaːyé.g 46 Séːkosin Abumé kangkímang, émpigeːla séːkobí Ruːnékolokkén, bí atéroːdé Abumé kangkítag. 47 Ngo nolum arodém lubidung séːkobí méngkésudagji bíkké turyarné turnamé dung. 48 Ngo turnamdok pitaːdé. 49 Noluk abukídíːdé sullipotado mannaːém doka, émgom bulu sikang. 50 Séː tayéng-amoːtokké togyiné pitaːdé, édém taniyé doyépé odokké dogeːla simaːyé. 51 Ngo tayéng-amoːtokké togyiné turné pitaːdé. Séːkobíi séː pitaːsok doyéji, bí turyaryé. Odokké ngo mo:písok légaːpé oko pitangém biyéji, édé ngok adindé."
52 Odo Jiudikídíːdé buluk aíké araːdo torgampé lukermínsukang, "Séː taniːsé kapé bík adindém ngolum dodopé bilaːyén?"
53 Jisubí bulum luto, "Ngo nolum arodém lubidung, édíloːpé nolu Taniːké Aoːké adindém domaːyéji odokké bík íːiém tíːmaːyéji, nolukké nolukkolo turnamé kamang. 54 Séːkobí ngok adiném dolíktuːji odokké ngok íːyém tíːlíktuːji, bíkké turyarné turnamé dung, odokké ngo bím gítérsuné longédo turmoyéku. 55 Kapéné ngok adinsé aro aro donamé odokké ngok íːisé aro aro tíːnamé. 56 Séːkobí ngok adiném dolíktuːji odokké ngok íːyém tíːlíktuːji bí ngokkolo duːmíndag, odokké ngo bíkkolo duːmíndo. 57 Turné Abubí ngom mélíktag, odokké bíkkokki ngo turra dung. Odokké édémíːpé séːkoi ngom doyéji bí ngokki turyé. 58 Séː tayéng-amoːtokké togyiné pitaːdé. Noluk abukídíːdé mannaːém doka émgom bulu sikang, émpigeːla séːkobí séː pitaːsém dolígyeji bí loːdílongkípé turyé."
59 Kaparnaumdok murong-okumdo édílo bí luyírra dungngan odo bí sém luka.
Turyarné Turnamdok Gomugdé
60 Édílo bulu édé lunamdém tattoji, bíkkol gímínnékídíːdok abaːyaːdé luto, "Séː aipé torné luyírnamko, séːko sém tarrasula du:yén?"
61 Émpigeːla bíkkol gímínnékídíːdé édém tadgeːla bínbínaila dung émna kinna Jisubí aíé bulum luto,"Édém nolu tadrasulama:nei?h 62 Émpém Taniːké Aoːmé tayéːtoːpé bík poːpéké dungkodoːpé gísangkunamdém kaːbegmílo nolu okko émna méːyén? 63 Yalodé turnamém bidag; adinké oko arrésin kamang. Ngo nolum oko agomém lubidu:ji édé yalodokké odokké édébulu turnamém binné.i 64 Émpigeːla noluk araːdo méngkésuman ékké dung." Kapéné Jisubí poːpélokkéboi kindag, séːkobulu méngkésumaːji odokké séːkobí bím yadla-kopagyeji. 65 Odokké bí luyartíto, "Odok léga:pé ngo nolum lubika, Abubí gíaːmomaːmílo, séːkosin ngok kéraːpé gíaːlaːmang."
66 Odok lédupé bojégamko bíkkol gímínné gílatkangku odokké bík lédílo gímíntokumang. 67 Jisubí yíːlaːnyidém luto, "Nolusin gípaglíːdakkunei?"
68 Simon Pitorbí bím lulatsuto, "Ruːtuma, ngolu séːkkoloːpé gíyén? Turyarné turnamdok agomé nokkolo dung. 69 Ngolu méngkésudag odokké kindag, no Ruːnéké Angunné Atérdé."