Bengkosun Mimédém Méːyinsubinam
8
Émpigeːla Jisubí Olib Adiːpé gíkang. 2 Longkondo ro:rokompé bí kumli:doːpé lékoda gídoku; odo tani appíːdé bík kéraːdoːpé gíkumsuto, odokké bí tedge:la bulum luyírbito. 3 Luro luyírnékídíːdéːla Parosikídíːdé bengkosuladuːdodo sogabnam bengkosun miméko gíaːbogeːla bím pongkogdo dagmoto 4 odokké bulu bím luto, "Luyír-abu, sé: néːsém bengkosuladuːdodo sogaptag. 5 Musiːbí ngolum sémpin néːngém ílíngki gékedopé Luroːdo lulíktak. Suːpag no bík légaːpé okko émna luyén?" 6 Odo bulu bím lugénamko paːlaːpé émna, bulu bím ankaːla édémpé taukaːto. Jisubí tungkunggeːla bík lagnédokki amoːdo atto. 7 Odokké bulu bím tattítatíla duːto, bí tusangge:kula bulum luto, "Noluk araːdok séːkké paːbé kamaːji, bí bím ílíːdém gégotpoːto." 8 Odokké lékoda tungkunggeːla amoːdo atto. 9 Émpigeːla édílo bulu édé lunamdém tatton, bulu ako akopé abíngaryaːnédokké ameyaryaːnédoːpé gípakkangku. Jisubí atéroːdé édé dagla duːmonam mimédok lédílo duːpakkang. 10 Jisubí bérsaːla bím tauto, "Ambíraː, okolan bulu? Nom séːkosinei imurnéko émna lajémtoman?"11 Bí lulatsutoku, "Ruːtuma, séːkosin lujémma,"
Jisubí luto, "Ngoːsin nom imurnéko émna lupagma:yé; saː gíkangku odokké lékoda paːbém iyok."a
Jisubí Moːpísok Píaːdé
12 Édílo Jisubí lékoda taniːkídíːdém lubiton, "Ngo mo:písok píaːdé. Séːko ngok lédílo gímínyéji bí édíloːsin kémolo lambégímaːyé, émpigeːla turnamnok pía:dé bíkkolo duːyé."
13 Parosikídíːdé bím luto, "Nok lukansubinamdé aromang, kapilaːné no nok aíém lukansubidung."
14 Jisubí lulatsutoku, "Ngo aíé aíém lukansubigom, ngok lukanbinamsé arro, kapéné ngo kindag ngo okolokké gídun odokké okoloːpé gíyén; émpigeːla nolu kinmang ngo okolokké gídun odokké okoloːpé ngo gíyéji. 15 Nolu adin-amír kísapé kébangém baːdag; ngo séːkomsin kébangém baːmang.b 16 Émpigeːla ngo kébangém baːmílo, ngok kéba:baːnamdé aroyé, kapila:né ngo atéroːngé baːmang. Émpigeːla ngoːla bí séːko ngom mélíktagjic ngoyi baːbido. 17 Noluk luroːdo sémpé attag, taniːannyilok lukanbikunamdé arro.d 18 Ngo aíképé lukansudung, odokké ngom mélígné Abubí ngok légaːpé lukanbidag."
19 Odok-légaːpé bulu bím tauto, "Nok Abubí okolon?"
Jisubí lulatsutoku, "Nolu ngomsin kinmang odokké ngok Abumésin kinmang, nolu ngom kinnamkaːmílo, nolu ngok Abumésin kinyai."
20 Kumli:dok murkong-kumsung kéraːdo luyírra duːdodo bí édémbulum luto. Émgom bík ayírdé píngangarmaːnam légaːpé séːkosin bím sogaptomang.
Jisubí Bík Sinamdém Lunoːbinam
21 Lékoda bí bulum luto, "Ngo gídakkubo, odokké nolu ngom magoyé, odokké nolu noluk paːblo siyé. Ngo okolo:pé gídagji nolu odo:pé gíalaːmang."
22 Odo Jiudikídíːdé luto, "Bí aíém mokesuyénei, kapila:né bí luduːda, 'Ngo okoloːpé gíyéji, nolu odoːpé gílaːmang'?"
23 Bí bulum luto, "Nolu kéíksokké; ngo tayéːtokké. Nolu séː moːpísokké, ngo séː moːpísokkémang. 24 Ngo nolum lubika nolu noluk paːblo siyé; kapéné nolu noluk paːblo siyérung édíloːpé nolu ngom Bí émna méngkésumaːyéji."e
25 Bulu tauto, "No séːkon?"
Jisubí lulatsutoku, "Ngo okko émna luaːdokkébo nolum lubisulaːdun." 26 Noluk légaːpé lupénamméla kébaːbaːpénammé bojéruːngko ngokké dung. Émpigeːla séːko ngom mélíktuːji, bí arro; ngo bíkkolok okkom tattuːji édém ngo réngamém lubidung."
27 Bí bík Abuké agomém bulum lubidung émna bulu tatkintomang. 28 Édémpila Jisubí luto, ''Édílo nolu Taniːké Aoːmé níksaːlígyéːji, odo nolu kinyé ngo bí émnamdém, odokké ngo okkomsin ngok aíké ilang-gílangki lumang, émpigeːla ngok Abubí okkom ngom luyírbitagji édém ludo. 29 Odokké séːkobí ngom mélíktagji bí ngok lédílo dung; bí ngom atéroːngém mépagmang, kapilaːné ngo loːdém bík méːlíksunam agerém gerdo."
30 Bí édémpé lula duːdodo, bojéruːngkopé taniyé bím méngkésuto.
Abraamké Ommangkídíng
31 Odo Jisubí édé méngkésuné Jiudikídíːdém luto, "Nolu ngok luyírnam agomsém méngkésuyarmílo, nolu ngok aro aro luyírsunné. 32 Odo nolu arodém kinyé, odokké arodé nolum mélennígyéku."f
33 Bulu bím lulatsutoku, "Ngolu Abraamké ommangé, odokké édíloːsin sé:kkaiké pagbopé ikímang. No kapé sémpé lulangkan, 'Nolum mélennígyéku'?"g
34 Jisubí bulum lulatsutoku, "Ngo nolum arodém lubidung, appíngé séːkobí paːbém idagji bí paːblok pagboko.h 35 Pagbodé okumdo duːyarmang; émpigeːla aoːdé loːdílongkípé duːyardag.i 36 Édémpila Aoːdé nolum mélenníkkumílo, nolu aropé mélenníkkunamém paːyé. 37 Ngo kindag nolu Abraamké ommangé. Émgom nolu ngom mokepé émna mago:dung, kapilaːné ngok agomdokké arré noluk asinkídíːdo kamang. 38 Abuké dungkodo ngo okkom kaːbektoji édém ngo nolum lubidung, odokké nolu noluk abudok okkom tattoji édém idag."
39 Bulu lulatsutoku, "Abraambí ngoluk abbo."
Jisubí bulum luto, "Nolu Abraamké omma:mílo, Abraambí okkom ika:ji, nolu édémíng iyyapé. 40 Émpigeːla séːko nolum arodém lubila duːji, nolu ngom mokepé émna magola dung, okodém ngo Ruːnékolok tattuːji; édémpé okkomsin Abraambí imangai. 41 Noluk abukídíːdé okkom ikaji nolusin édémíng idag."
Bulu bím luto, "Ngolum joːraːpé omang, ngolukké abbo akkongko dung, bí Ruːnébí."j
42 Jisubí bulum luto, "Ruːnébí noluk Abudéːamílo, nolu ngom ayaːyai, kapéné ngo Ruːnékolokké gítag; ngo aíé gísumang; bíːpag ngom mélíktag. 43 Ngok lubinamsém nolu kapila tatkinman? Kapilaːné nolu ngok lubinam agomsém tadrasulaːmang. 44 Nolu noluk abu uiːké ommangé, nolu noluk abuké méːnamdém gerbompé méːdag. Bí lendo-aːdodokkéboi mokegonéko, bí arolo duːnémangai, kapéné bíkkolo arro kamang. Édílo bí arrom lumaːji bí bík aíké aro séudém léngkansudag, kapéné bí arrom édíloːsin lumaːnéko odokké aro lumanékídíːdok abbo.k 45 Émpige:la ngo arodém lunam légaːpé nolu ngom méngkésumangǃ 46 Noluk ara:dok séːko ngom imurnéko émna léngkannaːyén? Ngo arodém luduːmílo, kapila nolu ngom méngkésuman? 47 Séːkobí Ruːnék taniːyéji, bí Ruːnék agomém taddag; nolu kapila édémbulum tadman, kapilaːné nolu Ruːnék taniyeimang."
Jisubíːlaː Abraambí
48 Jiudikídíːdé bím lulatsutoku, "Ngoluk lunamdé arokaːmalang, no Somaria taniːko odokké no uiːpaːnamko?"
49 Jisubí lulatsutoku, "Ngom uiːyé paːmang, ngo ngok Abumé ménggésudo, émpigeːla nolu ngom ménggésumang. 50 Émgom ngo ngok aíké luyitsunamém mamang; manédé Akkongko odokké bí kébangém baːpénédé. 51 Ngo nolum arodém lubidung, séːkaibí ngok agomém tadmílo, bí édíloːsin sinamém kaːbegmaːyé."
52 Jiudikídíːdé bím luto, "Suːpag ngolu kintobo nom uiːyé paːturung. Abraambí sikang, édémíːpé lungor-lunékídíːdéːsin, odokké no ludung, "Séːkaibí nok agomém tadmílo, bí édíloːsin sinamém kaːbeksumaːyé.'' 53 No ngoluk abu Abraamméyang bottéyaːnei? Bí sikang, odokké lungor-lunékídíːdéːsin sikang; no aíém séːkobí émna méːsudun?"
54 Jisubí lulatsutoku, "Ngo aíém luyitsuduːmílo, ngok luyitsunamdokké arré kamang, ngok Abumé, séːkom nolu noluk Ruːnébí émna lusuduːji, édé bí séːko ngom luyitsudagji. 55 Nolu bím kinmanggom, ngo bím kindag. Ngo kinmang émna lusumílo, ngo:sin nolugíngkémpé aro lumaːnéko, émpigeːla ngo bím kindo odokké bík agomém taddo. 56 Noluk abu Abraambí ngok longédém kaːpaːyé émna airu:pé méːpodaggai; bí édém kaːto odokké méːpokang."
57 Odo Jiudikídíːdé bím luto, "Nom onamé yíngo dítakkoi imada, kapé no Abraammé kaːton?"
58 Jisubí bulum lulatsutoku, "Ngo nolum arodém lubidung, Abraaméyang poːpélokkébo ngo dung."
59 Édémpila bulu bím gépé émna ílíngém tísaːto; émpigeːla Jisubí aíé léːsisula kumli:dokké gílenpakkang.