Jisubíːla Nikodimasbí
3
Odo Nikodimas émnam Parosi:ko dungngai, bí Jiudi Ki:ni-kéba:dok kébang-ajonkai.a 2 Bí yumépé Jisukodo:pé gíla bím luto, ''Rabbi, ngolu kindag no Ru:nékolokké gíné luyírnéko émna. Kapéné Ru:nébí nok lédílo duːmínmaːmílo, sé:kosin nok gernam mé:píla:maːnam agerkídí:dém gerramang.''3 Jisubí bím lulatsulangkula luto, ''Ngo nom arodém lubidung, sé:kosin Ru:nék migomdokodém kaːbegmaːyé édíloːpé bím lékoda otenkuma:yéji.''cb
4 Nikodimasbí tauto, ''Édílo tani:koné míjíːdagboːji, kapé bím lékoda otenyékun? Lékoda otenkosunam légaːpé kapé bí bík anédok aki ara:pé duralaːyekun?''
5 Jisubí lulatsutoku, ''Ngo nom arodém lubidung, sé:kosin Ruːnék migomdokodoːpé gíalaːmaːyé édíloːpé bím asiloːlaː yalolo otenkoma:yéji.d 6 Adin-amíré adin-amírém odag, odokké Yalodé yallom odag. 7 No ngok lunamsém tadla tadngaksuyok, "Nome lékoda otenruːpaːyéku." 8 Ésaré okolopéi sarrídagji odopéi sardag. No ésardok ngomnamdém tadbegyé, émpigeːla édé okolokké sarsangkaːji odokké okoloːpé sardagji édém lubilaːma. Séːkom Yalolo otuji bíkkolo édé édémíːpé idag.'' f
9 Nikodimasbí tauto, ''Édé kapé édémpé ilaːyen?''
10 Jisubí luto, ''No Israelso luyírné-taniːko, émpigeːla no séː agomkídíːsém tatkinmaːnei? 11 Ngo nom arodém lubidung, ngolu okkom kindagji édém ludo, odokké ngolu okkom kaːtuːji édém lukanbido, émpigeːla nolu suːpésin ngoluk lukanbinammém arrompé méːmang. 12 Ngo nom mo:písok agomki lubidung émgom no méngkésumang; émpémílo ngo nom tayéng-among agomki lubimílo kapé no méngkésuyén? 13 Taniːkég Aoːké séːko tayéːtokké gíduji, bík ruːyipé séːkosin édíloːsin tayéng-amoːpé gíkímang.h
14 Musiːbí kappar sullipotado tabídém íksangkaji, édémarpé Taniːké Aoːmé íksaːruːyé,i 15 édémpidodém séːkobulu bím méngkésuyéji turyarné turnamdém paːyé. 16 Kapéné Ruːnébí moːpísém aipé aya:la bí bík atér Aoːmé bito, séːkobí bím méngkésuyéji bí yogmaːbo émpigeːla bí turyarné turnamém paːyé.j 17 Kapéné Ruːnébí bík Aoːmé moːpísém imurnép-sabdopé mélígmang, émpigeːla bíkkoki moːpísém moturdokupé mélíktag.
18 Séːkobíi bím méngkésuyeji bím imurnép-sabmaːbo, émpigeːla séːkobíi méngkésumaːji bím imurnép-sappaktagbo, kapilaːné bí Ruːnék atér Aoːdok aminno méngkésutomang. 19 Kébaːbaːnamdok légaːdé séː mo:písoːpé píaːdé gítak, émpigeːla taniyé píaːdém aipé-méːmaːpé kémodém aipé-méːyaːto, kapilaːné buluk gernamkídíːdé aimangoːné.k 20 Séːkobíi aiman agerém gerdoji bí píaːdém tayumdag, odokké bík agerdém kaːbekpéké émna pésola píadoːpé gíaːmang. 21 Émpigeːla séːkobíi arolo turra duːji bí píaːdoːpé gíaːyé, oko okkom bí gertagji édém Ruːnékokki gertag émna naréngoːpé kaːbegyé.''
Jonbíːla Jisubí
22 Odok lédupé, Jisubíːla bíkkol luyírsunékídíːdé Judiaːdok doːlungkídíːdoːpé gílenkang, okolo bí asudoːukopé buluk lédílo du:míngeːla taniːkídíːdém baptisém bito. 23 Odo ayírdo Jonbíːsin Salimdok kéraːpé Ainondo baptis bila dungngai, kapilaːné odo assé píːnamkopé dung. Odokké taniyé bíkkodoːpé baptis langkolo gíngasumaːpé gíto. 24 Kapéné odoloːpé Jonmé makanaːdo tummada.l
25 Jiudi taniːkologla Jonkol luyírsunékídíːdok pongkogdo pídesunamdok tayéːlo lukerkaːmínsunamko lenkang. 26 Bulu Jonkodoːpé gígeːla bím luto, ''Rabbi, Jordon abung kekondo nok lédílo duːmínné tani, odokké séːkom no lukanbila duːji, bíːsin baptis bila dung, odokké kangkítok, tani appíngéi bíkkoloːpé gídag.''
27 Odo Jonbí lulatsutoku, ''Édíloːpé taniːkoném tayéːtokké bimayéji, odoloːpé bí okkomsin paːlaːmang.m 28 Nolu aíésin ngok lukanbikunékídíːdé, ngo okko émkan, 'Ngo Kiristobíːmangn, émpigeːla ngom bímpéyang ménoːlíktag.' 29 Séːkké anu-yamné duːji bíːmín midaːmagbodén. Midaːmagbodok ajonkídíːdé, bulu séːkobulu dagla bík gomugém tatpaːla duːji, odokké bík gomugdo bulu méːpodag; édémpila séː ngok méːposé ngokképé píngkaːbo.o 30 Bí botté bottéla gíyé, émpigeːla ngo yogayogala gíyé."
Tayéːtokké Togyinédé
31 Séːkobí tayé:tokké togyidu:ji bí appíngémyang bottéyaːné. Séːkobí séː mo:písokkén bí moːpísok taniyé, odokké moːpísok kísapé agomém ludag. Séːkobí tayé:tokké togyidu:ji bí appíngémyang tayéːyaːnép 32 Bí okkom kaːtoːji odokké okkom tattoji édémbulum lukanbidag, émpigeːla séːkosin bík lukanbinamdém toríksumang. 33 Séːkobí bík lukanbinamdém toríksutoji, Ru:nébí arro émnamdém bí odokki léngkanbidag. 34 Kapéné séːkom Ruːnébí mélíktagji bí Ruːnék agomém lubidag, kapila:né Ruːnébíq Angunné Yalomé píːsutsaːluddopé bimang. 35 Abudé Aoːdém aipé-méːdag édémpila Aoːdok alagdo appíngém bingaptag. 36 Séːkobíi Aoːdém méngkésuyéji bíkké turyarné turnamé dung, émpigeːla séːkobíi Aoːdém lupagyéji bí turnamém kaːpaːmaːyé, kapéné Ruːnék aglíngé bík tayéːlo duːdag."