JHN 2

Kanaːdok Midang

Galili:dok Kana taondo loum longé lédupé midangko dungngai, odokké Jisuké anédéːsin odo dungngai, 2 odokké Jisumélaː bíkkol luyírsunékídíːdémsin midaːdoːpé goktagai. 3 Édílo apongém oramton, Jisuk anédé bím luto, "Bulukké apongé katomaːbo."

4 Jisubí lulatsutoku, "Yo, no kapila ngom so aːtémodun? Ngok ayíré aːmadauːmpé."

5 Bík anédé ager-gernékídíːdém luto, "Bí okko émna luyéji édémpéi ilang."

6 Jiudiyé pídedoém supusunan ílíng-ki:líng píkéngko kéraːdo dungngai, apí apídé assém yíːpiːnyi dokké yiːnangko doridaggai. 7 Jisubí agergernékídíːdém luto, "Ki:língkídíːdo assém tobiːlíkta," édémpila bulu ki:língkídíːdém líːpoːdoːpé tobilíkto. 8 Odok lédupé bí bulum luto, "Suːpag asudoukopé suglengeːla dobo-tíːboné ruːtumdoːpé édém bombikang." Bulu édémíːpé ito, 9 odokké dobo-tíːboné ruːtumdé apopé iné asidém tíngkaːto. Assém tolígné pabgokídíːdé kindaggom, bí kinmangai édé okolokké lenkaːsong. Odo bí midaːmagbodém gogyodgeːla 10 luto, "Appíng taniyé minomém ainé apongém orpoːdak odokké édílo bulu tíːnonomaːpé tíːnam lédupé pongkangém ordakku; émpigeːla nolu suːpésin aiyangarné apongém léːtag."

11 Jisubí Galili:dok Kanaːdo séː méːpílaːmaːnam agersém gergodlígla bík unjígém léngkanto, odokké bíkkol luyírsunékídíːdé bím méngkésuto.

12 Odok lédupé bík ané, bírrang odokké bíkkol luyírsunékídíːdok lédílo bí Kapernaumpé gítokkang; odokké odo bulu asudoːuko duːto.

Kumli:dém Jisuké Mopunam

(Moti 21.12-13; Mark 11.15-17; Luk 19.45-46)

13 Édílo Jiudikídíːdok Gíboːla donam gíːdíːdé anindaggabon, Jisubí Jerusalempé gísangkang. 14 Kumli lotta:do bí soːbom, meːrém odokké parongém kola duːdopé paːto, odokké murkong anírmobinékídíːdém odo tedla duːdopé kaːto. 15 Édémpila bí ríbíki sabukko mogeːla, odokkém meːrkídíːdémnaː soːbokídíːdém ménnenamto, bí murkongkídíːdém érjergeːla tebuldém níngkulupto. 16 Parong kola duːnékídíːdém bí luto, "Sémbulum sokkém laːpagamto, ngok Abuké okumsém réko-koko okumpé imoyokǃ" 17 Édém adla léːtag émnamdém bíkkol luyírsunékídíːdé méːpaːtokuː "Nok okumdok légangé ngok asinang-onamdé ngom dopagyébo."

18 Odo Jiudikídíːdé bím luto, "Sémbulum ila:dopé nokké ilang-gílang dung émna oko kanggodém no ngolum léngkanyén?"

19 Jisubí bulum lulatsutoku, "Séː kumli:sém momíktok, édém ngo longé loumno daksaːmoyéku."

20 Odo Jiudikídíːdé lulatsutoku, "Séː kumli:sém mopínpé yíːpiːlangkéng dítakkopé lagikang, odokké no sém longé loumdo daksaːmoyékué?''

21 Émpigeːla bík lunam kumli:dé bík amírdéːamín. 22 Bík sikolokké turkunam lédupépag bíkkol luyírsunékídíːdé bík lunamdém méːpaːtoku. Odokké bulu Ruːnék-gomugdémnaː Jisuké lunam agomkídíːdém arro émna méngkésuto.

Jisubí Tani Asiném Kinnam

23 Odokké édílo bí Jerusalemdo Gíboːla donam gíːdíːdo dungngan, bojéruːngko taniyé bík méːpílaːmaːnam ager léngkannamém kaːla bík aminno méngkésuto. 24 Émpigeːla Jisubí aídé buluk tayéːlo méngkésutomang, 25 kapilaːné bí appíng taniːyém kindagai; édémpila taniːlok lukanbinamém bím lagimangngai, kapéné bí aíéi kindagai okko tani:lok asin ara:lo duːji.