Meːr-Ka:síːném Luyisula Lubinam
10
Jisubí luto, "Ngo nolum arodém lubidung, séːkobí meːr-mékodo:pé yabgodok gíamang, émpigeːla okolai barelok baramílo, bí dopsonékola: rodgonéko. 2 Séːkobí yabgodok gíadagji bí meːrkídíːdém kaːsíːnédé.a 3 Yabgodok-duːnédé bím yabgo síggebidag. Bí bík aíké meːrkídíːdém amin minna gogla bulum gílenbodag. 4 Édílo bí bík aíké meːrkídíːdém gílenbodagji, bí bulum gígébola gídag, odokké bulu bík lamkudo gímíndag, kapéné bulu bík gomugém tatkindag. 5 Bulu kangkinmaːnam taniːlok lamkulo édíloːsin gímínmaːyé; émpigeːla bulu bíkkolokké dukpagyé, kapéné bulu kangkinmaːnam taniːkídíːdok gomugém tatkinmang.''6 Jisubí bulum séː luyisunamsém lubito, émpigeːla bí bulum okkom lubitoji édém bulu tatkintomang.
Ainé Meːr-Ka:síːnédé Jisubí
7 Édémpila Jisubí lékoda bulum luto, ''Ngo nolum arodém lubidung, ngo meːrkídíːdok yabgodé. 8 Ngomyang gíponé appíːdé dopsongélaː rodgoːné, édémpila meːrkídíːdé buluk agomém tattomang.b 9 Ngo yabgodé; séːkobíi ngokkokki gíaːyeji, bí turyé, odokké bí gílen-gíaːla nésiném dogobegyé. 10 Dopsongé dopsongkolo, mokekolo odokké momíkkolopag gídag; émpigeːla ngo bulu turnamém paːyépé émnaːla édém paːsépaːyédanna paːdopé émna gídung.
11 Ngo ainé meːr-ka:síːnédé. Ainé meːr-kaːsíːnédé meːrkídíːdok légaːpé sibilíːdag.c 12 Dorra léːnam tani:dé bí séːko meːr-kaːsíːné taniːsinmang odokké séːkké aíké meːrésin kamang. Lampiyangé gídopé kaːmílo meːrkídíːdém mépagla dukpagdag; édémpidodém lampiyaːdé bulum kegabla ménpit-ménriddag. 13 Bím dorra léːnam légaːpélaː meːrkídíːdém ajjoukosin moyegmaːnam légaːpé bí dukpagdag. 14 Ngo ainé meːr-kaːsíːnédé; ngo ngok aíké meːrkídíːdém kindag odokké ngok meːrkídíːdé ngom kindag, 15 Abubí ngom kinkaːmíːdémpé ngo Abumé kindag; odokké ngo meːrkídíːdok léga:pé sibisinníːdag. 16 Ngokké séː kéréːsok lédílo kamínmaːné meːré kaseddung. Ngo bulumsin gongaruːngkupénammé, bulu ngok gognamém tadyé. Édémpila meːr appíːdé kéréngoːkopé iye odokké meːr-kaːsíːnédésin akkongkoyé.d
17 Sidok légaːpé Abubí ngom aipé-méːdag; kapilaːné ngo sibisinníːdag, odokké ngo édém lékoda paːlaːtsindokupé. 18 Séːkosin édém ngokkolokkém laːpagmang, émpigeːla ngok aíké mé:namki ngo sibido. Ngokké sibila:nan tornamé dung; odokké édém lékoda paːlatkunan tornamésin ngokké dung; séː ilang-gílananésém ngo ngok Abukolok paːtag."e
19 Édé agomdok légaːpé lékoda Jiudikídíːdok araːdo angumínsukang. 20 Bulukkodok bojéyangéi luto, ''Bí uiːpaːnamko, odokké bí simatkang. Kapila bík agomém taddun?"'
21 Émpigeːla akedé luto, ''Bík agom lunamkídíːsé uiːpaːnam taniːlok agommang. Uiːyé miglun taniːlok amigém darmolaːdokunei?'' f
Jiudikídíːdok Méngkésumaːnam
22 Édé dígínai odokké Jerusalemdo Tosaglínamg Gíːdíːdé aːdo; 23 Jisubí kumli:dok Solomonké tu:yabdo gígola dungngai.h 24 Édémpila Jiudikídíːdé bím gíyedgel tauto, ''Éddíkopé no ngolum lusarbimapé duːyén? No Kiristobíːmílo ngolum naréngoːpé lutei.''
25 Jisubí bulum lulatsutoku, ''Ngo nolum lubika, émpigeːla nolu méngkésumang. Abuké aminnok ngok gernam agerkídíːdé ngom lukanbidag; 26 émpigeːla nolu méngkésumang, kapilaːné nolu ngok meːr kéréːdokkémang. 27 Ngok meːrkídíːdé ngok gomugém tatkindag; ngo bulum kindag, odokké bulu ngok lédulo gímíndag. 28 Ngo bulum turyarné turnamdém bido, odokké bulu édíloːsin yogmaːyé; odokké séːkosin bulum ngok alaksokkém bupaglaːmaːyé. 29 Ngok Abu, séːkobí ngom bulum bituːji, bí appíngkémyang bottéyaːné; séːkosin bulum ngok Abuké alaglokkém bupaglaːmang. 30 Ngoːlaː Abubí akkongko.''
31 Bím ílíngki gépé émna Jiudikídíːdé lékoda ílíngém tísaːto. 32 Émpigeːla Jisubí bulum lulatsuto, ''Ngo Abukolokkém nolum bojéruːngko ainé agerém léngkanto; odok okodok légaːpé nolu ngom ílíngki gépé méːdun?"
33 Jiudikídíːdé bím lulatsutoku, ''Ngolu nom édé ainé agerkídíːdok légaːpé gépé émna ílíngém tísaːmang; émpigeːla Ruːnémé lukaːnam légaːpé; kapilaːné taniːgeːlasin, Ruːnébí émna lusudun."i
34 Jisubí bulum lulatsutoku, ''Édém noluk Luroːdo adla léːmaːnei, 'Ngo luka, nolu ruːnékídíːdé'?j 35 Séːkkoloːpé Ruːnék agomdé píngkaːji, bí bulum ruːnékídíːdé émmílo (odokké Ruːnék-gomugdé éngun-étamaːyé), 36 Émpémílo séːkom Abubí angunmoge:la séː moːpísoːpé mélíktoji, bím nolu ludonei, 'No Ruːnémé lukaːdung,' kapilaːné ngo luto, 'Ngo Ruːnéké Aoːdé'? 37 Ngo ngok Abuké agerém germaːmílo ngom méngkésuyok. 38 Émpigeːla ngo édémbulum imílogom, nolu ngom méngkésumanggom, nolu ajjikodaggom ngok gernamkídíːdém méngkésupé lagidaggai, odo nolu kinyai Abubí ngokkolo dung odokké ngo Abukolo dung émna."
39 Bulu lékoda bím sogappé ikíto, émpigeːla bí buluk alaglokké gípítsukang.
40 Odok lédupé Jisubí lékoda Jordan kekonpé gíkang, okolo Jonbí poːpélo baptis bigotka, odokké odo duːto. 41 Odokké bojéru:ngko taniyé bíkkodoːpé gíla luto, ''Jonbí oko kanggodémsin léngkanmangai, émpigeːla Jonbí séː taniːsok légaːpé oko okkom lukaji édé appíːdé aro agomé." 42 Odokké odo bím bojéruːngkopé taniyé méngkésuto.