JHN 1

Jon

Jonké Tatpon Lutad

Gomugdé Taniːpé Batkang

Lendo-aːdodo Gomugdé dungngai, odokké Gomugdé Ruːnéké lédílo dungngai odokké Gomugdé Ruːnébíːai. 2 Lendo-aːdodokkébo Gomugdé Ruːnéké lédílo dungngai. 3 Bíkkokki appíngém ru:to; okkom ru:tagji édé appíːdém bí:ong ruːtag. 4 Édé Gomugdé turnamém pangkodé, odokké édé turnamdé taniːlok píangé. 5 Píaːdé kémodo undag, odokké kémodé édém níngérrama.

6 Odo Ruːnéké mélígnam taniːko gído sék aminém Jon émtang. 7 Odo bíkkokki appíng taniyé méngkésuyépé émna, bí édé píaːdém lukanbiné kísapé gído. 8 Bí aídé édé píaːdéːmangai; bí édé píaːdém lukanbiné kísapépag gítag. 9 Appíng taniyém píaːmolaːné aro píaːdé moːpísoːpé gído.

10 Bí moːpíso dungngai, odokké moːpísém bíkkokki ruːtagai, émpigeːla moːpísok taniyé bím kangkintomang. 11 Bí bík aíké taniːkídíːdo:pé gíka, émpigeːla bík aíːtanikídíːdé bím toríksutomang. 12 Émgom séːkobulu bím toríksugeːla bík aminno méngkésutoji, bí bulum Ruːnéké ommaːpé ilaːdopé tornamém bito. 13 Bulum í:ikokki manggom, adin-amírrok méːnamkimanggom, taniːlok méːnamki omang, émpigeːla Ru:néké méngkampépag otag.

14 Odokké édé Gomugdé adinpé badla ngoluk lédílo duːmíndung. Ngolu bík unjígdém kaːto, édé Atérkélaː Atéroːdok unjígdém séːko Abukolokké gíduːji, aséngélaː arro píːsíːla dung.

15 Jonbí bím lukanbila luto, "Bí édé taniːdé séːkobí gíyé émna ngo luka, bí ngok lédupé gído, émpigeːla bí ngom gíbadyeku, kapilaːné bí ngomyang poːpélokkébo dung."'

16 Ngolu bík píːsíːné aséːdok ayangém ayang tayéːlo ayangém pa:témna pa:dung. 17 Kapéné luroːdém Musiːkokki bitagai; émpigeːla aséngélaː arro Jisu Kiristokokki gídung. 18 Séːkosin édíloːsin Ruːnémé kangkímang, émpigeːla Atér Aoːdé séːko bík Abudok kéraːdo duːji, bí ngolum Ruːnémé kinmoto.

Jon Baptiské Lugoːbinam

(Moti 3.1-12; Mark 1.1-8; Luk 3.1-18)

19 Édílo Jerusalemdok Jiudi mirokídíːdé mirí ékkémna Lebia ékkém Jonkolo:pé mélígla bí séːkon émnamdém taumokaːji, odo Jonké lukanbinamdé siddai.

20 Jonbí lusuto, "Ngo Kiristobíːmang" émnamdém appíngké tatkolo lupaksula lunamdém anyisutoma.

21 Bulu bím tauto, "Émpémílo no séːkon? No Elijaːbíːi?"

Bí luto, "Ngo Elijabíːmang."

"No lungor-lunédéi?"

Bí lulatsutoku, "Ma, ngo mang."

22 Léddarpé bulu luto, "No sé:kon? Ngolum lutei odo ngolu ngolum mélígnékídíːdém ngolusin lubilaːdokupé. No aíém séːkobí émna lusudon?"

23 Jonbí lungor-luné Jisoyaːké agompé lulatsutoku,

"Ngo sullipotado jéːla du:né gomugdéː

'Ruːtumké légaːpé lambédém yig-émmotok.'"

24 Odo Parosi ékké séːkom mélíktungngan, 25 bulu bím tauto, "No Kiristobíːma:mílo, Elijabíːmaːmílo, odokké lungor-lunédéːmaːmílo, kapila no baptisém bidun?"

26 Jonbí lulatsutoku, "Ngo asiki baptisém bidung, émpigeːla noluk araːdo aːko dagla dung séːkom nolu kinmang. 27 Bí édé séːko ngok lédupé gído, sék létagdok ríbídémsin tarsarbinan ngokké arré kamang."

28 Séː appíːsé Jordon kekondok Betaniːdo ikang, okolo Jonbí baptis bila dungngan.

Ruːnék Meːr-ao:dé

29 Longkondo Jonbí Jisumé bíkkodoːpé gídopé kaːla luto, "Kangkítok, Ruːnék meːr-ao:dé, séːko moːpísok pa:bém joːpagbipénédéǃ 30 Bí édé taniːdé sék légangé ngo luka, 'Ngok lédupé taniːko gído séːko ngom gíbadyeku, kapilaːné bí ngomyang poːpélokkébo dung.' 31 Ngo aíéi bím kinmangai, émpigeːla bím Israel taniyé kinyékupé émnapag ngo asiki baptisém bikapé gídung.''

32 Odokké Jonbí séː lukanbinamsém lubitoː "Tayéng-amoːtokké Angunné Yalobí pékí kísapé déːyíla bík tayéːlo déːrasudopé ngo kaːto. 33 Ngo aíé bím kinmaːyai, émpigeːla ngom asiki baptisém bidopé mélígnédé ngom luto, 'Oko tani:dok tayéːlo Yalodé déːyila déːrasuyéji, bíːéibo édé séːko Angunné Yaloki baptisém bipénédé.' 34 Ngo kaːsutag édémpila ngo lukanbidung bí Ruːnék Aoːdé."

Jisukolo Gígotpoːné Luyírsunékídíng

35 Longkondo Jonbí bíkkol luyírsuné annyikolok lédílo lékoda dagla dungngai. 36 Édílo bí Jisumé gípaddopé kaːtoji, bí luto, "Kaːtok, Ruːnék Meːr-aoːdéǃ"

37 Édílo luyírsuné annyidé bík édé lunamdém tattoji, bulu Jisuk lédulo gímínkang. 38 Ngeːlatsunamé, Jisubí bulum gímíndopé kaːla tauto, "Nolum okkom lagidan?"

Bulu luto, "Rabbi" (odok légíːdé Luyír-abu), "no okolo duːdon?"

39 Bí lulatsutoku, "Gímínto, odo nolu kaːbegyé." Édémpila bí okolo duːdagji bulu gímínna kaːto odokké édé longédo bulu bík lédílo duːmínto. Kapéné édé yummayír appi aːdí kíramné ayírdaggaboi.

40 Jonbí okko émna lutoji édém tadla Jisukkol gímínné annyidok ako Simon Pitorké bíro Andriubíːai. 41 Andriubí bík bíro Simonmé magappongekula bím lukanbito, "Ngolu Messiamé paːto," (édé agomdok légíːdé "Kiristo"). 42 Odokké bí bím Jisukodoːpé gía:bodo.

Jisubí bím kanggeːla luto, "Nok aminé Jonké ao Simon. Émpigeːla nom Kepas émna gogyé." (Kepas émna minnamdé Girik agompé Pitor.)

Jisubí Pilibméla: Natanielmé Gognam

43 Longkondo Jisubí Galiliːpé gípé lento. Pilibmé paːla, bí bím luto, "Ngok lédulo gímínto." 44 Pilibbíːsin Andriukélaː Pitorké taon Betsaidadokkai. 45 Pilibbí Natanielmé ríksula bím lubito, "Ngolu Musiːké Luroːdok adla léːnam odokké sék agomém lungor-lunékídíːdéːsin adla léːtag- Jusepké ao, Najareddok Jisumé paːto."

46 Natanielbí tauto, "Najareddokké o:kai ainéko lennadolang?" Pilibbí lulatsuto, "Gígeːla kaːta."

47 Édílo Jisubí Natanielmé bíkkodːpé gíaːdopé kaːton, bí bím luto, "Séː aro aro Israel taniːko, bíkkolo arrongé dung."

48 Natanielbí tauto, "Kapé no ngom kindang?"

Jisubí lulatsutoku, "Pilibbí nom gogmaːdapé nok tajíg amíng kéígdok duːnamdém ngo kaːtag."

49 Odo Natanielbí lukansuto, "Luyír-abu, no Ruːnék Aoːdé; no Israelsok Migomdé."

50 Jisubí luto, "No tajíg amíng kéígdo dungngai émna lubinam légaːpé no méngkésudung. No édémyang bottéyan agerém kaːbegyé." 51 Jisubí luyarra luto, "Ngo nolum arodém lubidung, nolu tayéng-amoːtém síggedopé kaːbegyé, odokké Ruːnék tayéng-yaːmeyém Taniːké Aoːké tayéːlo déːyila déːsaːla duːdopé kaːbegyé."