Jisubí:la Bík Bírrangkídíng
7
Odok lédupé Jisubí Galiliːdo gígoto; kapila:né Jiudikídíːdéa bím mokepé émna ruːsula dungngai, édémpila bí Judiaːdo gígolíːtomang. 2 Émpigeːla édílo Jiudikídíːdok Po:yublok donam gíːdí:dé aninkan,b 3 Jisuké bírrangkídíːdé bím luto, ''No sokké gípagla Judiaːpé gíkang, odo nokkol luyírsunékídíːdé nok gernam agerkídíːdém kaːye:pé. 4 Séːkai aíém amin-gígémomílo, bí léːsisula okkomsin ilaːmang. No sé: agerkídíːsémméi germílo, réngam kangkolo gertopén." 5 Bík aíké bírrangkídíːdéːsin bím méngkésutomang.6 Odok-légaːpé Jisubí bulum luto, ''Ngok ayírdé suːpésin píngamaːda; émpigeːla noluk ayíré loːdísém sido dung. 7 Moːpísé nolum tayumna:mang, émpigeːla ngom tayumdag kapilaːné buluk gernamkídíːdé aimaːné émna ngo lukanbido. 8 Nolu gíːdíːdoːpé gíkang. Ngo édé gíːdí:doːpé gígemang, kapéné ngok ayírdé píngangarmaːda.'' 9 Édémpé lugeːla bí Galiliːdo dungkang.
Po:yublok Donam Gíːdíːdo Jisubí
10 Émpigeːla, bík bírrangkídíːdé Gíːdí:doːpé gísa:nam lédupé, bíːsin taniːyém kinkosumaːpé léːsila gímínto. 11 Jiudikídíːdé bím gíːdíːdokodo magola taugoːla dungngai, ''Bí okolan?''
12 Taniːkídíːdok araːdo Jisuké doːnyingém kítaksukang, séːkai séːkai luto, "Bí ainé taniːkoda." Akedé luto, "Bí ainé taniːma, bí taniyém gíyodbodung." 13 Émpigeːla Jiudikídíːdém pésola séːkosin appíngké tatkolo bík agomém lutomang.
14 Édílo gíːdíːdok donam ayírdé kídísukoko gídagabon Jisubí Kumli:pé gísaːla luyírbito. 15 Jiudikídíːdé méngaksula tauto, "Séː taniːsé pogolo gíkímang émpigeːla kapé siddíko kinkan?"
16 Jisubí lulatsutoku, ''Ngok luyírnamsé ngok aíkémang; édé ngom mélígnédokké ngokkosoːpé gídag. 17 Séːkai Ruːnék méːnamdémpé ipé méːmílo, bí kinyé ngok luyírnamsé Ruːnékolokké gídunéi, ngok aíké ilang-gílaːlo luyírdunei émnamdém. 18 Séːkobí aíké légangé lusudagji bí aíké amin-gíyépé émna ludag. Émpigeːla séːkobí bím mélígnédok ménggésunam paːnam légangé gerbidagji bí aro taniyé; bíkkolo appíːdéi arro. 19 Musiːbí nolum Ru:néké luroːdém bimanga:nei? Émgom nolu séːkosin odok atkamdémpé ila du:mang. Kapila nolu ngom mokepé émna magodun?''
20 Taniːkídíːdé lulatsutoku, ''Nom uiːyé paːtag, séːko nom mokepé émna magodun?''c
21 Jisubí bulum luto, ''Ngo ager ako ito, odok tayéːdo nolu méngaksukang. 22 Musiːbí nolum gatpugnamdém bitag (édé Musiːkolokkémang, émpigeːla noluk abukídíːdokké), odokké nolu koːkoném Yoddo longélo gatpugdag.d 23 Yoddo longékolo koːkoném gatpugmílo, Musik lurodok kekonpé ager imang, émpém kapila nolu ngok tayéːlo aglíngé saːdun yoddo longédo ngo taniːkoném ésaːmotoku émnai? 24 Tayé-tayéːpé kaːla kébangém baːyok, émpigeːla aro kébangém baːlang."e
Jisubí Kiristobíːnei?
25 Odo Jerusalemdok tani ékké luto, ''Buluk mokepé émna magola du:nam tani:dé bíːmaːnei? 26 Kangkítok bí so appíngké tatkolo doːyíngém kíbila dung, émpigeːla bulu bím okkosin émna lumang. Ilang-gílang kanékídíːdé bím Kiristobí émnai kinséktobonei? 27 Édílo Kiristobí gíyéji, bí okolokkén édém séːkosin kinmaːyé; émgom séː taniːsé okolokkén ngolu kindag.''
28 Kumli:do luyírra duːdíːdo Jisubí bottépé luto, ''Arro, nolu ngom kindag, odokké nolu kindag ngo okolokkén. Ngo sidoːpé aíé méːsula gímang, émpigeːla séːkobí ngom mélíktuːji, bí arodé; nolu bím kinmang. 29 Ngo bím kindag, kapéné ngo bíkkolokké gídung, odokké bí ngom mélíktag.''
30 Édémpila bulu bím sogappé émna ito, émpigeːla séːkosin bím alagém sudlíktomang, kapilaːné bík ayírdé odoloːpé píngangarmaːda. 31 Émgom bojéko taniyé bím méngkésula luto, ''Édílo Kiristobí léngkansuyéji, bí séː taniːsémyang bojéyangko méːpílaːmaːnam kanggodém léngkanyélang?''
Jisumé Sogappé Ikínam
32 Jisuké tayéːlo taniːkídíːdé édémpé lula dung émnamdém Parosikídíːdé tatpaːsuto. Odo abíné miríkídíːdéːla Parosikídíːdé bím sogabdopé kumli kangganékídíːdém mélíkto. 33 Jisubí luto, ''Séːkobí ngom mélíktuːji ngo bíkkodoːpé gíyékubo odokké ngo noluk lédílo bojjarko duːmínmaːbo. 34 Nolu ngom magoyé, émpigeːla nolu ngom mapama:yé; odokké ngo okolo duːyéji, odoːpé nolu gíalaːmaːyé.''
35 Jiudikídíːdé akoné akoném luto, ''Séː taniːsé okoloːpé gípé méːdun ngolu bím pangkumaːyébo émduːda? Bí Girik tani lédílok duːné Jiudikídíːdoːpé gíla Girik taniːkídíːdém bí luyírbiyénei? 36 Édílo bí édémpé luton bík lunamdok légíːdé, 'Nolu ngom magoyé, émpigeːla nolu ngom mapamaːyé,' odokké, 'Ngo okolo duːyéji, odoːpé nolu gíalaːmaːyé'?''
Turnam Biné Asi-sikur
37 Gíːdíːdok laggaryaːnélaː itér longédo, Jisubí daksanggeːla bottépé jéːla luto, ''Séːkai asi tíːlíːmílo, ngokkosoːpé gíla tíːta.f 38 Kapé Ruːnék-gomugdo ludagji, séːkobí ngom méngkésuyéji, "Bík asin ara:dokké turnam biné asi sikurko bidlenyé.''g 39 Jisumé méngkésunné Angunné Yalomé paːyé, odok légaːpé bí édé agomdém luto. Kapéné odoloːpé Yalomé bimada, kapilaːné odolo:pé Jisumé unjígmomadaːai.
Tani:kídíːdok Araːdo Angunam
40 Édílo bulu édé lunamdém tatton, taniːékké luto, ''Aroruːpé bí lungor-lunédé.''
41 Akedé lukang, ''Bí Kiristobí.''
Émpigeːla akke luto, ''Kiristobí Galiliːdokkéi gílenyen? 42 Ruːnék-gomugdo lula léːmaːnei Kiristobí Debitké ope-éraːlokkélaː Debid migomké dungko Beteleːem taondokké gíyé émna?"h 43 Édémpila bík tayéːlo odo taniːkídíːdok araːdo angumínsukang. 44 Akke bím sogappé méːto, émpigeːla séːkosin bím alagém laglíktomang.
Jiudi Mirokídíːdok Méngkésumaːnam
45 Odo kumli kanggabnékídíːdé abíné miríkídíːdoːpélaː Parosikídíːdoːpé gíladdoku odokké bulu bulum tauto, ''Nolu kapila bím gíbotokuman?''
46 Bulu lulatsutoku, ''Séːkosin séː taniːsok agom lukamsémpé édíloːsin lukímangǃ''
47 Parosikídíːdé bulum luto, ''Nolumsinei bí yadyodbomkan?'' 48 Migomkídíːdok manggom Parosikídíːdok ara:lokké séːkai bím méngkésutagnei? 49 Émpigeːla édé taniːkídíːdé, séːkobulu luroːém kinmaːji, bulu pelígnamém pa:né."
50 Nikodimasbí, buluk ara:dok aːko, séːko poːpé Jisukoloːpé gíka, bí bulum tauto, 51 ''Tani:kolok bík agomdém tatpomaːpélaː bík gernam agerdém kinmaːpé, ngoluk luroːdé bím lupagdaglang?"i 52 Bulu lulatsuto, ''Noːsin Galiliːdok taniyei? Ruːnék-gomugém pokala ka:tok, Galiliːdokké lungor-lunné lenmang émnamdém odo no kinyépé.''j 53 Odokké bulu appíngé aí aíké okumpé gíkangku.