Jisubí Ododokkébo Miglun Taniːkoném Kaːpa:motoku
9
Jisubí lambégíla duːdodo, ododokkébo miglun taniːko kaːpa:suto. 2 Bíkkol luyírsunékídíːdé bím tauto, ''Rabbi, bím miglup-onam légaːpé imurdé séːkkén, séː taniːsokkéyé bík ané-abudokkéi?''a3 Jisubí luto, ''Imurdé séː taniːsokkésinmang, bík ané-abudokkésinmang, émpigeːla Ruːnék agerém bíkkolo léngkannam légangépag. 4 Longéla duːdodo séːko ngom mélíktagji; ngolu bík agerém gerpé lagidag yummé aːdobo, édílo séːkosin ager gerrangkumaːyé. 5 Ngo édíloːpé moːpíso duːyéji, ngo moːpísok píaːdé.''
6 Édém lunam lédupé, bí amoːdo takírém suglíkto odokké takírdokki amoːdém bukamoto, odokké bukadém taniːdok amigdo yonníkto. 7 Odokké bím luto, ''Gíla, Siloam Paːtaːbo supaksuta'' (Siloamdok légíːdé 'Mélíktagbo'). Édémpila bí gíla supaksuto, odokké kaːbeglangkula okumpé gíkangku.b
8 Bík kumrí-doːréla bím kogola duːdopé kaːyidnékídíːdé tauto, ''Édé tedla kogola duːné taniːídémaːlang bíː?''
9 Akedé luto, "É édé bíːída;" akke luto, ''Ma, édé bíːmang, bím gésuné taniːkomín.''
Émpigeːla bí aídé lubisuto, ''Ngo édé tani:íːdé.''
10 Bulu bím tauto, ''Émpém nok amigé kapé darkankun?''
11 Bí lulatsuto, ''Jisu émnam taniːdé bukkém yongeːla ngok amikso yonníggeːla ngom luto, 'Siloampé gíla supaksuta'; édémpila ngo gíla supaksuto, odokkéi ngo kaːpangkangku.''
12 Bulu bím tauto, ''Okolon édé taniːdé?"
Bí lulatsutoku, ''Ngo kinmang.''
Parosikídíːdé Kaːpaːmokunamdém Taugonam
13 Po:péké miglun taniːdém bulu Parosikídíːdoːpé gíaːbodo. 14 Oko longédo Jisubí amongém bukamogeːla bík amigdém kaːpaːmotokun, édé longédé yoddo longngai. 15 Édémpila Parosikídíːdé bím lékoda tauto kapé bí kaːpaːngkangkun. Bí bulum lubito, ''Bí ngok amikso bukkém yonníkto, odokké ngo supaksuto, oddoi ngo kaːbekkang.''
16 Parosi ékké luto, ''Séː taniːsé Ruːnékolokkémang, kapéné bí Yoddo longédém yodmang.''
Émpigeːla akedé luto, ''Paːb kané taniːkoné kapé sémpin kanggodém léngkannaːyén?'' Édémpé buluk araːdo angumínsukang.
17 Édémpila bulu lékoda miglun taniːdém tauto, ''Séːko nok amigém darmotokun, no bím séːkobí émna luyén?"
Taniːdé lulatsutoku, ''Bí lungor-lunéko.''
18 Édíloːpé taniːdok ané-abudém gogmangan, Parosikídíːdé édé taniːdé poːpé migludaggai odokké suːpag bí kaːpaːdungku émna méngkésutomang. 19 Bulu tauto, ''Séː noluk ao:déːyé, séːkom nolu ludang nolu bím miglup otaggai émna? Émpémílo suːpag bí kapé kaːpaːngkangkun?''
20 Bík ané-abudé lulatsuto, ''Ngolu kindag bí ngoluk aoːdé, odokké bím migludopé otagai. 21 Émpigeːla suːpag bí kapéi kaːpaːngkangkusong odokké séːkoi bím kaːpaːmotokusong, édém ngolu kinmang. Bím tautoka; bí bottékaːbo; bí aíké légaːdém lubisuyépé.'' 22 Bík ané-abudé Jiudikídíːdém pésola édémpé luto, kapéné Jiudikídíːdé ruːségnoːla léːtagai séːkoi Jisumé Kiristobíc émna ludesuyéji bím murong-okumdokké ménpagyé émna. 23 Odok-légaːpé bík ané-abudé luto, ''Bí bottékaːbo; bím tautoka.''
24 Édémpila bulu lékoda ododokkébo miglun taniːdém goggeːla luto, ''No arrom luyé émna, Ruːnékolo pesutok ngolu kindag édé taniːdé imurnéko.''
25 Bí lulatsutoku, ''Bí imurnéikosong, édém ngo kinmang; ngo agom akkongko kindag. Ngo migludaggai, émpigeːla suːpag ngo kaːpangkangku.''
26 Bulu bím tauto, ''Bí nom okkom iton? Kapé bí nok amigdém darmotokun?''
27 Bí bulum lulatsutoku, ''Ngo nolum lubbeiːkabo, émpigeːla nolu tadamang. Nolu kapila édém lékoda tadlíːdakkun? Nolusin bíkkol luyírsunépé ilíːduːnei?''
28 Odo bulu bím lukaːla luto, ''Noːmín bíkkol luyírsunnénǃ Ngolu Musiːkol luyírsunnéǃ 29 Ruːnébí Musiːmé lulíkka édém ngolu kindag, émpigeːla séː taniːsém ngolu kinmang bí okolokkéi gídusong.''
30 Taniːdé lulatsutoku, ''Édé airuːpé ménggappénamkoǃ Bí okolokké gíduːji édém nolu kinmang, émgom bí ngok amigém darmotoku. 31 Ngolu kindag Ruːnébí imurnélokkém tadmang, émpigeːla séːkaibí Ruːnémé kumnékomíloːla bík méːnamdém imílo, Ruːnébí bík kumnamém taddag. 32 Ododokkébo miglun taniːkoném séːkaibí bík amigém darmotoku émna, mo:písém ruːlendokkébo édíloːsin tatkímang. 33 Édé taniːdé Ruːnékolokké gínémangamílo, bí okkomsin ilamaːyai.''
34 Bulu bím lulatsutoku, ''Nom pa:bé kadopé otagai, suːpag no ngolum luyírkanǃ" Odokké bulu bím ménnenníkto.
Yalo-agerro Migluné
35 Bím ménnenamdém Jisubí tatpaːsuto, odokké édílo bí bím ríksuton odo luto, ''No Taniːkéd Aoːmé méngkésudoyé?''
36 Bí lulatsutoku, ''Ruːtuma, ngom lukítei, séːkon Taniːké Aoːdé, odo ngo bím méngkésupé?''
37 Jisubí bím luto, ''No bím ríksutagbo, odokké bí édé séːko nom luposula duːji."
38 Bí luto, ''Ruːtuma, ngo méngkésudag,'' odokké bí bím kumto.
39 Jisubí luto, ''Ngo kébangém bangkolo séː moːpísoːpé gítag, séːkobulu kaːpaːmaːji bulu kaːpaːmodokupé, odokké séːkobulu kaːpaːdagji, bulu miglumodopé.''
40 Bík kéraːdok duːné Parosi ékké bík édé lunamdém tadgeːla bulu bím tauto, ''Okko? Ngolusin miglunei?''
41 Jisubí bulum luto, ''Nolu miglunamkaːmílo, nolukké imuré kamaːyai; émpigeːla suːpag nolu ludung, 'Ngolu kaːpaːdag,' noluk imurdé duːtíkang.